ധ്രുവ് ജുറെലിന്റെ സെഞ്ചുറി മികവിൽ 500 കടന്ന് ഇന്ത്യ; ഇന്നിങ്‌സ് ഡിക്ലയർ ചെയ്തു

കൊളംബോ: ശ്രീലങ്കയ്ക്കെതിരായ രണ്ടാം ടെസ്റ്റിന്റെ ഒന്നാം ഇന്നിങ്‌സ് ഡിക്ലയർ ചെയ്ത് ഇന്ത്യ. സെഞ്ചുറി നേടിയ ധ്രുവ് ജുറെലിന്റെ മികവിൽ ഒമ്പത് വിക്കറ്റ് നഷ്ടത്തിൽ 503 റൺസാണ് ഇന്ത്യ അടിച്ചെടുത്തത്. 177 പന്തിൽ ഒമ്പത് ഫോറും രണ്ട് സിക്‌സറും സഹിതം 115 റൺസുമായി ധ്രുവ് പുറത്താകാതെ നിന്നു. താരത്തിന്റെ കരിയറിലെ രണ്ടാം ടെസ്റ്റ് സെഞ്ചുറിയാണിത്.

മറുപടി ബാറ്റിങ്ങിൽ ശ്രീലങ്കയുടെ രണ്ട് വിക്കറ്റുകൾ നഷ്ടമായി. രണ്ടാം ദിനം കളി അവസാനിക്കുമ്പോൾ രണ്ട് വിക്കറ്റ് നഷ്ടത്തിൽ എട്ട് റൺസ് എന്ന നിലയിലാണ് ആതിഥേയർ. ഒരു റണ്ണെടുത്ത ലാഹിരു ഉദാരയെ പ്രസിദ്ധ് കൃഷ്ണയും രണ്ട് റൺസെടുത്ത പ്രഭാത് ജയസൂര്യയെ മാനവ് സുതാറും പുറത്താക്കി.

അഞ്ച് വിക്കറ്റ് നഷ്ടത്തിൽ 300 റൺസ് എന്ന നിലയിൽ രണ്ടാം ദിനം ബാറ്റിങ് തുടങ്ങിയ ഇന്ത്യക്ക് ഏഴ് റൺസെടുക്കുന്നതിനിടയിൽ ആദ്യ വിക്കറ്റ് നഷ്ടമായി. ആറ് റൺസെടുത്ത അരങ്ങേറ്റ താരം സാരാംശ് ജെയ്നെ അസിത ഫെർണാണ്ടോ പുറത്താക്കുകയായിരുന്നു. പിന്നീട് ക്രീസിലെത്തിയത് ഋഷഭ് പന്താണ്. നേരത്തെ ആദ്യ ദിനം ബാറ്റിങ് തുടങ്ങിയ പന്ത് പരിക്കിനെ തുടർന്ന് ഗ്രൗണ്ട് വിട്ടിരുന്നു. തിരിച്ചെത്തിയ താരം ഫോമിൽ ബാറ്റ് വീശുകയും ഏഴാം വിക്കറ്റിൽ ജുറെലുമായി ചേർന്ന് 112 റൺസ് കൂട്ടുകെട്ടുണ്ടാക്കുകയും ചെയ്തു.

89 പന്തിൽ ആറ് ഫോറും രണ്ട് സിക്സും സഹിതം 63 റൺസെടുത്ത പന്തിനെ പുറത്താക്കി കേശര നുവാന്തയാണ് ഈ കൂട്ടുകെട്ട് പൊളിച്ചത്. പിന്നാലെ ക്രീസിലെത്തിയ മാനവ് സുതാറിനും അധികം ആയുസുണ്ടായില്ല. 51 പന്ത് നേരിട്ട് 18 റൺസ് അടിച്ച സുതാറിനെ പ്രഭാത് ജയസൂര്യ പുറത്താക്കി. പിന്നീട് സിറാജും ധ്രുവുമായിരുന്നു ക്രീസിൽ. ഇതിനിടയിൽ മഴ വന്നതോടെ മത്സരം നിർത്തിവെച്ചു. കളി പുനരാരംഭിച്ച ശേഷമാണ് ധ്രുവ് സെഞ്ചുറിയിലെത്തിയത്. ഇരുവരും ചേർന്ന് ഒമ്പതാം വിക്കറ്റിൽ 31 റൺസ് കൂട്ടുകെട്ടുണ്ടാക്കി. 29 പന്തിൽ മൂന്ന് റൺസെടുത്ത സിറാജിനെ പ്രഭാത് ജയസൂര്യ പുറത്താക്കി. ഏഴ് പന്തിൽ നാല് റൺസോടെ പ്രസിദ്ധ് കൃഷ്ണ പുറത്താകാതെ നിന്നു.

ആദ്യ ദിനം സെഞ്ചുറി നേടിയ ദേവ്ദത്ത് പടിക്കലാണ് ഇന്ത്യയുടെ ബാറ്റിങ്ങിൽ മികച്ചുനിന്നത്. തുടർച്ചയായി രണ്ടാം ടെസ്റ്റിലും സെഞ്ചുറി നേടിയ ദേവ്ദത്ത് 193 പന്തിൽ 117 റൺസാണ് അടിച്ചെടുത്തത്. 12 ബൗണ്ടറിയുടെ അകമ്പടിയോടെയായിരുന്നു ഈ ഇന്നിങ്സ്. ക്യാപ്റ്റൻ ഗില്ലും ദേവ്ദത്തും ചേർന്ന് മൂന്നാം വിക്കറ്റിൽ നേടിയ 120 റൺസും ഇന്ത്യയുടെ ഇന്നിങ്സിൽ നിർണായകമായി. ഗിൽ അർദ്ധ സെഞ്ചുറി പൂർത്തിയായതിന് പിന്നാലെ പുറത്തായി. യശസ്വി ജയ്സ്വാൾ 45ഉം രവീന്ദ്ര ജഡേജ 43ഉം റൺസെടുത്ത് പുറത്തായി. ദേവ്ദത്തും ജഡേജയും ചേർന്ന് നാലാം വിക്കറ്റിൽ 74 റൺസ് കൂട്ടിച്ചേർത്തു. 18 റൺസായിരുന്നു കെ.എൽ രാഹുലിന്റെ സംഭാവന. ശ്രീലങ്കയ്ക്കായി അസിത ഫെർണാണ്ടോ നാലും കേശര നുവാന്ത, പ്രഭാത് ജയസൂര്യ എന്നിവർ രണ്ട് വീതവും വിക്കറ്റെടുത്തു. ലാഹിരു കുമാര ഒരു വിക്കറ്റും വീഴ്ത്തി.

Content Highlights: Saransh Jain dismissed early on Day 2 of the second Test against Sri Lanka., Rishabh Pant returned to the crease after recovering from an injury., Devdutt Padikkal scored a brilliant century (117 runs) in consecutive tests., Asitha Fernando took four wickets for Sri Lanka.