ലഹരിയുണ്ടാക്കാൻ കുക്കിങ്, ഇറക്കുമതി വിദേശത്തുനിന്ന്,പിന്നില്‍ വിദ്യാര്‍ത്ഥികളും; ഒടുക്കം ആത്മഹത്യയിൽ
രാസലഹരിയുടെ ഉപയോക്താക്കളും വില്‍പനക്കാരുമായി പ്രൊഫഷണല്‍ വിദ്യാര്‍ത്ഥികളടക്കമുള്ള വലിയൊരു സംഘം യുവാക്കള്‍ മാറുന്നുവെന്നതാണ് കേരളത്തെ ഞെട്ടിക്കുന്ന കാര്യം. വീര്യം കൂടിയ രാസലഹരി വിദേശ രാജ്യങ്ങളില്‍ നിന്ന് വരുത്തിയാണ് ഇവരുടെ വില്‍പന. സമൂഹത്തിലെ ഉന്നത തലത്തിലുള്ളവരാണ് ഇവരുടെ ഉപഭോക്താക്കള്‍. ഗ്രാം കണക്കില്‍ കുറഞ്ഞ അളവിലാണ് കച്ചവടമെന്നതിനാല്‍ സൂക്ഷിക്കുന്നതും കച്ചവടം ചെയ്യുന്നതും കണ്ടത്താന്‍ വീട്ടുകാര്‍ക്ക് പോലും കഴിയുന്നില്ല. എംഡിഎംഎയും എല്‍.എസ്.ഡി സ്റ്റാമ്പും കൂടാതെ പുതിയ ചില രാസഉല്‍പന്നങ്ങളും വിദേശത്ത് നിന്ന് ഇവര്‍ വഴിയെത്തുന്നുണ്ട്. ആണ്‍കുട്ടികളും പെണ്‍കുട്ടികളും ഒരു പോലെ വിദേശ രാസലഹരി കച്ചവടത്തില്‍ കണ്ണികളായിട്ടുണ്ടെന്നാണ് അന്വേഷണ സംഘങ്ങള്‍ കണ്ടെത്തിയിട്ടുള്ളത്.
കുടുംബത്തിലേയും രക്ഷിതാക്കളുടേയും പ്രശ്നങ്ങളും സഹപാഠികളുടെ പ്രേരണകളുമാണ് പലപ്പോഴും ലഹരി ഉപയോഗത്തിലേക്ക് കുട്ടികളെ നയിക്കുന്നതെന്നാണ് പഴയ പഠനങ്ങളില്‍ കണ്ടെത്തിയിട്ടുള്ളത്.എന്നാല്‍ വിദേശത്ത് നിന്നുള്ള ലഹരിക്കടത്തില്‍ പിടിയിലായ ഭൂരിഭാഗം പേര്‍ക്കും ഇത്തരം പശ്ചാത്തലങ്ങളൊന്നുമില്ല. സാമ്പത്തികമായി ഉന്നത അവസ്ഥയിലുള്ളവരും ഉയര്‍ന്ന വിദ്യാഭ്യാസമുള്ളവരുമായിരുന്നു ഭൂരിഭാഗം പേരും. ഇവര്‍ക്കെല്ലാമുള്ള പ്രധാന സാമ്യം ഏറെ നേരം ഇന്റര്‍നെറ്റിന്റെ ലോകത്തായിരുന്നു എന്നതാണ്. കൂട്ടായ്മകളില്ലാതെ ഒറ്റയ്ക്കൊറ്റാണ് ഇവര്‍ ലഹരിയുടെ വാങ്ങലും വിപണനവും നടത്തിയിരുന്നത്.
Content Highlights: Kerala faces a surge in synthetic drug use among students. Foreign-sourced drugs are sold online