യൂസഫ് പി.പി.യുടെ കുടുംബ സഹായ ഫണ്ട് കേളി കൈമാറി

റിയാദ്: റിയാദിൽ മരിച്ച കേളി കലാസാംസ്കാരിക വേദി അസീസിയ ഏരിയ സിമന്റ് യൂണിറ്റ് അംഗം യൂസഫ് പി.പി.യുടെ കുടുംബത്തിന് കേളി കുടുംബ സഹായ ഫണ്ട് കൈമാറി. യൂസഫിന്റെ മണ്ണാർക്കാട്ടെ വീട്ടിൽ നടന്ന ചടങ്ങിൽ ഒറ്റപ്പാലം എംഎൽഎ അഡ്വ. കെ. പ്രേംകുമാർ സഹായധനം മകൻ റോഷൻ യൂസഫിന് കൈമാറി.

സിപിഐഎം കൊട്ടോപ്പാടം ലോക്കൽ സെക്രട്ടറി എം. മനോജ് അധ്യക്ഷനായ പരിപാടിയിൽ കേളി ട്രഷറർ മധു ബാലുശ്ശേരി സ്വാഗതം പറഞ്ഞു. കേളി കേന്ദ്ര കമ്മിറ്റി അംഗം റഫീഖ് പാലത്ത്, കേരള പ്രവാസി സംഘം ജില്ലാ പ്രസിഡന്റ് സൈതലവി, ബ്രാഞ്ച് സെക്രട്ടറി ഹംസ സി., കേളി ജീവകാരുണ്യ കമ്മിറ്റി അംഗം മധു ഇടപ്പുറത്ത്, പ്രവാസി സംഘം ഏരിയ ട്രഷറർ ഹമീദ്, പ്രവാസി സംഘം ജില്ലാ കമ്മിറ്റി അംഗം ഹംസ എ. എന്നിവർ അഭിവാദ്യം ചെയ്തു. കേളി കേന്ദ്ര കമ്മിറ്റി അംഗം ഹാരിസ് മണ്ണാർക്കാട് നന്ദി പറഞ്ഞു.

23 വർഷത്തോളമായി റിയാദിൽ പ്രവാസിയായിരുന്ന യൂസഫ് പി.പി. പക്ഷാഘാതത്തെ തുടർന്ന് റിയാദ് കിംഗ് സൗദ് മെഡിക്കൽ സിറ്റി ആശുപത്രിയിൽ ചികിത്സയിലിരിക്കെയാണ് മരണമടഞ്ഞത്. മൃതദേഹം നാട്ടിലെത്തിക്കുന്നതിനുള്ള നടപടികൾക്ക് കേളി കേന്ദ്ര ജീവകാരുണ്യ കമ്മിറ്റിയും അസീസിയ ഏരിയ കമ്മിറ്റിയും നേതൃത്വം നൽകി.

Content Highlights: Keli Arts and Cultural Society provided family welfare assistance to the relatives of deceased expat Yousuf PP., The financial aid was handed over by MLA Adv. K. Premkumar at Yousuf's residence in Mannarkkad., Yousuf worked in Riyadh for 23 years and passed away following a stroke while receiving treatment., Keli central charity committee and Asseyia area committee coordinated repatriation and support.