ഇംഗ്ലണ്ടിനെതിരായ തോല്‍വി സഹിക്കാനായില്ല, കണ്ണീരണിഞ്ഞ് രോഹിത് ശര്‍മ- വീഡിയോ
അഡ്‌ലെയ്ഡ്: അങ്ങനെ 2022 ട്വന്റി 20 ലോകകപ്പിലെ ഇന്ത്യയുടെ കിരീടപ്രതീക്ഷകള്‍ അവസാനിച്ചു. നിര്‍ണായകമായ സെമി ഫൈനല്‍ മത്സരത്തില്‍ ഇംഗ്ലണ്ട് ഇന്ത്യയെ 10 വിക്കറ്റിന് നാണംകെടുത്തി ഫൈനലിലേക്ക് പ്രവേശിച്ചു. ഇന്ത്യ ഉയര്‍ത്തിയ 169 റണ്‍സ് വിജയലക്ഷ്യം വെറും 16 ഓവറില്‍ വിക്കറ്റ് നഷ്ടപ്പെടുത്താതെ ഇംഗ്ലണ്ട് ഓപ്പണര്‍മാരായ ജോസ് ബട്‌ലറും അലക്‌സ് ഹെയ്ല്‍സും ചേര്‍ന്ന് അടിച്ചെടുത്തു.
മത്സരത്തിലെ നായകന്‍ രോഹിത് ശര്‍മയുടെ മെല്ലെപ്പോക്ക് ബാറ്റിങ് ഏറെ വിമര്‍ശനങ്ങള്‍ക്ക് വഴിവെച്ചിരുന്നു. താരം മത്സരത്തില്‍ 28 പന്തില്‍ നിന്ന് 27 റണ്‍സാണ് നേടിയത്. മത്സരശേഷം രോഹിത് കണ്ണീരണിഞ്ഞതാണ് ഇപ്പോള്‍ സമൂഹമാധ്യമങ്ങളിലെ പ്രധാന ചര്‍ച്ചാവിഷയം.
മത്സരശേഷം ഡഗ്ഔട്ടിലെത്തിയ രോഹിത്തിന് സങ്കടം അടക്കാനായില്ല. തലതാഴ്ത്തി ഇന്ത്യന്‍ നായകന്‍ കണ്ണീരണിഞ്ഞു. ഇത് കണ്ട ഇന്ത്യന്‍ ടീം പരിശീലകന്‍ രാഹുല്‍ ദ്രാവിഡ് രോഹിത്തിനെ ആശ്വസിപ്പിച്ചു. മത്സരത്തില്‍ ഒരു തരത്തിലും ആധിപത്യം പുലര്‍ത്താതെയാണ് ഇന്ത്യ പരാജയം ഏറ്റുവാങ്ങിയത്.
ഇന്ത്യയെ കീഴടക്കിയ ഇംഗ്ലണ്ട് ഫൈനലില്‍ പാകിസ്താനെ നേരിടും. ഇംഗ്ലണ്ടിനെ തോല്‍പ്പിച്ചിരുന്നുവെങ്കില്‍ ഇന്ത്യ-പാകിസ്താന്‍ സ്വപ്ന ഫൈനലിന് ട്വന്റി 20 ലോകകപ്പ് വേദിയായേനേ.