ഇർവിങ് ഡിഎഫ്ഡബ്ല്യു ഇന്ത്യൻ ലയൺസ് ക്ലബ് 30-ാം വാർഷികം ആഘോഷിച്ചു; ചാർട്ടർ അംഗങ്ങൾക്ക് ആദരം

ഡാലസ്: ഇർവിങ് ഡിഎഫ്ഡബ്ല്യു ഇന്ത്യൻ ലയൺസ് ക്ലബ്ബിന്റെ (ഡിസ്ട്രിക്ട് 2-X1) മുപ്പതാം വാർഷിക ആഘോഷവും കുടുംബസംഗമവും പ്രൗഢ ഗംഭീരമായി നടന്നു. ടെക്‌സസിലെ ഫ്‌ലവർ മൗണ്ടിലുള്ള ട്വിൻ കോവ്‌സ് പാർക്കിൽ നടന്ന ആഘോഷപരിപാടിയിൽ ചാർട്ടർ അംഗങ്ങളും മുതിർന്ന അംഗങ്ങളും കുടുംബാംഗങ്ങളും പങ്കെടുത്തു.

ഉമ ഹരിദാസ് ആലപിച്ച അമേരിക്കൻ, ഇന്ത്യൻ ദേശീയഗാനങ്ങളോടെയാണ് പരിപാടികൾക്ക് തുടക്കമായത്. കഴിഞ്ഞ മൂന്ന് പതിറ്റാണ്ടുകളായി ക്ലബ്ബ് നടത്തിവരുന്ന ജീവകാരുണ്യ സാമൂഹിക സേവനങ്ങളെക്കുറിച്ച് പ്രസിഡന്റ് ജിജോ പേരേപ്പാടൻ അധ്യക്ഷ പ്രസംഗത്തിൽ ഓർമിച്ചു. 51 ലയൺ കുടുംബങ്ങളുടെ കരുത്തുമായാണ് ക്ലബ്ബ് മുപ്പതാം വാർഷികത്തിലേക്ക് എത്തുന്നതെന്നും, സ്ഥാപക അംഗങ്ങളുടെ ആത്മാർഥമായ സേവനമാണ് ക്ലബ്ബിനെ ഇന്നത്തെ നിലയിലെത്തിച്ചതെന്നും അദ്ദേഹം പറഞ്ഞു.

ചടങ്ങിൽ ഡിസ്ട്രിക്ട് ഗവർണർ ഗാരി വൈൻയാർഡ് ക്ലബ്ബിന്റെ പുതിയ വെബ്‌സൈറ്റിന്റെ ഉദ്ഘാടനം നിർവഹിച്ചു. ഫസ്റ്റ് വൈസ് ഡിസ്ട്രിക്ട് ഗവർണർ നിയ മക്കേ ലയൺസ് പ്രസ്ഥാനത്തിന്റെ മൂല്യങ്ങളെക്കുറിച്ച് സന്ദേശം നൽകി.

ക്ലബ്ബിന്റെ സ്ഥാപക ലക്ഷ്യമായ 'ഞങ്ങൾ സേവിക്കുന്നു' എന്ന മുദ്രാവാക്യം മുൻനിർത്തി കഴിഞ്ഞ 30 വർഷമായി സജീവമായി പ്രവർത്തിക്കുന്ന 12 ചാർട്ടർ അംഗങ്ങളെ പ്രശസ്തിപത്രം നൽകി ആദരിച്ചു. കോശി പണിക്കർ, വിക്ടർ എബ്രഹാം, റോയ് ചിറയിൽ, ജോൺ എം. ജോസഫ് (എം.ഡി.), എ.പി. ഹരിദാസ്, ഡോ. അബ്ദുൾ റഷീദ് (പി.എച്ച്.ഡി.), പീറ്റർ ബി. നെറ്റോ, തോമസ് വർഗീസ് (എം.ഡി.), ജോർജ് അഗസ്റ്റിൻ, രാമചന്ദ്രൻ നായർ, എ.വി. തോമസ്, രാജീവ് ജോസഫ് (എം.ഡി.) എന്നിവരാണ് ആദരിക്കപ്പെട്ട അംഗങ്ങൾ. 25 വർഷത്തെ അംഗത്വവും സേവനവും പൂർത്തിയാക്കിയ ജോൺ ജോയിക്കും ചടങ്ങിൽ പ്രത്യേക ആദരം നൽകി.

ക്ലബ് പ്രസിഡന്റ് ജിജോ പേരേപ്പാടൻ, സെക്രട്ടറി കിഷോർ ബുദ്ധെ, ട്രഷറർ സോം തോമസ്, റീജിയണൽ ചെയർ ജോർജ് ജോസഫ്, ബോർഡ് ഓഫ് ഡയറക്ടേഴ്‌സ് അംഗങ്ങൾ എന്നിവരുടെ നേതൃത്വത്തിലാണ് പരിപാടികൾ ആസൂത്രണം ചെയ്തത്. ജീനാ പോൾ മാസ്റ്റർ ഓഫ് സെറിമണിയായിരുന്നു. രാജു കാട്ടടിയും ജീവ കാട്ടടിയും സംഘടിപ്പിച്ച വിവിധ വിനോദ പരിപാടികളും സംഗീതവിരുന്നും വിഭവസമൃദ്ധമായ പോട്ട്‌ലക്ക് അത്താഴവും ആഘോഷങ്ങൾക്ക് മാറ്റ് കൂട്ടി.

ക്ലബ്ബിന്റെ വരാനിരിക്കുന്ന പ്രധാന ജീവകാരുണ്യ സംരംഭമായ 'ചാരിറ്റി നൈറ്റ് 2026' ഒക്ടോബർ 10-ന് നടക്കും. ജോർജ് അഗസ്റ്റിൻ ചെയർമാനായുള്ള ഫണ്ട് റെയ്‌സിങ് പരിപാടിയിലൂടെ സമാഹരിക്കുന്ന തുക ക്ലബ് ബ്രാഞ്ച്, ലിയോ ക്ലബ് സേവന പദ്ധതികൾ, ഹൃദയാഘാത ബോധവത്കരണ സംരംഭം, പ്രൈമറി കെയർ ക്ലിനിക് ഓഫ് ടെക്‌സസ് തുടങ്ങിയ പ്രൊജക്ടുകൾക്കായി വിനിയോഗിക്കുമെന്ന് ഭാരവാഹികൾ അറിയിച്ചു.

Content Highlights: Irving DFW Indian Lions Club celebrated its 30th anniversary and charter members honoring