വനിതാ ഡ്രൈവർമാരെ പ്രോത്സാഹിപ്പിക്കാനുള്ള നടപടികളുമായി സൗദി അറേബ്യ; സ്ത്രീകൾക്ക് മാത്രമായി റൈഡ് ഓപ്ഷൻ

ജിദ്ദ: യാത്രസേവന രംഗത്തെ പ്രമുഖരായ ഊബർ സൗദി അറേബ്യയിൽ ഒരു പുതിയ യാത്ര സംവിധാനം അവതരിപ്പിച്ചു. വനിതാ യാത്രക്കാർക്ക് വനിതാ ഡ്രൈവർമാരുമായി പരസ്പരം ബന്ധപ്പെടുവാനുള്ള സംവിധാനാമാണ് അവതരിപ്പിച്ചിരിക്കുന്നത്. വനിതകൾക്ക് തൊഴിൽ ശക്തിയിൽ പങ്കാളിത്തം വർദ്ധിപ്പിക്കുന്നതിനുള്ള വിശാലമായ ശ്രമങ്ങളുടെ ഭാഗമാണ് ഊബറിന്റെ പുതിയ ചുവടുവെപ്പ്. 'വനിതാഡ്രൈവർമാർ' എന്ന് വിളിക്കപ്പെടുന്ന പുതിയ സംവിധാനം സ്ത്രീകൾക്ക് മാത്രമായി സുരക്ഷിതമായി യാത്രചെയ്യുവാനും ബുക്ക് ചെയ്യുവാനുമുള്ള സംവിധാനം ഒരുക്കിയിരിക്കുകയാണ്. ഇതുവഴി പരസ്പരം സ്ത്രീ ഡ്രൈവർമാരുമായും സ്ത്രീ യാത്രക്കാരുമായും ബന്ധിപ്പിക്കും. വനിതാ ഡ്രൈവർമാർക്ക് പരസ്പരം കണക്റ്റുചെയ്യാനും അനുഭവങ്ങൾ പങ്കുവെക്കുവാനും ഇതുവഴി സാധിക്കും.

പുതുതായി ഡ്രൈവിംഗ് മേഖലയിലേക്ക് കടന്നുവരാൻ ആഗ്രഹിക്കുന്ന സൗദി വനിതകൾക്ക് സഹായകമാകും വിധം ഡ്രൈവിംഗ് ലൈസൻസുകൾ കരസ്ഥമാക്കാനും ജോലി തരപ്പെടുത്താനും പുതിയ സംവിധാനം സഹായകമാകും. സൗദി വിഷൻ 2030 നോടനുബന്ധിച്ചു സൗദിവത്കരണ പദ്ധതിയുടെ ഭാഗമായാണ് പുതിയ സംവിധാനം. പുതിയ ഫീച്ചർ സ്റ്റാൻഡേർഡ് ഊബർ എക്സ്  എന്ന സേവനമായി പ്രവർത്തിക്കും. വരും ആഴ്ചകളിൽ സൗദിയിലുടനീളം വനിതാ റൈഡർമാർക്ക്  ഇത് ലഭ്യമാക്കും. ഊബർ റിസർവ് ഉപയോഗിച്ച് സ്ത്രീകൾക്ക് ഓൺ-ഡിമാൻഡ് യാത്രകൾ ബുക്ക് ചെയ്യാനോ 30 മിനിറ്റ് മുമ്പ് ഷെഡ്യൂൾ ചെയ്യാനോ സാധിക്കും.

സ്ത്രീ ശാക്തീകരണത്തോടോപ്പോം വനിതകളുടെ സാമ്പത്തിക സ്വാതന്ത്ര്യത്തെ പിന്തുണയ്ക്കുന്നതിനും സഹായകമാകുന്നതാണ് പുതിയ സംവിധാനം.ഏകദേശം  30,000 തൊഴിലവസരങ്ങൾ സൃഷ്ടിക്കാനാണ് ഊബർ ലക്ഷ്യമിടുന്നത്. ഊബർ റിസർവ് ഉപയോഗിച്ച് വനിതകൾക്ക് ആവശ്യാനുസരണം ട്രിപ്പുകൾ ബുക്ക് ചെയ്യാനാകും. വനിതകൾ വാഹനമോടിക്കുന്നതിനുള്ള വിലക്ക് സൗദി നീക്കിയതിന് ഏഴ് വർഷത്തിന് ശേഷമാണ് സ്വകാര്യ ടാക്സി രംഗത്തെ പ്രമുഖരായ ഊബർ ഈ സംരംഭവുമായി രംഗത്ത് എത്തുന്നത്. ഇത് തൊഴിൽ മേഖലയിലും വാഹന ഗതാഗത മേഖലയിലും വനിതകളുടെ പങ്കാളിത്തം വർധിപ്പിക്കുന്നതിനുള്ള വിശാലമായ ശ്രമങ്ങളുടെ ഭാഗമായി വനിതാ യാത്രക്കാരെ വനിതാ ഡ്രൈവർമാരുമായി ബന്ധിപ്പിക്കാൻ സഹായിക്കുന്നു.

Content Highlights: Uber connects women riders with women drivers in Saudi Arabia