15 മിനിറ്റിനുള്ളിൽ ഹാട്രിക്ക്; കളംനിറഞ്ഞ് ക്രിസ്റ്റ്യാനോ റൊണാൾഡോ, ഗോളെണ്ണം 985 | Video

റിയാദ്: പ്രഥമ ബോട്ട് (Ballon d'or of All Time) പുരസ്‌കാരം നേടിയതിനു പിന്നാലെ സൗദി പ്രോ ലീഗിൽ മുന്നും പ്രകടനം പുറത്തെടുത്ത് അൽ നസറിന്റെ പോർച്ചുഗീസ് താരം ക്രിസ്റ്റ്യാനോ റൊണാൾഡോ. അൽ-ഖൊലൂദ് ക്ലബ്ബിനെതിരായ മത്സരത്തിൽ അൽ നസറിനായി 15 മിനിറ്റിനുള്ളിൽ താരം ഹാട്രിക്ക് തികച്ചു. കിങ് സൗദ് യൂണിവേഴ്സിറ്റി സ്റ്റേഡിയത്തിൽ നടന്ന ആവേശകരമായ പോരാട്ടത്തിൽ ക്രിസ്റ്റ്യാനോയുടെ മികവിൽ മൂന്നിനെതിരേ അഞ്ച് ഗോളുകൾക്കാണ് അൽ നസർ ജയിച്ചുകയറിയത്.

രണ്ടാം പകുതിയിലായിരുന്നു 41-കാരനായ താരത്തിന്റെ ഹാട്രിക്ക്. ഇതോടെ ക്രിസ്റ്റ്യാനോയുടെ ആകെ കരിയർ ഗോളുകളുടെ എണ്ണം 985 ആയി. 1000 കരിയർ ഗോളുകൾ എന്ന നാഴികക്കല്ലിലേക്ക് ഇനി വെറും 15 ഗോളുകൾ കൂടി മതി താരത്തിന്.

66, 72, 81 മിനിറ്റുകളിലാണ് റൊണാൾഡോ ഗോളുകൾ നേടിയത്. മത്സരത്തിൽ നേരത്തെ അദ്ദേഹത്തിന്റെ രണ്ട് ഗോളുകൾ റദ്ദാക്കപ്പെട്ടിരുന്നു. ക്ലോസ് റേഞ്ചിൽ നിന്നുള്ള രണ്ട് ഗോളുകളും ഒരു ഹെഡ്ഡറുമാണ് ഈ മത്സരത്തിൽ റൊണാൾഡോ നേടിയത്. 2023-ൽ സൗദിയിൽ എത്തിയതിന് ശേഷം അൽ നസറിനായുള്ള അദ്ദേഹത്തിന്റെ ഏഴാമത്തെ ഹാട്രിക്ക് ആണിത്. ഇതോടെ ക്ലബ്ബിനും രാജ്യത്തിനുമായി റൊണാൾഡോയുടെ ആകെ ഹാട്രിക്കുകളുടെ എണ്ണം 67 ആയി. റയൽ മാഡ്രിഡിനായി 44, പോർച്ചുഗലിനായി 10, അൽ നസറിനായി 7, മാഞ്ചസ്റ്റർ യുണൈറ്റഡിനും യുവന്റസിനും വേണ്ടി മൂന്നു വീതം ഹാട്രിക്കുകളാണ് അദ്ദേഹം നേടിയിട്ടുള്ളത്. ഈ സീസണിലെ അദ്ദേഹത്തിന്റെ ആദ്യ ഹാട്രിക്ക് കൂടിയാണിത്.

അതേസമയം പ്രൊഫഷണൽ കരിയറിൽ 1,000 ഗോളുകൾ തികയ്ക്കുന്ന കാര്യത്തിൽ റൊണാൾഡോ ബഹുദൂരം മുന്നിലാണ്. റൊണാൾഡോയ്ക്ക്, രണ്ടാമതുള്ള ലയണൽ മെസ്സിയേക്കാൾ 49 ഗോളുകളുടെ മുൻതൂക്കമുണ്ട്. മെസ്സിയുടെ പേരിൽ നിലവിൽ 936 പ്രൊഫഷണൽ ഗോളുകളാണുള്ളത്.

Content Highlights: Cristiano Ronaldo scored a hat-trick in just 15 minutes for Al Nassr against Al-Khلود., His total career goals have now reached 985, needing only 15 more to hit the 1000-goal milestone., Al Nassr won the match with a 5-3 scoreline., Ronaldo leads Lionel Messi by 49 goals in the race to 1000 professional goals.