ഒരു പെനാൽറ്റിയെടുക്കാൻ ഇത്ര കാത്തിരിപ്പോ-എംബാപ്പയെ പിന്തുണച്ച് ഹാളണ്ട്, ചർച്ചയായതോടെ പോസ്റ്റ് നീക്കി

മൊറോക്കോയെ എതിരില്ലാത്ത രണ്ട് ഗോളിന് പരാജയപ്പെടുത്തി ഫ്രാൻസ് ഫുട്‌ബോൾ ലോകകപ്പിന്റെ സെമി ഫൈനലിലെത്തിയിരുന്നു. എന്നാൽ അതിനൊപ്പം ഫ്രാൻസ് താരം എംബാപ്പെയുടെ പെനാൽറ്റി നഷ്ടവും ചർച്ചയായി. ഈ ചർച്ചയിൽ നോർവേയുടെ സൂപ്പർതാരം എർലിങ് ഹാളണ്ടും പങ്കാളിയായി. 'ഒരു പെനാൽറ്റി എടുക്കാൻ അഞ്ച് മിനിറ്റ് കാത്തിരിക്കേണ്ടി വരുന്നത് വളരെ ദീർഘമായ സമയമാണ്' എന്ന് തന്റെ സ്‌നാപ്ചാറ്റിൽ ഹാളണ്ട് കുറിച്ചു. ടിവിയിൽ നിന്നെടുത്ത മത്സരത്തിന്റെ ചിത്രവും ഇതിനൊപ്പമുണ്ടായിരുന്നു. എന്നാൽ പോസ്റ്റ് ചർച്ചയായതോടെ ഹാളണ്ട് ഇത് നീക്കം ചെയ്തു.

മത്സരത്തിന്റെ തുടക്കത്തിൽതന്നെ ഫ്രാൻസിന് അനുകൂലമായ പെനാൽറ്റി വന്നിരുന്നു. റഫറി പെനാൽറ്റി സ്‌പോട്ടിലേക്ക് വിരൽ ചൂണ്ടിയെങ്കിലും ഏറെ നേരത്തെ ആശയക്കുഴപ്പത്തിനൊടുവിലാണ് എംബാപ്പെ കിക്കെടുത്തത്. എന്നാൽ മൊറോക്കോ ഗോളി യാസിൻ ബോണോ ഇത് തടുത്തിട്ടു.

മൊറോക്കോ താരം നൗസായിർ മസ്‌റായി എംബാപ്പെയെ ബോക്‌സിൽ വീഴ്ത്തിയതിനാണ് ഫ്രാൻസിന് അനുകൂലമായി പെനാൽറ്റി നൽകിയത്. ഫൗളിനെ തുടർന്നാണോ എംബാപ്പെ വീണത് എന്ന് പരിശോധിക്കാൻ പിന്നീട് വാറിനെ ആശ്രയിക്കേണ്ടി വന്നു. ഇത് ഏതാണ്ട് മൂന്ന് മിനിറ്റിലധികം സമയമെടുത്തു. ഈ നീണ്ട കാത്തിരിപ്പ് എംബാപ്പെയുടെ പെനാൽറ്റി പ്രകടനത്തെ ബാധിക്കുകയും ചെയ്തു.

ഇതിന് പിന്നാലെയാണ് ഈ പെനാൽറ്റി ഫുട്‌ബോൾ ആരാധകർക്കിടയിൽ ചർച്ചയായത്. ഫ്രഞ്ച് കോച്ച് ദിദിയർ ദെഷാംപ്‌സും അതൃപ്തി പ്രകടിപ്പിച്ച് രംഗത്തെത്തി. ഈ നീണ്ട കാത്തിരിപ്പ് എംബാപ്പെയുടെ ശ്രദ്ധ തിരിക്കുന്നതിൽ പങ്ക് വഹിച്ചിട്ടുണ്ടെന്ന് ദെഷാംപ്‌സ് വ്യക്തമാക്കി. 'വാർ പരിശോധനയും അതിനുശേഷം ഫൗളിൻമേൽ രണ്ടാമതൊരു പരിശോധനയുമുണ്ടായി. അതിന് രണ്ട് മിനിറ്റിൽ അധികം സമയമെടുത്തു. അവിടെ എന്താണ് സംഭവിച്ചതെന്ന് കൃത്യമായി അറിയില്ല. അതിന് കുറച്ചധികം സമയമെടുത്തു എന്ന് മനസിലായി. ആ സമയത്ത് എംബാപ്പെ ആ കിക്ക് എടുക്കാൻ പൂർണ സജ്ജനായി നിൽക്കുകയായിരുന്നു. ഈ സമയം വൈകൽ ഗൗരവത്തിൽ തന്നെയെടുക്കണം'- ദെഷാംപ്‌സ് വ്യക്തമാക്കി.

Content Highlights: France secured a 2-0 victory over Morocco to advance to the 2026 World Cup semi-finals., A 3-minute VAR delay preceded Mbappe's missed penalty, drawing criticism from Erling Haaland., Mbappe confirmed his ankle injury is minor and his substitution was tactical., France has now reached three consecutive World Cup semi-finals., Mbappe earned his third Player of the Match award of the tournament.