ക്ഷേമ പെൻഷൻ ബാങ്ക് വഴി വിതരണം ചെയ്യാനുള്ള തീരുമാനം ജനക്ഷേമ സർക്കാരിന്റെ കയ്യൊപ്പ് -ഒഐസിസി

ജിദ്ദ: കേരളത്തിലെ ക്ഷേമ പെൻഷൻ ഗുണഭോക്താക്കൾക്ക് ബാങ്ക് അക്കൗണ്ട് വഴി പെൻഷൻ നേരിട്ട് ലഭ്യമാക്കാനുള്ള സർക്കാർ തീരുമാനം ജനക്ഷേമ ഭരണത്തിന്റെ വ്യക്തമായ അടയാളമാണെന്ന് ഒ.ഐ.സി.സി പ്രവാസി സേവന കേന്ദ്രം@ജിദ്ദ അഭിപ്രായപ്പെട്ടു. ഒഐസിസി മലപ്പുറം ജില്ലാ കമ്മിറ്റി ഓഫീസിൽ ചേർന്ന വാരാന്ത്യ യോഗത്തിലാണ് പ്രതികരണം. അസീസ് ലാക്കൽ അധ്യക്ഷത വഹിച്ചു.

വർഷങ്ങളായി ക്ഷേമ പെൻഷനെ ആശ്രയിച്ച് കഴിയുന്ന വയോജനങ്ങൾ, വിധവകൾ, ഭിന്നശേഷിക്കാർ തുടങ്ങിയ അർഹരായ ഗുണഭോക്താക്കൾക്ക് പെൻഷൻ തുക കൃത്യസമയത്ത് ലഭ്യമാക്കുക സർക്കാരിന്റെ പ്രാഥമിക ഉത്തരവാദിത്വമാണെന്ന് യോഗം ചൂണ്ടിക്കാട്ടി.

ഇടനിലക്കാരെയും അനാവശ്യമായ കാലതാമസങ്ങളെയും ഒഴിവാക്കി പെൻഷൻ തുക നേരിട്ട് ബാങ്ക് അക്കൗണ്ടിലെത്തിക്കുന്ന തീരുമാനം വിതരണ സംവിധാനത്തിൽ വലിയ മാറ്റത്തിന് വഴിയൊരുക്കുമെന്നും പ്രവാസി സേവന കേന്ദ്രം@ജിദ്ദ വ്യക്തമാക്കി.

ജനങ്ങളുടെ ജീവിതപ്രശ്നങ്ങൾക്ക് പ്രായോഗിക പരിഹാരം കണ്ടെത്തുന്ന ഭരണമാണ് ആവശ്യം. സാധാരണക്കാരുടെ അവകാശങ്ങൾ സംരക്ഷിക്കുന്നതിനും സാമൂഹിക സുരക്ഷ ശക്തിപ്പെടുത്തുന്നതിനും സർക്കാർ സ്വീകരിക്കുന്ന നടപടികൾക്ക് പ്രവാസി സമൂഹത്തിന്റെ പൂർണ പിന്തുണയുണ്ടാകുമെന്നും യോഗം അറിയിച്ചു.

കേരളത്തിന്റെ വികസനത്തോടൊപ്പം സാധാരണ ജനങ്ങളുടെ ക്ഷേമത്തിനും തുല്യ പ്രാധാന്യം നൽകുന്ന നയങ്ങളാണ് കാലഘട്ടത്തിന്റെ ആവശ്യം. ജനങ്ങളുടെ അവകാശങ്ങൾ ഉറപ്പാക്കുന്ന ഓരോ തീരുമാനവും സർക്കാരിന്റെ ജനപക്ഷ നിലപാടിന്റെ തെളിവാണെന്നും യോഗം വിലയിരുത്തി.

ക്ഷേമ പെൻഷൻ ബാങ്ക് വഴി വിതരണം ചെയ്യാനുള്ള തീരുമാനം വി.ഡി. സതീശൻ സർക്കാരിന്റെ ജനക്ഷേമ പ്രവർത്തനങ്ങൾക്ക് ഒരു പൊൻതൂവൽ കൂടിയാണെന്നും ഒ.ഐ.സി.സി പ്രവാസി സേവന കേന്ദ്രം@ജിദ്ദ അഭിപ്രായപ്പെട്ടു.

ഫൈസൽ മക്കരപ്പറമ്പ്, ഗഫൂർ വണ്ടൂർ എന്നിവർ പ്രസംഗിച്ചു. യു.എം. ഹുസ്സൈൻ മലപ്പുറം സ്വാഗതവും സമീർ പാണ്ടിക്കാട് നന്ദിയും പറഞ്ഞു.

Content Highlights: Government mandates direct bank transfer for welfare pensions., Eliminates intermediaries and reduces distribution delays., Ensures timely financial support for the elderly, widows, and PwDs., OICC Jeddah expresses full support for the government's pro-people policy.