ബാങ്ക് വായ്പാ വിതരണത്തിൽ 41 ശതമാനം വർദ്ധനവ് വരുത്തി ബഹ്റൈൻ ഡെവലപ്മെന്റ് ബാങ്ക്
മനാമ:പ്രാദേശിക ഭൗമരാഷ്ട്രീയ അനിശ്ചിതത്വങ്ങളും വായ്പാ തിരിച്ചടവ് മുടങ്ങാനുള്ള സാധ്യതയെക്കുറിച്ചുള്ള ആശങ്കകളും നിലനിൽക്കെത്തന്നെ, കഴിഞ്ഞ വർഷത്തെ അപേക്ഷിച്ച് മാർച്ച് മുതൽ ബഹ്റൈൻ ഡെവലപ്മെന്റ് ബാങ്ക് വായ്പാ വിതരണത്തിൽ ഏകദേശം 41 ശതമാനം വർദ്ധനവ് വരുത്തി. സാമ്പത്തികമായി പ്രയാസകരമായ ഈ ഘട്ടത്തിൽ വായ്പകൾ നിയന്ത്രിക്കുന്നതിന് പകരം, ബിസിനസുകൾക്ക് നൽകുന്ന സാമ്പത്തിക സഹായം വിപുലീകരിക്കാനാണ് ബാങ്ക് തീരുമാനിച്ചത്. ബഹ്റൈന്റെ സാമ്പത്തിക കരുത്തിലുളള വിശ്വാസമാണ് ഇതിലൂടെ പ്രതിഫലിക്കുന്നത്. മാധ്യമപ്രവർത്തകർക്കായി ഒരുക്കിയ ഉച്ചഭക്ഷണ പരിപാടിയിൽ ചീഫ് എക്‌സിക്യൂട്ടീവ് ദലാൽ അൽ ഖൈസ് പറഞ്ഞു. 'ബഹ്റൈനിലെ ബിസിനസുകളിലും, ബഹ്റൈനിൽ പ്രവർത്തിക്കുന്ന സംരംഭങ്ങളിലും ഞങ്ങൾക്കുള്ള വിശ്വാസമാണ് ഇത് കാണിക്കുന്നത്. ബഹ്റൈനിലെ സമ്പദ്വ്യവസ്ഥ കരുത്തുറ്റതാണ്. ഇപ്പോൾ കാണുന്ന പ്രതിസന്ധി ഒരു ഘട്ടം മാത്രമാണ്.'
ബാങ്കിന്റെ മുൻ തന്ത്രപരമായ പദ്ധതിപൂർത്തിയായതിനെത്തുടർന്ന്, 2026, 2029 കാലയളവിലേക്കുള്ള പുതിയ നാല് വർഷത്തെ തന്ത്രം ആവിഷ്‌കരിച്ച സമയത്താണ് ഈ വർദ്ധനവ് ഉണ്ടായിരിക്കുന്നത്. സംരംഭകർക്കും സ്റ്റാർട്ടപ്പുകൾക്കും നൽകുന്ന പിന്തുണ ശക്തിപ്പെടുത്തുന്നതിനൊപ്പം, നിലവിലുള്ള ബിസിനസുകൾക്ക് സാമ്പത്തിക സഹായം തുടരുക എന്ന ഇരട്ട സമീപനമാണ് ഇതിന്റെ കാതൽ.
'താംകീൻ', ഇക്കണോമിക് ഡെവലപ്മെന്റ് ബോർഡ്, വ്യവസായ-വാണിജ്യ മന്ത്രാലയം എന്നിവയുമായുള്ള നിലവിലുള്ള പങ്കാളിത്തത്തെ അടിസ്ഥാനമാക്കിയാണ് ഈ തന്ത്രം രൂപീകരിച്ചിരിക്കുന്നത്. പരമ്പരാഗത ബാങ്കിംഗ് സംവിധാനങ്ങളിലൂടെ സാമ്പത്തിക സഹായം ലഭിക്കാൻ പ്രയാസപ്പെടുന്ന ബിസിനസുകൾക്ക് ഇതിൽ പ്രത്യേക ഊന്നൽ നൽകുന്നു.
'തുടക്കത്തിൽ വലിയ ലാഭമുണ്ടാക്കാൻ സാധ്യതയില്ലാത്തതിനാൽ, സംരംഭകർക്കായി അക്കൗണ്ടുകൾ തുറക്കാൻ പല ധനകാര്യ സ്ഥാപനങ്ങളും മടികാണിക്കാറുണ്ട്,' അൽ ഖൈസ് ചൂണ്ടിക്കാട്ടി. 'ഒരു വികസന സ്ഥാപനം എന്ന നിലയിൽ, ഇത്തരക്കാർക്ക് സേവനം നൽകാൻ ഏറ്റവും അനുയോജ്യമായ സ്ഥാനത്താണ് ഞങ്ങൾ ഉള്ളതെന്ന് വിശ്വസിക്കുന്നു.' ബാങ്കിംഗ് സേവനങ്ങൾ കൂടുതൽ ആളുകളിലേക്ക് എത്തിക്കുക എന്നത് മറ്റൊരു പ്രധാന ലക്ഷ്യമാണ്. സംരംഭകർക്കും ചെറുകിട-ഇടത്തരം സംരംഭങ്ങൾക്കും ഓൺലൈനായി അക്കൗണ്ട് തുറക്കാനുള്ള സൗകര്യം ഏർപ്പെടുത്തിയിട്ടുണ്ട്. കൂടാതെ, ശമ്പള വിതരണം, പണമിടപാടുകൾ, മറ്റ് സേവനങ്ങൾ എന്നിവ ലഭ്യമാക്കുന്ന ഇന്റർനെറ്റ്, മൊബൈൽ ബാങ്കിംഗ് പ്ലാറ്റ്ഫോമുകളും അവതരിപ്പിച്ചു. വലിയ കോർപ്പറേറ്റുകൾക്ക് ലഭിക്കുന്ന പല സേവനങ്ങളും ചെറുകിട ബിസിനസുകൾക്കും ലഭ്യമാക്കുക എന്നതാണ് ഇതിന്റെ ലക്ഷ്യം; അതേസമയം, അവരുടെ വളർച്ചയെ ബാധിച്ചേക്കാവുന്ന അധിക ചെലവുകൾ അടിച്ചേൽപ്പിക്കാതിരിക്കാനും ശ്രദ്ധിക്കുന്നു.
വായ്പാ പ്രവർത്തനങ്ങളെ ബാധിക്കാതെയാണ് ഈ കുറഞ്ഞ നിരക്ക് നിലനിർത്താനായത്. കഴിഞ്ഞ വർഷം മാത്രം ഏകദേശം 30 ദശലക്ഷം ബഹ്റൈനി ദിനാർ വായ്പയായി നൽകി. 'ഞങ്ങൾ ഉപഭോക്താക്കളുമായും അവരുടെ ബിസിനസ്സുമായും വളരെ അടുത്ത ബന്ധം സ്ഥാപിക്കുന്നു; അതുകൊണ്ടുതന്നെ അവർ വായ്പ തിരിച്ചടയ്ക്കുന്നതിൽ വീഴ്ച വരുത്താനുള്ള സാധ്യത വളരെ കുറവാണ്,' അൽ ഖൈസ് വിശദീകരിച്ചു. തിരിച്ചടവുകളിൽ കുറവുണ്ടാകുമ്പോൾ, വായ്പാ ഘടനയിൽ മാറ്റം വരുത്തുക തിരിച്ചടവ് തീയതി നീട്ടിവെക്കുക, വായ്പാ കാലാവധി ദീർഘിപ്പിക്കുക, അല്ലെങ്കിൽ 9 മുതൽ 12 മാസം വരെയുള്ള കാലയളവിലേക്ക് അധിക പ്രവർത്തന മൂലധനം നൽകുക തുടങ്ങിയ ഇടപെടലുകൾ ബാങ്കിന് നടത്താനാകും. താത്കാലികമായ സാമ്പത്തിക പ്രതിസന്ധികൾ ബിസിനസ്സിന്റെ സ്ഥിരമായ തകർച്ചയിലേക്ക് നയിക്കുന്നത് തടയുകയാണ് ഇത്തരം നടപടികളുടെ ലക്ഷ്യം. അടുത്ത തലമുറ സംരംഭകരെ പിന്തുണയ്ക്കുന്നതും അത്രതന്നെ പ്രധാനമാണ്.