നാല് വർഷത്തെ കാത്തിരിപ്പ്, സെഞ്ചുറിക്ക് അരികെ റൺഔട്ടായി; വിശ്വസിക്കാനാകാതെ ബാബർ അസം

ട്രിനിഡാഡ്: നാല് വർഷത്തെ കാത്തിരിപ്പിനൊടുവിൽ ഒരു ടെസ്റ്റ് സെഞ്ചുറി എന്ന പാക് താരം ബാബർ അസമിന്റെ സ്വപ്‌നം തട്ടിത്തെറിപ്പിച്ച് ഒരു റൺഔട്ട്. ട്രിനിഡാഡിൽ നടക്കുന്ന വെസ്റ്റിൻഡീസിനെതിരായ രണ്ടാം ടെസ്റ്റിന്റെ മൂന്നാം ദിവസമായിരുന്നു ഈ നിർഭാഗ്യകരമായ സംഭവം. ആ സമയത്ത് പാക് ക്യാപ്റ്റൻ കൂടിയായ ബാബർ അസം 88 റൺസിലെത്തിയിരുന്നു.

നോൺ സ്‌ട്രൈക്കർ എൻഡിലുണ്ടായിരുന്ന ബാറ്റർ അബ്ദുല്ല ഷഫീഖുമായുള്ള ആശയക്കുഴപ്പമാണ് റൺഔട്ടിലേക്ക് നയിച്ചത്. പന്ത് ഓഫ്‌സൈഡിലേക്ക് തട്ടിയിട്ട് റണ്ണിനായി ബാബർ ഓടിയെങ്കിലും അബ്ദുല്ല ഷഫീഖ് ഓടിയശേഷം പിന്നീട് തിരിച്ചോടുകയായിരുന്നു. ഇതോടെ ബാബറും തിരിഞ്ഞോടി. എന്നാൽ ക്രീസിലെത്തും മുമ്പ് വെസ്റ്റിൻഡീസ് ഫീൽഡർ ബ്രാന്റൻ കിങ്ങിന്റെ ഡയറക്ട് ത്രോ സ്റ്റമ്പിളക്കി. വിക്കറ്റ് നഷ്ടമായതിന്റെ നിരാശയിൽ അൽപനേരം പിച്ചിൽ മുട്ടുകുത്തി ഇരുന്ന ശേഷമാണ് ബാബർ ഗ്രൗണ്ട് വിട്ടത്.

ഇതിന് മുമ്പ് 2022 ഡിസംബറിൽ കറാച്ചിയിൽ ന്യൂസീലൻഡിനെതിരെയാണ് ബാബർ ടെസ്റ്റിൽ സെഞ്ചുറി നേടിയത്. ഇതോടെ ഒരു ടെസ്റ്റ് സെഞ്ചുറിയില്ലാതെ 1317 ദിവസങ്ങളാണ് ബാബർ പിന്നിട്ടത്. അതായത് നാല് വർഷത്തോളം.

ബാബർ പുറത്തായതിന് പിന്നാലെ പാക് ഇന്നിങ്‌സ് തകർന്നടിയുകയും ചെയ്തു. രണ്ട് വിക്കറ്റ് നഷ്ടത്തിൽ 281 റൺസ് എന്ന ശക്തമായ നിലയിൽ നിന്ന് 387 റൺസ് എല്ലാവരും പുറത്തായി. 106 റൺസെടുക്കുന്നതിനിടയിൽ ശേഷിക്കുന്ന എട്ട് വിക്കറ്റുകളും നഷ്ടമായി. പാകിസ്താനായി അബ്ദുല്ല ഷഫീഖ് 160 റൺസ് നേടി. നേരത്തെ ആദ്യ ഇന്നിങ്‌സിൽ വെസ്റ്റിൻഡീസ് 344 റൺസാണ് നേടിയത്. ഇതോടെ 43 റൺസ് ലീഡ് വഴങ്ങിയാണ് വെസ്റ്റിൻഡീസ് രണ്ടാം ഇന്നിങ്‌സിനിറങ്ങിയത്. അലി ഉസ്മാൻ, സാജിദ് ഖാൻ എന്നിവരുടെ ബൗളിങ്ങിൽ തകർന്ന വെസ്റ്റിൻഡീസ് 117 റൺസിന് പുറത്തായി. നിലവിൽ 75 റൺസ് വിജയലക്ഷ്യവുമായി പാകിസ്താൻ രണ്ടാം ഇന്നിങ്‌സ് ബാറ്റിങ്ങിനിറങ്ങിയിട്ടുണ്ട്.

Content Highlights: Babar Azam dismissed for 88 after a misunderstanding with Abdullah Shafique., Babar Azam has not scored a Test century in 1317 days (since Dec 2022)., Pakistan collapsed from 281/2 to 387 all out, losing 8 wickets for 106 runs., Abdullah Shafique anchored the innings with a score of 160., Pakistan leads the match with a 75-run target in the second innings.