സിജോമോന്‍ ജോസഫ് ഒഴിഞ്ഞു; ഷോണ്‍ റോജർ തൃശ്ശൂര്‍ ടൈറ്റന്‍സിന്റെ പുതിയ ക്യാപ്റ്റന്‍

തിരുവനന്തപുരം: കേരള ക്രിക്കറ്റ് ലീഗില്‍ (കെസിഎല്‍) തൃശ്ശൂര്‍ ടൈറ്റന്‍സ് ടീമില്‍ അഴിച്ചുപണി. സിജോമോന്‍ ജോസഫ് ടീമിന്റെ ക്യാപ്റ്റന്‍ സ്ഥാനമൊഴിഞ്ഞു. ഇക്കാര്യം സിജോമോന്‍ ജോസഫ് തന്നെയാണ് കഴിഞ്ഞദിവസം സോഷ്യല്‍ മീഡിയ വഴി അറിയിച്ചത്. 22-കാരനായ ഷോണ്‍ റോജര്‍ ആണ് പുതിയ ക്യാപ്റ്റന്‍.

നിലവില്‍ പോയിന്റ് പട്ടികയില്‍ നാലാമതാണ് ടൈറ്റന്‍സ്. ഏഴ് മത്സരങ്ങളില്‍നിന്ന് നാല് വിജയം സിജോമോന്റെ കീഴില്‍ ടീം സ്വന്തമാക്കി. പ്രകടനത്തില്‍ ശ്രദ്ധിക്കാനാണ് സിജോമോന്‍ സ്ഥാനം ഒഴിയുന്നതെന്നാണ് വിലയിരുത്തല്‍. 27 കാരനായ ഓള്‍റൗണ്ടറിന് ഈ സീസണില്‍ മൂന്ന് വിക്കറ്റ് മാത്രമാണ് നേടാന്‍ സാധിച്ചത്.

തിരുവനന്തപുരം വെട്ടുകാട് സ്വദേശിയാണ് പുതിയ ക്യാപ്റ്റനായ ഷോണ്‍ റോജര്‍. ശംഖുമുഖം വെട്ടുകാട് എം.എ. ബവനില്‍ ആന്റണി റോജറിന്റെയും പെട്രീഷ്യ റോജറിന്റെയും മകനാണ്. മികച്ച ഓള്‍റൗണ്ടര്‍ കൂടിയാണ് താരം. ദേശീയ കോച്ചായ ബിജു ജോര്‍ജിന്റെ കീഴില്‍ വര്‍ഷങ്ങളോളം പരിശീലനം നടത്തി. യുഎഇയില്‍ കളിച്ചുതുടങ്ങിയ താരം അവിടെ അണ്ടര്‍-16 ടീമംഗമായി. ഇന്ത്യയുടെ അണ്ടര്‍-19 ടീമിലും ഇടംനേടിയിട്ടുണ്ട്. 

Content Highlights: kerala cricket league shoun roger thrissur titans captain