ഇന്റർ മയാമിക്കായി ഏറ്റവും വേഗത്തിൽ 100 ഗോളുകൾ; റെക്കോർഡുമായി മെസ്സി

മയാമി: ഇന്റർ മയാമിക്കിയായി ഏറ്റവും വേഗത്തിൽ നൂറ് ഗോളുകൾ പൂർത്തിയാക്കുന്ന താരമായി ലയണൽ മെസ്സി. ഇന്റർ മയാമിയെ കാംപിയോൺസ് കപ്പ് ജേതാക്കളാക്കിയാണ് മെസ്സി റെക്കോർഡിലെത്തിയത്. 114 മത്സരങ്ങളിൽ നിന്നാണ് മെസ്സിയുടെ നേട്ടം. മെക്‌സിക്കൻ ക്ലബ്ബ് ക്രൂസ് അസുലിനെ എതിരില്ലാത്ത രണ്ട് ഗോളിന് പരാജയപ്പെടുത്തിയാണ് ഇന്റർ മയാമി ചാമ്പ്യൻമാരായത്. മെസ്സി ഒരു ഗോളടിക്കുകയും ഒരു ഗോളിന് വഴിയൊരുക്കുകയും ചെയ്തു.

മത്സരത്തിലെ ആദ്യ അവസരം ലഭിച്ചത് ക്രൂസ് അസുലിനാണ്. എന്നാൽ ജോസ് പാരഡെലയുടെ ഷോട്ട് മയാമി ഗോൾകീപ്പർ ഡെയ്ൻ സെന്റ് ക്ലെയർ തടഞ്ഞു. 24-ാം മിനിറ്റിലാണ് മെസ്സിയുടെ ഗോൾ വന്നത്. അതും ഒരു ഹെഡ്ഡറിലൂടെ. ലൂയിസ് സുവാരസ് നൽകിയ ക്രോസിൽ, 5 അടി 7 ഇഞ്ച് മാത്രം ഉയരമുള്ള മെസ്സി വില്ലർ ഡിറ്റയെ മറികടന്ന് ഡൈവിംഗ് ഹെഡ്ഡറിലൂടെ ഇന്റർ മയാമിയ്ക്ക് മുൻതൂക്കം നൽകി. 32-ാം മിനിറ്റിൽ സുവാരസ് വീണ്ടും ഗോളിന് വഴിയൊരുക്കാൻ ശ്രമിച്ചു. മെസ്സി നൽകിയ മനോഹരമായ പന്ത് സ്വീകരിച്ച സുവാരസ് അത് ജെർമൻ ബെർട്ടേരാമിക്ക് മറിച്ചുനൽകി. എന്നാൽ ബെർട്ടേരാമിയുടെ ഷോട്ട് ഗോൾവര കടക്കും മുൻപ് എതിർതാരങ്ങൾ രക്ഷപ്പെടുത്തി.

67-ാം മിനിറ്റിൽ ക്രൂസ് അസുലിന് സമനില നേടാനുള്ള സുവർണ്ണ അവസരം ലഭിച്ചെങ്കിലും, പകരക്കാരനായി ഇറങ്ങിയ ഗബ്രിയേൽ ഫെർണാണ്ടസിന്റെ ഹെഡ്ഡർ പോസ്റ്റിൽ തട്ടിത്തെറിക്കുകയും, തുടർന്നെടുത്ത ഷോട്ട് കസീമിറോ ബ്ലോക്ക് ചെയ്യുകയും ചെയ്തു. 81-ാം മിനിറ്റിൽ മെസ്സിയെടുത്ത കോർണർ കിക്കിൽ നിന്ന് പന്ത് ലഭിച്ച കസീമിറോ അത് ലോങ് ഹെഡ്ഡറിലൂടെ പോസ്റ്റിലേക്ക് തിരിച്ചുവിട്ട് മയാമിയുടെ ലീഡ് രണ്ടായി ഉയർത്തി.

കഴിഞ്ഞ വർഷത്തെ എംഎൽഎസ് കപ്പ് ജേതാക്കളും മെക്‌സിക്കോയുടെ കാംപിയോൺ ഡി കാംപിയോൺസ് ജേതാക്കളും തമ്മിലാണ് വാർഷിക കാംപിയോൺസ് കപ്പിൽ ഏറ്റുമുട്ടുന്നത്. എംഎൽഎസ് ക്ലബ്ബുകളുടെ ആതിഥേയത്വത്തിൽ നടക്കുന്ന ഈ ടൂർണമെന്റിന്റെ എട്ടാമത് പതിപ്പായിരുന്നു ഇത്.

ഇന്റർ മയാമിയുടെ വിജയത്തിന് മുൻപുള്ള അവസാന മൂന്ന് പതിപ്പുകളിലും മെക്‌സിക്കൻ ടീമുകളായിരുന്നു വിജയികൾ. മെക്‌സിക്കൻ വമ്പന്മാരായ ക്രൂസ് അസുലിന് ഇതുവരെ കാംപെിയോൺസ് കപ്പ് നേടാൻ കഴിഞ്ഞിട്ടില്ല. 2021-ൽ അവർ ഫൈനലിൽ പരാജയപ്പെട്ടിരുന്നു.

Content Highlights: Lionel Messi scored his 100th goal for Inter Miami with a rare header., Inter Miami defeated Cruz Azul 2-0 to win their first Campeones Cup title., Casemiro sealed the victory with a header from a late Messi corner kick., The match marked Cristian Kily Gonzalez's debut as Inter Miami's new head coach., This victory gave Messi his first trophy of the year following the 2026 World Cup.