ഏകദിനത്തിൽ ഇതാദ്യം; ഇന്ത്യക്കെതിരെ രണ്ട് റെക്കോർഡുകളുമായി വിൻഡീസ്

ഗുവാഹത്തി: ഇന്ത്യക്കെതിരായ രണ്ടാം ഏകദിനത്തിൽ റെക്കോർഡ് സ്വന്തമാക്കി വെസ്റ്റിൻഡീസ്. ഒരു ഏകദിനത്തിൽ ആദ്യമായാണ് മൂന്ന് വിൻഡീസ് താരങ്ങൾ സെഞ്ചുറി നേടുന്നത്. ജോൺ കാംബെൽ, ഷായ് ഹോപ്, അമീർ ജങ്കു എന്നിവരാണ് സെഞ്ചുറി കണ്ടെത്തിയത്. ഇതോടൊപ്പം ഏകദിനത്തിൽ തങ്ങളുടെ മികച്ച സ്‌കോറും കണ്ടെത്താൻ വിൻഡീസിന് കഴിഞ്ഞു. 2019-ൽ ഇംഗ്ലണ്ടിനെതിരെ നേടിയ 389 റൺസ് എന്ന സ്‌കോറാണ് വിൻഡീസ് ഈ പ്രകടനത്തിലൂടെ മറികടന്നത്.

നിശ്ചിത ഓവറിൽ ഏഴ് വിക്കറ്റ് നഷ്ടത്തിൽ അവർ 405 റൺസാണ് അടിച്ചെടുത്തത്. ഓപ്പണറായി ഇറങ്ങിയ കാംബെൽ 65 പന്തിൽ സെഞ്ചുറി നേടി മികച്ച തുടക്കം നൽകി. വെസ്റ്റിൻഡീസ് ബാറ്റർ ഇന്ത്യയുടെ പരിചയസമ്പത്തില്ലാത്ത പേസ് ആക്രമണത്തെ നിഷ്‌കരുണം പ്രയോജനപ്പെടുത്തി. ക്രിസ് ഗെയ്ലിന്റെ കടുത്ത ആരാധകനായ കാംബെൽ, 68 പന്തിൽ ഒമ്പത് ഫോറും അഞ്ച് സിക്‌സറുകളും നേടി 101 റൺസാണ് അടിച്ചെടുത്തത്.

തുടർന്ന് ഹോപ്പും ജങ്കുവും ചേർന്ന് സ്‌കോറിങ് നിലനിർത്തി വെസ്റ്റിൻഡീസിനെ പൂർണ്ണ നിയന്ത്രണത്തിലാക്കി. വിരാട് കോലി ഷോർട്ട് മിഡ്വിക്കറ്റിൽ 27 റൺസിൽ നിൽക്കെ വിട്ടുകളഞ്ഞ ക്യാച്ച് മുതലെടുത്ത് ഹോപ്പ് തന്റെ ഇന്നിങ്‌സ് കരുതലോടെ കെട്ടിപ്പടുക്കുകയും പിന്നീട് വേഗത കൂട്ടുകയും ചെയ്തു. എട്ട് ഫോറുകളും മൂന്ന് സിക്‌സറുകളും സഹിതം 94 പന്തിൽ 104 റൺസ് നേടിയ ക്യാപ്റ്റൻ, ഇന്ത്യയെ മത്സരത്തിലേക്ക് തിരിച്ചുവരാൻ അനുവദിക്കാതെ റൺസ് കണ്ടെത്തി.

കണക്കുകൂട്ടിയ ഷോട്ടുകളും ആക്രമണവും സമന്വയിപ്പിച്ച് ഹോപ്പിന് മികച്ച പിന്തുണ നൽകിയ ജങ്കു വെറും 69 പന്തിൽ തന്റെ രണ്ടാം ഏകദിന സെഞ്ചുറി തികച്ചു. 13 ഫോറുകളും 3 സിക്‌സറുകളും സഹിതം 114 റൺസെടുത്താണ് അദ്ദേഹം കളം വിട്ടത്.

Content Highlights: West Indies scored 405/7 against India in Guwahati, their highest ODI score., First time three West Indies batsmen scored centuries in a single ODI., John Campbell, Shai Hope, and Amir Jangoo hit centuries., Surpassed their previous highest score of 389 against England in 2019.