‘ഞാൻ ഇപ്പോഴും ക്രിക്കറ്റിലെ വിദ്യാർഥി’; ഈ പ്രായത്തിൽ ശൈലി മാറ്റാൻ പ്രേരിപ്പിച്ചത് വൈഭവെന്ന് കോലി
ന്യൂഡൽഹി: വിരാട് കോലിക്ക് ഒരു ഐ.പി.എൽ. കിരീടം നേടാൻ 18 വർഷമാണ് കാത്തിരിക്കേണ്ടിവന്നത്. പക്ഷേ, കഴിഞ്ഞ രണ്ടുവർഷത്തിനിടെ രണ്ട് ഐ.പി.എൽ. കിരീടങ്ങൾ നേടി. 37- വയസ്സിലും കളി മെച്ചപ്പെടുത്തുന്നതിൽ ശ്രദ്ധ കേന്ദ്രീകരിക്കുന്ന കോലി, റോയൽ ചലഞ്ചേഴ്സ് ബംഗളൂരുവിനായി കരിയറിലെ ഏറ്റവും വേഗമേറിയ ടി20 അർധസെഞ്ചുറി കുറിച്ചുകൊണ്ടാണ് ഇത്തവണ ടീമിനെ വിജയത്തിലേക്ക് നയിച്ചത്.
ഫൈനലിൽ കോലി പുറത്താകാതെ നേടിയ 75 റൺസാണ് ആർ.സി.ബി.യുടെ രണ്ടാം ഐ.പി.എൽ. കിരീടനേട്ടത്തിന് വഴിവെച്ചത്. കിരീടം നേടിക്കൊടുക്കുന്ന ഇന്നിങ് റൺസ് അടിക്കുക എന്നത് വലിയൊരു സ്വപ്നമായിരുന്നുവെന്നും ഈ നിമിഷത്തെക്കുറിച്ച് ഒരുപാട് തവണ ചിന്തിച്ചിട്ടുണ്ടെന്നും മത്സരശേഷം കോലി സന്തോഷത്തോടെ പങ്കുവെച്ചു. സീസണിൽ തന്റെ കളിശൈലി മാറ്റാൻ പ്രേരിപ്പിച്ചത് 15 വയസ്സുകാരനായ വൈഭവ് സൂര്യവംശിയെപ്പോലുള്ള യുവതാരങ്ങളുടെ സാന്നിധ്യമാണെന്നും അദ്ദേഹം കൂട്ടിച്ചേർത്തു.
വെറും 25 പന്തിൽനിന്ന് അർധസെഞ്ചുറി നേടിയതിനെക്കുറിച്ച് ചോദിച്ചപ്പോൾ, താൻ ഇപ്പോഴും ക്രിക്കറ്റിലെ ഒരു വിദ്യാർഥിയാണെന്ന് കോലി സൂചിപ്പിച്ചു. യുവതാരങ്ങൾ കളിയിൽ വലിയ വെല്ലുവിളി ഉയർത്തുന്നുണ്ട്. അതുകൊണ്ടുതന്നെ 37-ാം വയസ്സിലും കളിശൈലിക്ക് പകരം ചിന്താഗതിക്ക് മാറ്റംവരുത്തി. ബൗളർമാരെ കൂടുതൽ ആക്രമിച്ചുകളിച്ച് റൺസ് കണ്ടെത്താൻ ഇത് തന്നെ സഹായിച്ചെന്നും കോലി വ്യക്തമാക്കി.
സീസണിൽ ടീമിലെ എല്ലാവരും ഒന്നിനൊന്ന് മികച്ച പ്രകടനം പുറത്തെടുത്തുവെന്നും കോലി പറഞ്ഞു. ആദ്യത്തെ 10 മത്സരങ്ങളിൽ എട്ട് വ്യത്യസ്ത കളിക്കാരാണ് മാൻ ഓഫ് ദി മാച്ച് പുരസ്കാരം നേടിയത്. ജോഷ് ഹേസൽവുഡ്, ഭുവനേശ്വർ കുമാർ, ജേക്കബ് ഡഫി, ക്രുണാൽ പാണ്ഡ്യ, രസിഖ് സലാം ദാർ തുടങ്ങിയ ലോകോത്തര ബൗളർമാരുടെ പ്രകടനം ടീമിന് വലിയ ആത്മവിശ്വാസം നൽകിയതായും അദ്ദേഹം ഓർമ്മിപ്പിച്ചു.
ഗുജറാത്ത് ടൈറ്റൻസിന്റെ ഹോം ഗ്രൗണ്ടായ നരേന്ദ്ര മോദി സ്റ്റേഡിയത്തിലാണ് ഫൈനൽ നടന്നതെങ്കിലും, അവിടെയുണ്ടായിരുന്ന കാണികളിൽ ബഹുഭൂരിഭാഗവും ആർ.സി.ബി.യെയാണ് പിന്തുണച്ചത്. തങ്ങൾക്ക് 7 ഹോം മത്സരങ്ങളല്ല, മറിച്ച് 14 ഹോം മത്സരങ്ങൾ ഉള്ളതുപോലെയാണ് തോന്നിയതെന്നും, ആരാധകരുടെ ഈ വലിയ പിന്തുണയ്ക്ക് കടപ്പെട്ടിരിക്കുന്നുവെന്നും നന്ദിയോടെ കോലി കൂട്ടിച്ചേർത്തു.
Content Highlights: Virat Kohli hits career-fastest T20 fifty in 2026 IPL final., RCB secures second consecutive IPL title