തിരിച്ചടിച്ച് ബംഗ്ലാദേശ്, ആദ്യദിനം വീഴ്ത്തിയത് ഓസീസിന്റെ എട്ടുവിക്കറ്റുകൾ

മക്കായ്: ആദ്യ ടെസ്റ്റിലെ ചരിത്രവിജയത്തിന്റെ പകിട്ടുമായി ഓസീസിനെതിരേ രണ്ടാം ടെസ്റ്റിനിറങ്ങിയ ബംഗ്ലാദേശ് പൊരുതുന്നു. ആദ്യ ഇന്നിങ്സിൽ വെറും 64 റൺസിന് പുറത്തായ ബംഗ്ലാദേശ് ഓസീസിന്റെ എട്ടുവിക്കറ്റുകൾ പിഴുത് തിരിച്ചടിച്ചു. ആദ്യദിനം കളിയവസാനിക്കുമ്പോൾ എട്ടുവിക്കറ്റ് നഷ്ടത്തിൽ 165 റൺസെന്ന നിലയിലാണ് ഓസ്ട്രേലിയ. ഓസീസ് നിരയിൽ മിച്ചൽ സ്റ്റാർക്ക് ആറുവിക്കറ്റുമായി തിളങ്ങിയപ്പോൾ ബംഗ്ലാദേശിനായി ഷൊറിഫുൾ ഇസ്ലാമും ആറുവിക്കറ്റെടുത്തു.

64 റൺസിന് തങ്ങളെ പുറത്താക്കിയ ഓസ്‌ട്രേലിയയ്ക്ക് അതേ നാണയത്തിൽ മറുപടി നൽകുന്ന ബംഗ്ലാദേശിനെയാണ് ആദ്യദിനം കണ്ടത്. സ്റ്റീവൻ സ്മിത്ത്, കാമറൂൺ ഗ്രീൻ എന്നിവർക്ക് മാത്രമാണ് അൽപ്പമെങ്കിലും പിടിച്ചുനിൽക്കാനായില്ല. സ്മിത്ത് 42 റൺസെടുത്ത് പുറത്തായപ്പോൾ ഗ്രീൻ അർധസെഞ്ചുറിയുമായി പുറത്താകാതെ നിന്നു. ട്രാവിസ് ഹെഡ് 22 റൺസെടുത്തു. മറ്റ് ബാറ്റർമാരെല്ലാം നിരനിരയായി കൂടാരം കയറി. മാറ്റ് റെൻഷാ (8), മാർനസ് ലബുഷെയ്ൻ (4), അലക്‌സ് കാരി (5), വെബ്‌സറ്റർ (0), പാറ്റ് കമ്മിൻസ് (0) എന്നിവർ നിരാശപ്പെടുത്തി. ഗ്രീനും (51) നേതൻ ലിയോണുമാണ് (10) ക്രീസിൽ.

നേരത്തേ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ബംഗ്ലാദേശിന് ആദ്യ പന്തിൽ തന്നെ ഓപ്പണർ ഷാഡ്മാൻ ഇസ്ലാമിനെ നഷ്ടമായി. സ്റ്റാർക്കാണ് താരത്തെ പുറത്താക്കിയത്. മൂന്നാം ഓവറിൽ വീണ്ടുമെത്തിയ സ്റ്റാർക്ക് ഓവറിൽ രണ്ട് വിക്കറ്റുകളും പിഴുതു. ആദ്യ പന്തിൽ തൻസിദ് ഹസനും രണ്ടാം പന്തിൽ നായകൻ നജ്മുൾ ഹൊസ്സൈൻ ഷാന്റോയും. ഇരുവർക്കും റണ്ണൊന്നുമെടുക്കാനായില്ല. അവിടെയും സ്റ്റാർക്ക് നിർത്തിയില്ല. മൂർച്ച കൂട്ടിയെത്തിയ സ്റ്റാർക്കിന്റെ പന്തുകൾ തുടർച്ചയായി ബംഗ്ലാദേശ് ബാറ്റർമാർക്ക് വെല്ലുവിളി സൃഷ്ടിച്ചു. അഞ്ചാം ഓവറിൽ മൊമിനുൾ വെറും ഒൻപത് റൺസ് മാത്രമെടുത്ത് പുറത്തായി. അഞ്ചോവർ പിന്നിടുമ്പോൾ നാല് വിക്കറ്റ് നഷ്ടത്തിൽ പത്ത് റൺസെന്ന നിലയിലായിരുന്നു ബംഗ്ലാദേശ്.

ഏഴാം ഓവറിൽ ലിട്ടൺ ദാസ് സ്റ്റാർക്കിന് മുന്നിലും പിന്നാലെ മുഷ്ഫിഖർ റഹിം പാറ്റ് കുമ്മിൻസിന് മുന്നിലും വീണു. ലിട്ടൺ ദാസ് ഡക്കായി മടങ്ങിയപ്പോൾ മുഷ്ഫിഖർ അഞ്ച് റൺസ് മാത്രമെടുത്ത് പുറത്തായി. 16 ഓവറിൽ 23-6 എന്ന നിലയിലേക്ക് ബംഗ്ലാദേശ് കൂപ്പുകുത്തി. മെഹ്ദി ഹസനും ഹസൻ മഹ്‌മുദും ഏഴാം വിക്കറ്റിൽ ചെറുത്തുനിൽപ്പിനുള്ള ശ്രമങ്ങൾ ആരംഭിച്ചു. എന്നാൽ അധികനേരം പിടിച്ചുനിൽക്കാനായില്ല. 15 റൺസ് കൂട്ടുകെട്ട് മാത്രം പടുത്തുയർത്തി ഇരുവരും പിരിഞ്ഞു. മെഹ്ദി ഹസൻ 11 റൺസും ഹസൻ മഹ്‌മുദ് 10 റൺസുമാണെടുത്തത്. തയ്ജുൾ ഇസ്ലാമും ഷൊറിഫുൾ ഇസ്ലാമും പത്താം വിക്കറ്റിൽ 25 റൺസ് കൂട്ടുകെട്ട് പടുത്തുയർത്തിയതോടെ സ്‌കോർ 64 ലെത്തി.

മിച്ചൽ സ്റ്റാർക്കാണ് ആറുവിക്കറ്റുമായി ബംഗ്ലാദേശ് ബാറ്റിങ്ങിന്റെ നടുവൊടിച്ചത്. പത്തോവറിൽ വെറും 12 റൺസ് മാത്രം വിട്ടുകൊടുത്താണ് സ്റ്റാർക്ക് ആറു വിക്കറ്റെടുത്തത്. ജോഷ് ഹേസൽവുഡ് ഒരു വിക്കറ്റും പാറ്റ് കമ്മിൻസ് മൂന്നു വിക്കറ്റുമെടുത്തു. ബംഗ്ലാദേശ് നിരയിൽ നാലുപേർ ഡക്കായി മടങ്ങി.

Content Highlights: Bangladesh bundled out for 64 runs in the first innings., Mitchell Starc starred with 6 wickets for just 12 runs., Pat Cummins took 3 wickets to dismantle the batting lineup., Four Bangladeshi batsmen were dismissed for ducks.