'വർഗീയ സംഘർഷങ്ങൾ രാജ്യത്തെ ഭിന്നിപ്പിക്കുന്നു, മണിപ്പൂർ മിനി ഇന്ത്യ'- ഹോബം പബൻ കുമാർ

വർ​ഗീയ സംഘർഷങ്ങൾ ജനങ്ങളെ ഭിന്നിപ്പിക്കുന്ന അപകടകരമായ അവസ്ഥയാണ് രാജ്യത്തുള്ളതെന്ന് മണിപ്പൂരി സംവിധായകൻ ഹോബം പബൻ കുമാർ. വർഗീയ സംഘർഷങ്ങളുണ്ടാക്കുന്ന പ്രത്യാഘാതങ്ങൾ തടയുക അ‌സാധ്യമാണെന്നും രാജ്യാന്തര ചലച്ചിത്രമേളയിലെ മീറ്റ് ദ ഡയറക്ടേഴ്സിൽ പങ്കെടുത്ത് സംസാരിക്കവേ അ‌ദ്ദേഹം ചൂണ്ടിക്കാട്ടി.

മണിപ്പൂരിലെ സംഘർഷങ്ങളെ കുറിച്ചുള്ള പബൻ കുമാറിന്റെ 'ജോസഫ്സ് സൺ' എന്ന ചിത്രം ചലച്ചിത്രമേളയിൽ പ്രദർശിപ്പിക്കുന്നുണ്ട്. ഇന്ത്യൻ സിനിമ ടുഡേ വിഭാഗത്തിലാണ് ചിത്രം ഉൾപ്പെടുത്തിയിരിക്കുന്നത്. 

മണിപ്പൂരിലെ സംഘർഷങ്ങൾ അവിടത്തെ ജനങ്ങളിൽ വലിയ മനസികാഘാതം സൃഷ്ടിച്ചിരിക്കുകയാണ്. ഈ പശ്ചാത്തലത്തിലെ മാനസിക പിരിമുറുക്കത്തേയും വ്യക്തി​ഗത അനുഭവങ്ങളേയും കോർത്തിണക്കിയാണ് താൻ ജോസഫ്സ് സൺ നിർമ്മിച്ചിരിക്കുന്നതെന്നും അദ്ദേഹം പറഞ്ഞു.

'മണിപ്പൂർ മിനി ഇന്ത്യയാണ്. ഓരോ ജാതിയും അ‌വിടെ സ്വന്തം മേഖലയ്ക്കായുള്ള പോരാട്ടത്തിലാണ്. വർഗീയ സംഘർഷങ്ങൾ മൂലം ജനങ്ങൾ കടുത്ത ദുരിതത്തിലാണ് കഴിയുന്നത്,' പബൻ കുമാർ കൂട്ടിച്ചേർത്തു.

ശ്രീജിത് മുഖർജി, ടാറ്റിയാന ​ഗ്രൗലേറ, ഷോക്കിർ ഖൊലിക്കോവ്, വിശ്വേഷ് സിം​ഗ് സെഹരാവത്, ലുബ്ധക് ചാറ്റർജി, ഫെലിപ്പേ കാർമോണ എന്നിവർ മീറ്റ് ദ ഡയറക്ടേഴ്സിൽ പങ്കെടുത്തു. എ.മീരാസാഹിബ് മോഡറേറ്ററായിരുന്നു.

Content Highlights: iffk 2023, haobam paban kumar, film director