കുട്ടികളിലും ഹൃദ്രോഗം?; രാജ്യത്തെ മൂന്നിലൊന്ന് കുട്ടികളിൽ കൊഴുപ്പുഘടകം കൂടുതൽ, കേന്ദ്രത്തിന്റെ റിപ്പോർട്ട്

തൃശ്ശൂർ: കുട്ടികളിൽ ഹൃദ്രോഗസാധ്യതയുയർത്തി കൊഴുപ്പുഘടകങ്ങളുടെ സാന്നിധ്യം കൂടുന്നുവെന്ന് കേന്ദ്ര ആരോഗ്യവകുപ്പിന്റെ റിപ്പോർട്ട്. രാജ്യത്തെ അഞ്ചുമുതൽ ഒൻപതുവയസ്സുവരെയുള്ള കുട്ടികളിൽ ഭാവിയിൽ ഹൃദ്രോഗസാധ്യതയുണ്ടാക്കുന്ന കൊഴുപ്പുഘടകമായ ട്രൈഗ്ലിസറൈഡുകളുടെ കൂടിയ സാന്നിധ്യമുണ്ടെന്നാണ് റിപ്പോർട്ട്. 34 ശതമാനമാണ് ദേശീയ ശരാശരി. കേരളത്തിലിത് 16.6 ആണെന്നത് ആശ്വാസമാണ്.

ട്രൈഗ്ലിസറൈഡുകളുടെ സാന്നിധ്യം ചെറിയ കുട്ടികളിൽ കൂടുതലാണെങ്കിലും 10-19 പ്രായമുള്ള കുട്ടികളിൽ നിരക്ക് 16.1 ആയി കുറയുന്നുണ്ട്. 10-19 പ്രായത്തിനിടയിലുള്ള കുട്ടികളിൽ 4.9 ശതമാനംപേർക്ക് രക്താതിസമ്മർദമുണ്ടെന്നത് ഉൾപ്പെടെ ആരോഗ്യവുമായി ബന്ധപ്പെട്ട് ഗൗരവതരമായ കാര്യങ്ങളും റിപ്പോർട്ടിൽ ചൂണ്ടിക്കാണിക്കുന്നുണ്ട്. പ്രസവസമയത്ത് വേണ്ടത്ര ഓക്സിജൻ കിട്ടാത്തതും തൂക്കക്കുറവും മാസം തികയാതെയുള്ള പ്രസവവുമൊക്കെ ഗുരുതരപ്രശ്നങ്ങളാണെന്നും വിലയിരുത്തുന്നു.

Content Highlights: A government report highlights rising triglyceride levels in Indian children (5-9 yrs), a risk factor for future heart disease. Kerala shows lower rates. Report also notes blood pressure, prematurity issues.