ഇസ്താംബൂളിൽ നടന്ന കോംസെക് സമ്മേളനത്തിൽ ബഹ്റൈൻ പ്രതിനിധി സംഘത്തെ വ്യവസായ മന്ത്രി നയിച്ചു

മനാമ: തുർക്കി റിപ്പബ്ലിക്കിലെ ഇസ്താംബൂളിൽ ഒക്ടോബർ 31 മുതൽ നവംബർ 3 വരെ നടന്ന ഓർഗനൈസേഷൻ ഓഫ് ഇസ്ലാമിക് കോഓപ്പറേഷന്റെ സാമ്പത്തിക-വാണിജ്യ സഹകരണത്തിനായുള്ള സ്ഥിരം സമിതിയുടെ (കോംസെക്) 42-ാമത് സമ്മേളനത്തിൽ ബഹ്റൈൻ പ്രതിനിധി സംഘത്തിന് വ്യവസായ-വാണിജ്യ മന്ത്രി അബ്ദുള്ള ബിൻ അദെൽ ഫക്രോ നേതൃത്വം നൽകി.

അംഗരാജ്യങ്ങൾ തമ്മിലുള്ള സാമ്പത്തിക-വാണിജ്യ സഹകരണവും ഏകീകരണവും ശക്തിപ്പെടുത്തുന്നതിൽ കോംസെക് വഹിക്കുന്ന പ്രധാന പങ്ക് മന്ത്രി ചൂണ്ടിക്കാട്ടി. സാമ്പത്തിക വളർച്ചയ്ക്കും സുസ്ഥിര വികസനത്തിനും പിന്തുണ നൽകുന്ന സംരംഭങ്ങളിലൂടെയും പരിഹാരങ്ങളിലൂടെയും ആഗോള സാമ്പത്തിക സാഹചര്യങ്ങളെ അഭിസംബോധന ചെയ്യുന്നതിലും സമിതി നിർണായക പങ്ക് വഹിക്കുന്നുണ്ടെന്ന് അദ്ദേഹം പറഞ്ഞു.

സമ്മേളനത്തിനിടെ മന്ത്രി ഫക്രോ തുർക്കി വാണിജ്യ മന്ത്രി പ്രൊഫ. ഡോ. ഒമർ ബൊലാറ്റുമായി കൂടിക്കാഴ്ച നടത്തി. ഇരുരാജ്യങ്ങൾക്കും താൽപ്പര്യമുള്ള വിവിധ വിഷയങ്ങൾ ഇരുവരും ചർച്ച ചെയ്തു.

ആഗോള സമ്പദ്‌വ്യവസ്ഥയിലെ മാറ്റങ്ങളും അവ അംഗരാജ്യങ്ങളിൽ ചെലുത്തുന്ന സ്വാധീനവും, വ്യാപാരം വിപുലീകരിക്കുന്നതിനും സാമ്പത്തിക സഹകരണം ശക്തിപ്പെടുത്തുന്നതിനുമുള്ള മാർഗങ്ങളും മന്ത്രിതല സമ്മേളനത്തിൽ ചർച്ചയായി. അംഗരാജ്യങ്ങൾ തമ്മിലുള്ള കയറ്റുമതി വർധിപ്പിക്കുന്നതിനായി ഫലപ്രദമായ ‘ട്രേഡ് ഫിനാൻസ്’ സംവിധാനങ്ങൾ വികസിപ്പിക്കുന്നതും ചർച്ചാവിഷയമായി. ഈ വിഷയങ്ങളിൽ ആശയങ്ങൾ കൈമാറാൻ സമ്മേളനം അവസരമൊരുക്കി.

അംഗരാജ്യങ്ങൾ തമ്മിലുള്ള സാമ്പത്തിക സഹകരണം മുന്നോട്ടുകൊണ്ടുപോകുന്നതിൽ സ്വകാര്യ മേഖലയുടെ പങ്ക് ശക്തിപ്പെടുത്തുന്നതിനെക്കുറിച്ച് ചർച്ച ചെയ്ത ‘ബിസിനസ് ലീഡേഴ്‌സ് സമ്മിറ്റ് 2026’ഉം സമ്മേളനത്തിന്റെ ഭാഗമായി നടന്നു. ഡിജിറ്റൽ യുഗത്തിൽ കുടുംബങ്ങളെ പിന്തുണയ്ക്കുന്ന നയങ്ങളെക്കുറിച്ചുള്ള പ്രത്യേക പാനൽ ചർച്ചകളും സംഘടിപ്പിച്ചു.

സമ്മേളനത്തോടനുബന്ധിച്ച് നടന്ന പ്രദർശനത്തിൽ കോംസെക്കിന്റെ പിന്തുണയോടെ നടപ്പാക്കിയ വിവിധ പദ്ധതികളെയും പരിപാടികളെയും കുറിച്ചുള്ള അംഗരാജ്യങ്ങളുടെ അനുഭവങ്ങളും അവതരിപ്പിച്ചു.

Content Highlights: Bahrain’s Industry and Commerce Minister led the kingdom’s delegation at the 42nd COMCEC session, where members discussed trade, economic cooperation and private-sector engagement.