ഇന്ത്യയ്ക്കെതിരായ ടി20 പരമ്പര; ലോക്കി ഫെർഗൂസനും മാറ്റ് ഹെൻറിയും പുറത്ത്, കിവീസിന് കനത്ത തിരിച്ചടി

വെല്ലിങ്ടൺ: ഇന്ത്യയ്ക്കെതിരായ അഞ്ച് മത്സരങ്ങളുടെ ടി20 പരമ്പരയിലെ ആദ്യ മൂന്ന് മത്സരങ്ങളും തോറ്റ് തിരിച്ചടി നേരിടുന്ന ന്യൂസീലൻഡ് ടീമിന് വീണ്ടും പ്രഹരം. മുൻനിര ഫാസ്റ്റ് ബൗളർമാരായ ലോക്കി ഫെർഗൂസനും മാറ്റ് ഹെൻറിയും പരിക്കിനെ തുടർന്ന് പരമ്പരയിലെ ശേഷിക്കുന്ന രണ്ട് മത്സരങ്ങളിൽ നിന്ന് പുറത്തായി. അഞ്ച് മത്സരങ്ങളടങ്ങിയ ടി20 പരമ്പരയിലെ ആദ്യ മൂന്ന് മത്സരങ്ങളും വിജയിച്ച് ഇന്ത്യ പരമ്പര സ്വന്തമാക്കിയിരുന്നു. ഈ സാഹചര്യത്തിലാണ് കിവീസ് പടയ്ക്ക് വീണ്ടും തിരിച്ചടി നേരിട്ടിരിക്കുന്നത്.

ക്രൈസ്റ്റ്ചർച്ചിൽ നടന്ന രണ്ടാം ടി20 മത്സരത്തിനിടെയാണ് ലോക്കി ഫെർഗൂസന് വലതുകാലിലെ പേശിക്ക് പരിക്കേറ്റത്. മാറ്റ് ഹെൻറിക്ക് വലതു തുടയിലെ പേശിക്കാണ് പരിക്കേറ്റത്. ലോക്കി ഫെർഗൂസന് ചുരുങ്ങിയത് ഒരാഴ്ചയെങ്കിലും വിശ്രമം വേണ്ടിവരും. മാറ്റ് ഹെന്റി സുഖം പ്രാപിക്കാൻ രണ്ടാഴ്ച വരെ സമയമെടുക്കും.

ഇതോടെ അവസാന രണ്ട് ടി20 മത്സരങ്ങൾക്കായി ന്യൂസീലൻഡ് ടീമിലേക്ക് പേസർ മാറ്റ് ഫിഷറിനെ പകരക്കാരനായി വിളിച്ചിട്ടുണ്ട്. നവംബർ നാലിന് ആരംഭിക്കുന്ന ഏകദിന പരമ്പരയിൽ ഇരു കളിക്കാർക്കും പൂർണ കായികക്ഷമത വീണ്ടെടുത്ത് തിരിച്ചെത്താനാകുമെന്ന പ്രതീക്ഷയിലാണ് ന്യൂസീലൻഡ്.

പ്രധാന കളിക്കാർക്ക് പരിക്കേറ്റതിൽ നിരാശയുണ്ടെന്ന് ന്യൂസീലൻഡ് പരിശീലകൻ റോബ് വാൾട്ടർ വ്യക്തമാക്കി. പരിക്കുകൾ അന്താരാഷ്ട്ര ക്രിക്കറ്റിന്റെ ഭാഗമാണെങ്കിലും മത്സരങ്ങൾ നഷ്ടമാകുന്നത് പ്രയാസകരമാണെന്നും, വരാനിരിക്കുന്ന ഏകദിന പരമ്പരയിൽ ഇരുവരും പ്രധാന പങ്ക് വഹിക്കുമെന്ന് പ്രതീക്ഷിക്കുന്നതായും അദ്ദേഹം കൂട്ടിച്ചേർത്തു.

Content Highlights: Lockie Ferguson and Matt Henry ruled out of remaining T20 matches against India due to injuries., Ferguson suffers a right calf strain and Henry sustains a right thigh muscle injury., Matt Fisher has been named as a replacement in the New Zealand squad for the final two T20s., Both players are expected to recover in time for the upcoming ODI series starting November 4.