'ഗേറ്റ്‌വേ ഗൾഫ് ഇൻവെസ്റ്റ്‌മെന്റ് ഫോറം 2026' ഉദ്ഘാടനം ചെയ്ത് ബഹ്റൈൻ കിരീടാവകാശി
മനാമ: ബഹ്റൈൻ കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫ 'ഗേറ്റ്‌വേ ഗൾഫ് ഇൻവെസ്റ്റ്‌മെന്റ് ഫോറം 2026'-ന്റെ നാലാം പതിപ്പ് ഉദ്ഘാടനം ചെയ്തു. രാജാവ് ഹമദ് ബിൻ ഈസ അൽ ഖലീഫയുടെ നേതൃത്വത്തിൽ തന്ത്രപ്രധാന നിക്ഷേപ പങ്കാളിത്തങ്ങൾ ശക്തിപ്പെടുത്തുന്നതിനും സാമ്പത്തിക സഹകരണം വിപുലീകരിക്കുന്നതിനുമുള്ള പ്രവർത്തനങ്ങൾ ബഹ്റൈൻ തുടരുകയാണെന്ന് അദ്ദേഹം വ്യക്തമാക്കി.
സാമ്പത്തിക ബന്ധങ്ങൾ മെച്ചപ്പെടുത്തുന്നതിനും പ്രാദേശിക, അന്താരാഷ്ട്ര തലങ്ങളിൽ രാജ്യത്തിന്റെ സാമ്പത്തിക സ്ഥാനം കൂടുതൽ ശക്തമാക്കുന്നതിനുമുള്ള ബഹ്റൈന്റെ കാഴ്ചപ്പാടാണ് ഈ ശ്രമങ്ങൾ പ്രതിഫലിപ്പിക്കുന്നതെന്ന് കിരീടാവകാശി പറഞ്ഞു.
അറിവുകളും അനുഭവങ്ങളും കൈമാറുന്നതിനും നിക്ഷേപ അവസരങ്ങൾ പരിചയപ്പെടുത്തുന്നതിനും ഗൾഫ് സഹകരണ കൗൺസിൽ രാജ്യങ്ങളും അന്താരാഷ്ട്ര പങ്കാളികളും തമ്മിലുള്ള സാമ്പത്തിക ബന്ധങ്ങൾ ശക്തിപ്പെടുത്തുന്നതിനും ഇത്തരം ഫോറങ്ങൾ പ്രധാന വേദികളാണെന്ന് അദ്ദേഹം ചൂണ്ടിക്കാട്ടി. ജിസിസി രാജ്യങ്ങൾ തമ്മിലുള്ള സാമ്പത്തിക ഏകീകരണം മുന്നോട്ടുകൊണ്ടുപോകുന്നതിലും സമ്പദ്‌വ്യവസ്ഥ, വ്യാപാരം, നിക്ഷേപം എന്നീ മേഖലകളിലെ സഹകരണം വിപുലീകരിക്കുന്നതിലും വികസന പ്രവർത്തനങ്ങളെ പിന്തുണയ്ക്കുന്നതിലും ഫോറങ്ങൾ നിർണായക പങ്കുവഹിക്കുന്നുണ്ടെന്നും അദ്ദേഹം പറഞ്ഞു.
ആഗോള സമ്പദ്‌വ്യവസ്ഥ നേരിടുന്ന വെല്ലുവിളികളെ അതിജീവിക്കുന്നതിനും ലഭ്യമായ അവസരങ്ങൾ പരമാവധി പ്രയോജനപ്പെടുത്തുന്നതിനും നൂതന തന്ത്രങ്ങളും നടപടികളും വികസിപ്പിക്കേണ്ടതുണ്ട്. ഇതിനായി അന്താരാഷ്ട്ര തലത്തിലുള്ള ഏകോപനവും സഹകരണവും ശക്തിപ്പെടുത്തണമെന്നും അദ്ദേഹം വ്യക്തമാക്കി.
ഫോറത്തിന്റെ നാലാം പതിപ്പിന് ആതിഥേയത്വം വഹിക്കുന്നത് ബഹ്റൈന്റെ സാമ്പത്തിക, നിക്ഷേപ ശേഷികളെയും ബിസിനസിനും നിക്ഷേപത്തിനും അനുയോജ്യമായ രാജ്യത്തെ അന്തരീക്ഷത്തെയും പ്രതിഫലിപ്പിക്കുന്നുവെന്ന് കിരീടാവകാശി പറഞ്ഞു. രാജ്യത്തിന്റെ സാമ്പത്തിക വികസന ലക്ഷ്യങ്ങൾ പിന്തുണയ്ക്കുന്നതിനായി മികച്ച നിക്ഷേപങ്ങൾ ആകർഷിക്കുകയും പ്രമുഖ നിക്ഷേപ കേന്ദ്രമെന്ന നിലയിൽ ബഹ്റൈന്റെ സ്ഥാനം ശക്തിപ്പെടുത്തുകയും ചെയ്യേണ്ടതിന്റെ പ്രാധാന്യവും അദ്ദേഹം ചൂണ്ടിക്കാട്ടി.
20 ബില്യൺ ഡോളറിലധികം മൂല്യമുള്ള പ്രഖ്യാപനങ്ങൾ
ഫോറത്തിലെ മുഖ്യപ്രഭാഷണത്തിൽ ധനകാര്യ, ദേശീയ സമ്പദ്‌വ്യവസ്ഥാ മന്ത്രി ഷെയ്ഖ് സൽമാൻ ബിൻ ഖലീഫ അൽ ഖലീഫ ബഹ്റൈന്റെ വ്യാപാര ചരിത്രവും സാമ്പത്തിക വളർച്ചയും വിശദീകരിച്ചു.
ആയിരക്കണക്കിന് വർഷങ്ങളായി മുത്തുവാരുന്നവരും വ്യാപാരികളും സഞ്ചാരികളും ബഹ്റൈനിൽ ഒത്തുചേർന്നിരുന്നുവെന്നും തുറന്ന മനസ്സും വലിയ അഭിലാഷങ്ങളും പങ്കുവെച്ചിരുന്നുവെന്നും അദ്ദേഹം പറഞ്ഞു. വരുംതലമുറയ്ക്കായി മെച്ചപ്പെട്ട ഭാവി കെട്ടിപ്പടുക്കാൻ ആളുകൾ ഒരുമിക്കുമ്പോഴാണ് ഏറ്റവും മികച്ച നേട്ടങ്ങൾ കൈവരിക്കാനാകുന്നതെന്നും അദ്ദേഹം കൂട്ടിച്ചേർത്തു.
കഴിഞ്ഞ ഒരു വർഷത്തിനിടെ ഗൾഫ് സമ്പദ്‌വ്യവസ്ഥകളും ജനങ്ങളും അഭൂതപൂർവമായ വെല്ലുവിളികൾ നേരിട്ടെങ്കിലും മേഖല ഉറച്ചുനിന്നു. സഖ്യകക്ഷികളുമായും പങ്കാളികളുമായും കൂടുതൽ അടുത്ത് സഹകരിക്കാനും നിലവിലുള്ള നേട്ടങ്ങൾ സംരക്ഷിക്കാനും വരുംതലമുറകൾക്കായി ശോഭനമായ ഭാവി ഉറപ്പാക്കാനുമുള്ള തീരുമാനമാണ് ഈ സാഹചര്യത്തിൽ കൈക്കൊണ്ടതെന്നും അദ്ദേഹം വ്യക്തമാക്കി.
ഫോറത്തിന്റെ അടുത്ത രണ്ട് ദിവസങ്ങളിലായി 20 ബില്യൺ യുഎസ് ഡോളറിലധികം മൂല്യമുള്ള 110-ലധികം പ്രഖ്യാപനങ്ങൾ ഉണ്ടാകുമെന്ന് മന്ത്രി അറിയിച്ചു. പുതിയ പങ്കാളിത്തങ്ങൾ, നിക്ഷേപങ്ങൾ, പദ്ധതികൾ, തൊഴിലവസരങ്ങൾ എന്നിവ പ്രഖ്യാപനങ്ങളിൽ ഉൾപ്പെടും.
ഗൾഫ് മേഖലയിലെ മൊത്ത ആഭ്യന്തര ഉൽപ്പാദനം 2.4 ട്രില്യൺ യുഎസ് ഡോളറായി വളർന്നിട്ടുണ്ട്. ബഹ്റൈന്റെ ജിഡിപിയുടെ 86 ശതമാനത്തിലധികവും ഗൾഫ് മേഖലയിലുടനീളം 77 ശതമാനത്തിലധികവും എണ്ണ ഇതര മേഖലകളിൽ നിന്നാണ്. ഗൾഫ് ബാങ്കുകളുടെ ആസ്തി നാല് ട്രില്യൺ യുഎസ് ഡോളറിലധികമാണ്. മേഖലയിലെ പരമാധികാര സമ്പത്ത് ഫണ്ടുകൾ അഞ്ച് ട്രില്യൺ യുഎസ് ഡോളറിലധികം മൂല്യമുള്ള നിക്ഷേപങ്ങൾ കൈകാര്യം ചെയ്യുന്നുണ്ടെന്നും അദ്ദേഹം പറഞ്ഞു.
ഗൾഫ് മേഖലയിലേക്കുള്ള കവാടമെന്ന നിലയിൽ ബഹ്റൈൻ സ്വന്തം സ്ഥാനത്തെ വിലമതിക്കുന്നുവെന്നും അത് നിലനിർത്തുന്നതിനായി നിക്ഷേപകർക്ക് പ്രധാനപ്പെട്ട മേഖലകളിൽ തുടർച്ചയായി നിക്ഷേപം നടത്തുകയാണെന്നും മന്ത്രി വ്യക്തമാക്കി.
ഷെയ്ഖ് സൽമാൻ ബിൻ ഖലീഫ അൽ ഖലീഫ, യുഎഇ സാമ്പത്തിക-ടൂറിസം മന്ത്രി അബ്ദുള്ള ബിൻ തൗഖ് അൽ മർരി, ജിസിസി സെക്രട്ടറി ജനറൽ ജാസിം മുഹമ്മദ് അൽ ബുദൈവി എന്നിവർ പങ്കെടുത്ത ചർച്ചാ പാനലിലും അദ്ദേഹം പങ്കെടുത്തു.
നാല് പദ്ധതികൾക്ക് ഗോൾഡൻ ലൈസൻസ്
ഉദ്ഘാടന ചടങ്ങിൽ ബഹ്റൈനിലെ നാല് പുതിയ പദ്ധതികൾക്ക് ഗോൾഡൻ ലൈസൻസ് നൽകുന്നതായി പ്രഖ്യാപിച്ചു. 3.89 ബില്യൺ യുഎസ് ഡോളർ മൂല്യമുള്ള നിക്ഷേപമാണ് ഈ പദ്ധതികളിലൂടെ രാജ്യത്തെത്തുന്നത്.
ഡിഎച്ച്എൽ സ്ഥാപിക്കുന്ന പ്രാദേശിക വിമാന മെയിന്റനൻസ്, റിപ്പയർ, ഓവർഹോൾ (എംആർഒ) കേന്ദ്രം ഇതിൽ ഉൾപ്പെടുന്നു. എയർ ഏഷ്യയുടെ മാതൃകമ്പനിയായ ക്യാപിറ്റൽ എ നടപ്പാക്കുന്ന പദ്ധതിയും ഗോൾഡൻ ലൈസൻസ് ലഭിച്ചവയിൽ ഉൾപ്പെടുന്നു.
ക്യാപിറ്റൽ എയുടെ പദ്ധതിയിലൂടെ എയർ ഏഷ്യ, ടെലിപോർട്ട്, ഏഷ്യ ഡിജിറ്റൽ എൻജിനീയറിങ് എന്നിവയുടെ പ്രവർത്തനങ്ങളും സേവനങ്ങളും ബഹ്റൈനിൽ ആരംഭിക്കും. യാത്രാ, ചരക്ക് ഗതാഗത സൗകര്യങ്ങൾ മെച്ചപ്പെടുത്തുന്നതിനും വിമാന പരിപാലന, അറ്റകുറ്റപ്പണി സംവിധാനങ്ങൾ വികസിപ്പിക്കുന്നതിനും പദ്ധതി സഹായകമാകും.
ഫോറത്തോടനുബന്ധിച്ച് സംഘടിപ്പിച്ച പ്രദർശനവും പ്രിൻസ് സൽമാൻ ബിൻ ഹമദ് അൽ ഖലീഫ സന്ദർശിച്ചു. വിവിധ മേഖലകളിലെ പ്രധാന നിക്ഷേപ അവസരങ്ങളെക്കുറിച്ചും തന്ത്രപ്രധാന പദ്ധതികളെക്കുറിച്ചും അദ്ദേഹത്തിന് വിശദീകരണം നൽകി. ലോകമെമ്പാടുമുള്ള രാജ്യങ്ങളുമായും കമ്പനികളുമായും സാമ്പത്തിക സഹകരണവും പങ്കാളിത്തവും ശക്തിപ്പെടുത്തുന്നതിൽ ഈ പദ്ധതികൾ വഹിക്കുന്ന പങ്കും വിശദീകരിച്ചു.
Content Highlights: Bahrain Crown Prince Salman bin Hamad Al Khalifa inaugurates Gateway Gulf Investment Forum 2026, featuring over $20 billion in investment announcements.