കുത്ത് കിട്ടും ന്നാലും എനിക്കിഷ്ടാ; തേനീച്ച വളർത്താൻ വയസ്സൊക്കെ നോക്കണോ?

റബീഅക്കുട്ടി സ്‌കൂള്‍ വിട്ടു നേരെ പറമ്പിലേക്ക് ഒരു ഓട്ടമാണ്. കളിക്കാനല്ല കേട്ടോ...പറമ്പില്‍ അങ്ങിങ്ങായി വെച്ചിരിക്കുന്ന ചെറുകൂടുകളിലെ കൂട്ടുകാരെ കാണാനാണീ ഓട്ടം. ചെറുപ്രായത്തില്‍ത്തന്നെ തേനീച്ചവളര്‍ത്തല്‍ വിനോദമാക്കിയിരിക്കയാണ് ഈ കൊച്ചുമിടുക്കി. പാലക്കാട് ഒറ്റപ്പാലം അനങ്ങനടിയിലെ കോതകുറിശ്ശി താഴത്തേതില്‍ മുഹമ്മദ് റഫീക്കിന്റെയും സല്‍മയുടെയും മൂത്തമകളായ റബീഅ ഹംദയ്ക്ക് തേനീച്ച വളര്‍ത്തലില്‍ കമ്പം കയറിയത് നാലാം വയസിലാണ്. 

കൃഷിയെ സ്‌നേഹിക്കുന്ന സോഫ്ട്‌വെയര്‍ എന്‍ജിനിയറായ ഉപ്പ മുഹമ്മദ് റഫീക്ക് ആറുവര്‍ഷം മുന്‍പ് തേനീച്ചവളര്‍ത്തല്‍ ആരംഭിച്ചതാണ് റബീഅഹംദയ്ക്കും തേനീച്ചവളര്‍ത്തലില്‍ താത്പര്യമുണ്ടാക്കിയത്. തേനീച്ചകുത്ത് അത്ര നിസ്സാരമല്ലാത്തതിനാല്‍ റബീഅയുടെ ഇഷ്ടത്തെ ആദ്യമൊക്കെ വീട്ടുകാര്‍ കണ്ടില്ലെന്ന് നടിച്ചെങ്കിലും പിന്നീടവര്‍ക്ക് വഴങ്ങേണ്ടിവന്നു. ഇന്ന് 'ഇന്ത്യയിലെ ഏറ്റവും പ്രായംകുറഞ്ഞ തേനീച്ച കര്‍ഷക എന്ന ഇന്ത്യൻ ബുക്ക് ഓഫ് റെക്കോഡ്‌സിന്റെ ബഹുമതി സ്വന്തമാക്കിയിരിക്കുകയാണ് ഈ ഒന്നാം ക്ലാസുകാരി. 

Content Highlights: Youngest beekeeper in India, beekeeping girl from Ottappalam