ആലപ്പുഴയോളങ്ങൾ | വിജില ചിറപ്പാട്‌

           1
ജലത്തോടൊട്ടിയ വെളിച്ചപ്പൊട്ടുകൾ
മാനത്തെ ആലേന്ന്
വീണുപോയ
തച്ചന്റെ വീതുളികൾ 

           2
സ്നേഹപ്പറവകൾ
പൊഴിച്ചിട്ട തൂവൽപ്പെരുക്കങ്ങൾ 
ജലലയനങ്ങൾ

           3
മാനത്തമ്പിളിയുടെ
അടയിരിപ്പിൽ
അടർന്നു വീണ മുട്ടത്തോടുകൾ

           4
സ്വപ്നത്തിൽ
മേഘങ്ങളായലയുന്ന കുഞ്ഞുങ്ങൾ 
കുലുക്കി വീഴ്ത്തിയ
പാരിജാതപ്പൂക്കൾ
ജലവിസ്മയങ്ങൾ

          5
ആലിലകൾ ഇളകിയോടി
കലപില കൂടി, 
ഓളപ്പരപ്പിലെ
ചങ്ങാതിയലകളായി

Content Highlights: World poetry day 2023, Poem by Vijila Chirappad