അർഷ്ദീപിനെതിരേ ഷമാറിന്റെ ബൗൺസറുകൾ, പിന്നാലെ പരിക്ക്, ഇന്നിങ്‌സ് ഡിക്ലയർ ചെയ്ത് ശ്രേയസ്, വിമർശനം

ഹൈദരാബാദ്: ഇന്ത്യയ്‌ക്കെതിരായ നാലാം ടി20 മത്സരത്തിലെ വിജയത്തിനു പിന്നാലെ വെസ്റ്റ് ഇൻഡീസ് ടീമിന്റെ സ്‌പോർട്‌സ്മാൻ സ്പിരിറ്റിനെതിരേ വിമർശനം രൂക്ഷം. മത്സരത്തിന്റെ അവസാന ഓവറിൽ ഇന്ത്യൻ താരം അർഷ്ദീപ് സിങ്ങിനെതിരേ വെസ്റ്റ് ഇൻഡീസ് പേസർ ഷമാർ ജോസഫ് തുടർച്ചയായി ബൗൺസറുകൾ എറിയുകയും പന്ത് ദേഹത്ത് തട്ടി താരത്തിന് പരിക്കേൽക്കുകയും ചെയ്തതാണ് വലിയ വിമർശനത്തിന് കാരണമായത്.

മത്സരം വിൻഡീസ് 24 റൺസിന് വിജയിച്ചിരുന്നു. എന്നാൽ അവസാന ഓവറിലെ അവരുടെ പെരുമാറ്റം സ്‌പോർട്‌സ്മാൻ സ്പിരിറ്റിന് നിരക്കാത്തതാണെന്ന് മുൻ താരങ്ങളടക്കം വിമർശനമുയർത്തി.

ഇന്ത്യക്ക് ജയിക്കാൻ അവസാന ഓവറിൽ 35 റൺസ് വേണമെന്നിരിക്കെ, ഒമ്പത് വിക്കറ്റും നഷ്ടപ്പെട്ട് തോൽവി ഉറപ്പായ ഘട്ടത്തിലാണ് ഷമാർ ജോസഫ്, അർഷ്ദീപിന്റെ ശരീരത്തിനു നേർക്ക് പന്തെറിഞ്ഞത്. അതിലൊരു പന്ത് തോളിലിടിച്ച് കടുത്ത വേദന കാരണം അർഷ്ദീപ് ക്രീസിൽ വീഴുകയും ചെയ്തു. ഫിസിയോമാർ എത്തി പരിശോധിച്ച ശേഷം താരം ബാറ്റിങ് തുടർന്നു. എന്നാൽ തുടർന്നും ഷമാർ ജോസഫ് ഷോർട്ട് ബോളെറിഞ്ഞു. ഇതോടെ വിൻഡീസ് ബൗളറുടെ കായികമര്യാദയ്ക്ക് നിരക്കാത്ത പെരുമാറ്റത്തിൽ പ്രതിഷേധിച്ച് മൂന്നു പന്തുകൾ ബാക്കിനിൽക്കെ ഇന്ത്യൻ ക്യാപ്റ്റൻ ശ്രേയസ് അയ്യർ അർഷ്ദീപിനോട് തിരികെ വരാൻ ആവശ്യപ്പെടുകയും ഇന്നിങ്‌സ് ഡിക്ലയർ ചെയ്യുകയുമായിരുന്നു. ടി20 മത്സരത്തിൽ പന്തുകൾ ബാക്കിനിൽക്കെ ഒരു ക്യാപ്റ്റൻ ഇന്നിങ്‌സ് ഡിക്ലയർ ചെയ്യുന്നത് അങ്ങേയറ്റം അപൂർവമായ സംഭവമാണ്.

ഈ സമയം കമന്ററി ബോക്‌സിലുണ്ടായിരുന്ന മുൻ ഇന്ത്യൻ ക്യാപ്റ്റൻ സുനിൽ ഗവാസ്‌കർ ഈ പെരുമാറ്റത്തെ രൂക്ഷമായി വിമർശിച്ചു. സ്റ്റമ്പുകൾ മുന്നിലുള്ളപ്പോൾ എന്തിനാണ് ബാറ്ററെ ലക്ഷ്യം വെച്ച് പന്തെറിയുന്നതെന്ന് അദ്ദേഹം ചോദിച്ചു.

Content Highlights: West Indies bowler Shamar Joseph bowled successive bouncers targeting Arshdeep Singh in the final over., Arshdeep sustained an injury on his shoulder after being hit by a delivery., Indian captain Shreyas Iyer protested the lack of sportsmanship and declared the innings with three balls remaining., Former Indian captain Sunil Gavaskar strongly criticized the West Indies team's tactics.