മക്കയിലെ ഹറം പള്ളിയിൽ നിന്ന് വെറും 36 കിലോമീറ്റർ മാത്രം; ഹൂതി മിസൈൽ അവശിഷ്ടങ്ങൾ പതിച്ചു
മക്ക: മക്കയിലെ വിശുദ്ധ ഹറം പള്ളിയിൽ നിന്ന് അധികം ദൂരെയല്ല ഹൂതി മിസൈലുകളുടെ അവശിഷ്ടങ്ങൾ പതിച്ച പ്രദേശമെന്ന് റിപ്പോർട്ട്. മക്ക മേഖലയിലേക്ക് ഹൂതി സായുധസംഘം വിക്ഷേപിച്ച രണ്ട് ബാലിസ്റ്റിക് മിസൈലുകൾ സൗദി വ്യോമപ്രതിരോധ സേന ആകാശത്തുവെച്ച് തടഞ്ഞ് തകർത്തതിന് പിന്നാലെയാണ് അവയുടെ അവശിഷ്ടങ്ങൾ വിവിധയിടങ്ങളിൽ പതിച്ചത്.
അവശിഷ്ടങ്ങൾ പതിച്ചതായി സൗദി സിവിൽ ഡിഫൻസ് സ്ഥിരീകരിച്ച സബൂഹ ഗ്രാമം (Sabouha), മക്കയിലെ വിശുദ്ധ ഹറം പള്ളിയിൽ നിന്ന് ഏകദേശം 36 കിലോമീറ്റർ മാത്രം അകലെയാണ് സ്ഥിതി ചെയ്യുന്നത്. രണ്ട് സ്ഥലങ്ങൾക്കുമിടയിലെ നേർരേഖയിലുള്ള ഭൂമിശാസ്ത്രപരമായ ദൂരത്തിന്റെ അടിസ്ഥാനത്തിലുള്ള കണക്കാണിത്. മുസ്‌ലിംകളുടെ ഏറ്റവും പ്രധാന പുണ്യസ്ഥലത്തിന് എത്രത്തോളം അടുത്താണ് മിസൈൽ അവശിഷ്ടങ്ങൾ പതിച്ചതെന്ന് ഇത് വ്യക്തമാക്കുന്നു.
മിസൈലുകൾ വിക്ഷേപിക്കുമ്പോൾ മുസ്‌ലിംകളുടെ പുണ്യസ്ഥലങ്ങളുടെ വിശുദ്ധി പോലും ഹൂതി സംഘം പരിഗണിച്ചില്ലെന്നാണ് റിപ്പോർട്ട്. ആക്രമണങ്ങൾ പ്രദേശവാസികൾക്കും വിശുദ്ധ ഹറം പള്ളി സന്ദർശിക്കുന്നവർക്കും തീർഥാടകർക്കും സൃഷ്ടിക്കാവുന്ന അപകടസാധ്യതകൾ അവഗണിച്ചായിരുന്നു നടപടി.
മിസൈലുകൾ ലക്ഷ്യസ്ഥാനത്ത് പതിക്കുന്നതിലൂടെ മാത്രമല്ല അപകടമുണ്ടാകുന്നത്. വ്യോമപ്രതിരോധ സംവിധാനങ്ങൾ അവയെ ആകാശത്തുവെച്ച് തകർക്കുമ്പോൾ ചിതറിത്തെറിക്കുന്ന അവശിഷ്ടങ്ങൾ സമീപപ്രദേശങ്ങളിലും അപകടസാധ്യത സൃഷ്ടിക്കാം.
രണ്ട് ബാലിസ്റ്റിക് മിസൈലുകൾ തടഞ്ഞ് തകർത്തതിനെത്തുടർന്ന് അവശിഷ്ടങ്ങൾ പതിച്ച സംഭവത്തിൽ പുലർച്ചെ തന്നെ സിവിൽ ഡിഫൻസ് അധികൃതർ ഇടപെട്ടതായി അറിയിച്ചു. സബൂഹ ഗ്രാമം ഉൾപ്പെടെയുള്ള പ്രദേശങ്ങളിലാണ് അവശിഷ്ടങ്ങൾ പതിച്ചത്.
സംഭവത്തിൽ ബന്ധപ്പെട്ട അധികൃതർ ഉടൻ സ്ഥലത്തെത്തി ആവശ്യമായ സുരക്ഷാ നടപടികൾ സ്വീകരിച്ചതായും സിവിൽ ഡിഫൻസ് വ്യക്തമാക്കി. അതേസമയം, ലക്ഷ്യസ്ഥാനങ്ങളിൽ എത്തുന്നതിന് മുമ്പുതന്നെ രണ്ട് മിസൈലുകളും സൗദി വ്യോമപ്രതിരോധ സേന വിജയകരമായി തടഞ്ഞ് തകർത്തിരുന്നു.