അന്താരാഷ്ട്ര ക്രിക്കറ്റിൽ നിന്ന് വിരമിച്ച് ഗ്ലെൻ മാക്‌സ്‌വെൽ; 14 വർഷത്തെ ഐതിഹാസിക കരിയറിന് തിരശ്ശീല
കാൻബറ: ഓസ്‌ട്രേലിയയുടെ സൂപ്പർ ഓൾറൗണ്ടർ ഗ്ലെൻ മാക്‌സ്‌വെൽ അന്താരാഷ്ട്ര ക്രിക്കറ്റിൽ നിന്ന് വിരമിച്ചു. ക്രിക്കറ്റിന്റെ എല്ലാ ഫോർമാറ്റുകളിൽ നിന്നും വിരമിക്കുന്നതായാണ് താരം അറിയിച്ചിരിക്കുന്നത്. 14 വർഷം നീണ്ടുനിന്ന തിളക്കമാർന്ന അന്താരാഷ്ട്ര കരിയറിനാണ് 38-കാരനായ മാക്‌സ്‌വെൽ വിരാമമിടുന്നത്. അവിശ്വസനീയമായ ഷോട്ട് സെലക്ഷനുകളിലൂടെയും തനതായ ബാറ്റിങ് ശൈലിയിലൂടെയും ലോകമെമ്പാടുമുള്ള ക്രിക്കറ്റ് ആരാധകരെ രസിപ്പിച്ച മാക്‌സ്‌വെൽ, ഓസ്‌ട്രേലിയൻ ക്രിക്കറ്റ് ചരിത്രത്തിലെ ഏറ്റവും മികച്ച മാച്ച് വിന്നർമാരിൽ ഒരാളായാണ് പടിയിറങ്ങുന്നത്.
ഓസ്‌ട്രേലിയക്കായി ഏഴു ടെസ്റ്റുകളും 149 ഏകദിനങ്ങളും 130 ടി20 മത്സരങ്ങളും അദ്ദേഹം കളിച്ചിട്ടുണ്ട്. ഏകദിനത്തിൽ 3,990 റൺസും ടി20-യിൽ 2,897 റൺസും ടെസ്റ്റിൽ 339 റൺസുമാണ് സമ്പാദ്യം. ഓഫ് സ്പിന്നറായ താരം മൂന്ന് ഫോർമാറ്റുകളിലുമായി ആകെ 136 അന്താരാഷ്ട്ര വിക്കറ്റുകളും വീഴ്ത്തിയിട്ടുണ്ട്.
ടീം മാനേജ്മെന്റുമായി നടത്തിയ ചർച്ചകൾക്ക് ശേഷമാണ് ഈ തീരുമാനമെടുത്തതെന്ന് 'ദി ഫൈനൽ വേഡ്' പോഡ്കാസ്റ്റിൽ മാക്‌സ്‌വെൽ വ്യക്തമാക്കി. മെൽബൺ ക്രിക്കറ്റ് ഗ്രൗണ്ടിൽ വെച്ച് ഒരു യാത്രയയപ്പ് മത്സരം കളിക്കാൻ ആഗ്രഹിച്ചിരുന്നെങ്കിലും, 2028 ഒളിമ്പിക്സ് ഉൾപ്പെടെയുള്ള ഭാവി ലക്ഷ്യമിട്ട് പുതിയ യുവതാരങ്ങൾക്ക് അവസരം നൽകാനുള്ള മാനേജ്മെന്റിന്റെ തീരുമാനത്തെ പൂർണമായി മനസ്സിലാക്കുന്നുവെന്ന് അദ്ദേഹം പറഞ്ഞു.
2012 ഓഗസ്റ്റ് 25-ന് ഷാർജയിൽ അഫ്ഗാനിസ്താനെതിരായ ഏകദിന മത്സരത്തിലൂടെയാണ് മാക്‌സ്‌വെൽ അന്താരാഷ്ട്ര അരങ്ങേറ്റം കുറിക്കുന്നത്. അതേ വർഷം സെപ്റ്റംബറിൽ ദുബായിൽ പാകിസ്താനെതിരേ ടി20 അരങ്ങേറ്റവും 2013 മാർച്ച് മാസത്തിൽ ഹൈദരാബാദിൽ ഇന്ത്യക്കെതിരേ ടെസ്റ്റ് ക്യാപ്പും അദ്ദേഹം സ്വന്തമാക്കി. ഓസ്‌ട്രേലിയൻ ക്രിക്കറ്റ് ടീമിന്റെ പ്രതാപകാലത്തെ പ്രധാന കണ്ണിയായിരുന്ന മാക്‌സ്‌വെൽ, 2015 ഏകദിന ലോകകപ്പ്, 2021 ട്വന്റി20 ലോകകപ്പ്, 2023 ഏകദിന ലോകകപ്പ് എന്നിവ നേടിയ ഓസീസ് ടീമിൽ അംഗമായിരുന്നു.
വാങ്കഡെയിലെ ഐതിഹാസിക ഇന്നിങ്‌സ്
മാക്‌സ്‌വെല്ലിന്റെ കരിയറിലെ ഏറ്റവും അവിസ്മരണീയമായ പ്രകടനം 2023-ലെ ഏകദിന ലോകകപ്പിൽ അഫ്ഗാനിസ്താനെതിരേ മുംബൈയിലെ വാങ്കഡെ സ്റ്റേഡിയത്തിൽ പിറന്നതാണ്. ഓസ്‌ട്രേലിയൻ ക്രിക്കറ്റ് ചരിത്രത്തിലെ തന്നെ ഏറ്റവും മികച്ച രക്ഷാപ്രവർത്തനങ്ങളിലൊന്നായിരുന്നു അത്.
292 റൺസ് ലക്ഷ്യം പിന്തുടർന്ന ഓസ്‌ട്രേലിയ 91 റൺസിന് 7 വിക്കറ്റ് എന്ന നിലയിൽ തോൽവിയുടെ നിഴലിലായിരുന്നു. എന്നാൽ കഠിനമായ പേശിവലവും ശാരീരിക അസ്വസ്ഥതകളും കാരണം ഓടാൻ പോലും സാധിക്കാത്ത അവസ്ഥയിലും മാക്‌സ്‌വെൽ ക്രീസിൽ ഉറച്ചുനിന്നു. 128 പന്തിൽ നിന്ന് 21 ഫോറുകളും 10 സിക്‌സറുകളും ഉൾപ്പെടെ പുറത്താകാതെ 201* റൺസാണ് അദ്ദേഹം അടിച്ചുകൂട്ടിയത്.
ക്യാപ്റ്റൻ പാറ്റ് കമ്മിൻസുമൊത്ത് (12*) 202 റൺസിന്റെ കൂട്ടുകെട്ടുണ്ടാക്കിയ മാക്‌സ്‌വെൽ, 19 പന്തുകൾ ബാക്കിനിൽക്കെയുമാണ് അന്ന് ഓസ്‌ട്രേലിയയെ വിജയത്തിലെത്തിച്ചത്. ഏകദിന ക്രിക്കറ്റിൽ ഇരട്ട സെഞ്ചുറി നേടുന്ന ആദ്യ ഓസ്‌ട്രേലിയൻ പുരുഷ താരമായും മാക്‌സ്‌വെൽ മാറി. ഈ വിജയത്തിന്റെ കരുത്തിൽ മുന്നേറിയ ഓസ്‌ട്രേലിയ ഫൈനലിൽ ഇന്ത്യയെ തോൽപ്പിച്ച് ലോകകപ്പ് കിരീടം ചൂടുകയും ചെയ്തു.
എന്നാൽ കഴിഞ്ഞ കുറച്ചുകാലമായി ഓസ്‌ട്രേലിയൻ ടീമിലെ മാക്‌സ്‌വെല്ലിന്റെ സാന്നിധ്യം കുറഞ്ഞുവരികയായിരുന്നു. 2025 ജൂണിൽ ദുബായിൽ ഇന്ത്യക്കെതിരായ ചാമ്പ്യൻസ് ട്രോഫി സെമിഫൈനലോടെ അദ്ദേഹം ഏകദിന ക്രിക്കറ്റിൽ നിന്ന് വിരമിച്ചിരുന്നു. നിരന്തരമായ പരിക്കുകളും ഫോർമാറ്റിന്റെ ശാരീരിക അധ്വാനവുമാണ് ഏകദിനത്തിൽ നിന്ന് പിന്മാറാൻ അദ്ദേഹത്തെ പ്രേരിപ്പിച്ചത്.
തുടർന്ന് 2026 ഏപ്രിലിൽ ക്രിക്കറ്റ് ഓസ്‌ട്രേലിയ പ്രഖ്യാപിച്ച 2026-27 സീസണിലേക്കുള്ള സെൻട്രൽ കരാർ പട്ടികയിൽ നിന്നും മാക്‌സ്‌വെൽ ഒഴിവാക്കപ്പെട്ടു. 2026 മെയ്-ജൂൺ മാസങ്ങളിൽ നടന്ന ബംഗ്ലാദേശ് പര്യടനത്തിനുള്ള ടി20 ടീമിലും അദ്ദേഹത്തിന് ഇടം ലഭിച്ചിരുന്നില്ല. 2026 ഫെബ്രുവരി 20-ന് ടി20 ലോകകപ്പ് സൂപ്പർ എട്ട് പോരാട്ടത്തിൽ ഒമാനെതിരെയായിരുന്നു മാക്‌സ്‌വെൽ അവസാനമായി ഓസ്‌ട്രേലിയൻ ജേഴ്‌സി അണിഞ്ഞത്.
അന്താരാഷ്ട്ര ക്രിക്കറ്റിൽ നിന്ന് പിന്മാറിയെങ്കിലും ലോകമെമ്പാടുമുള്ള വിവിധ ടി20 ഫ്രാഞ്ചൈസി ലീഗുകളിൽ മാക്‌സ്‌വെൽ കളി തുടരും. ബിഗ് ബാഷ് ലീഗിൽ മെൽബൺ സ്റ്റാഴ്‌സുമായി 2026-27 സീസണിന്റെ അവസാനം വരെ അദ്ദേഹത്തിന് നിലവിൽ കരാറുണ്ട്.
Content Highlights: Glenn Maxwell has announced his retirement from all formats of international cricket, ending a 14-year career., He represented Australia in 7 Tests, 149 ODIs, and 130 T20Is, scoring over 7,000 runs and taking 136 wickets., He was a key member of Australia's 2015 and 2023 ODI World Cup winning squads, as well as the 2021 T20 World Cup winning team., He plans to continue playing in global T20 franchise leagues, including the Big Bash League.