നെതന്യാഹു അല്ലങ്കിൽ പിന്നാര്? തുറുപ്പ് ഗുലാനിറക്കി ഇസ്രയേലി ഇടതുപക്ഷം

നെതന്യാഹുവിന്റെ തീവ്രവലതുപക്ഷ സർക്കാരിനെ അധികാരത്തിൽനിന്ന് പുറത്താക്കാൻ അറബ് പാർട്ടികളുമായി സഹകരിക്കാൻ തയ്യാറാണെന്ന് പ്രഖ്യാപിച്ചിരിക്കുകയാണ് ഇടതുപക്ഷ നേതാവ് യെയർ ഗോലാൻ. തിരഞ്ഞെടുപ്പ് പ്രചാരണത്തിനിടയിൽ തനിക്ക് നേരെ കത്തിയുമായി ഒരാൾ അടുത്തെത്തിയ സംഭവത്തെക്കുറിച്ച് പരാമർശിച്ചുകൊണ്ടാണ് ഗോലാൻ തന്റെ നിലപാട് വ്യക്തമാക്കിയത്. തിരഞ്ഞെടുപ്പിൽ ഗോലാന്റെ നേതൃത്വത്തിലുള്ള 'ഡെമോക്രാറ്റ്‌സ്' പാർട്ടി 8 സീറ്റുകൾ നേടി മികച്ച മുന്നേറ്റമാണ് കാഴ്ചവെച്ചിരിക്കുന്നത്.

വർഷങ്ങളായി ഇസ്രയേലിലെ അറബ് പൗരന്മാർക്ക് തിരഞ്ഞെടുപ്പ് എന്നാൽ വെറുമൊരു ചടങ്ങായിരുന്നു. 'ആര് ഭരിച്ചാലും തങ്ങളുടെ ജീവിതത്തിൽ ഒരു മാറ്റവുമില്ല, ജൂത രാഷ്ട്രീയക്കാർ തങ്ങളെ രണ്ടാംതരം പൗരന്മാരായിട്ടേ കാണൂ' എന്ന കടുത്ത നിരാശ അവരെ പോളിങ് ബൂത്തുകളിൽനിന്ന് അകറ്റിനിർത്തിയിരുന്നു. കേവലം 50 ശതമാനം പോളിങ്ങാണ് അറബ് മേഖലകളിൽ കണ്ടിരുന്നത്.

എന്നാൽ ഇത്തവണ ഭരണകൂടത്തിന്റെ വംശീയ നയങ്ങളും കടുത്ത വിവേചനവും അവരെ മാറിച്ചിന്തിക്കാൻ പ്രേരിപ്പിച്ചു. ബെഞ്ചമിൻ നെതന്യാഹുവും അദ്ദേഹത്തിന്റെ തീവ്രവലതുപക്ഷ മന്ത്രിമാരായ ഇറ്റാമർ ബെൻ-ഗ്വീറും ബെസാലെൽ സ്‌മോട്രിച്ചും മറയില്ലാതെതന്നെ അറബ് വംശജരെ അപരവത്കരിക്കുമ്പോൾ ഇസ്രയേലിലെ 20 ശതമാനം വരുന്ന അറബ് വംശജർ തങ്ങളുടെ വോട്ട് ഒരു പ്രതിരോധ ആയുധമാക്കാൻ തീരുമാനിച്ചു. വെസ്റ്റ് ബാങ്കിലെയും ഗാസയിലെയും തങ്ങളുടെ സഹോദരങ്ങൾക്ക് വോട്ടവകാശമില്ലാത്ത സാഹചര്യത്തിൽ, ഇസ്രായേലിനകത്തുള്ള അറബ് പൗരന്മാർക്ക് തങ്ങളുടെ വോട്ടിന്റെ വില കൃത്യമായി ബോധ്യപ്പെട്ടു.

ഏറ്റവും പുതിയ കണക്കുകൾപ്രകാരം ബെഞ്ചമിൻ നെതന്യാഹുവിന്റെ നേതൃത്വത്തിലുള്ള ഭരണസഖ്യത്തിന്റെ ഭൂരിപക്ഷം 65 സീറ്റുകളിൽനിന്ന് 55 സീറ്റുകളായി കുറഞ്ഞു. അതേസമയം, പ്രതിപക്ഷ കക്ഷികളും മികച്ച വിജയം നേടിയ അറബ് പാർട്ടികളും കൈകോർത്താൽ മൊത്തം 65 സീറ്റുകളുടെ വ്യക്തമായ ഭൂരിപക്ഷം നേടാൻ സാധിക്കുമെന്ന് യായർ ഗോളൻ ചൂണ്ടിക്കാണിക്കുന്നു.

വോട്ടിങ് ദിവസം അറബ് നഗരങ്ങളിലൂടെ യാത്രചെയ്തവരെ വിസ്മയിപ്പിച്ച ഒരു കാഴ്ച ഇതായിരുന്നു; പോളിങ് ബൂത്തുകളിൽ വയോധികർ, വീൽചെയറിലിരുന്നവർ, സ്ത്രീകൾ, യുവാക്കൾ എന്നിവരടങ്ങുന്ന നീളൻ ക്യൂ. വടക്കൻ ഇസ്രയേലിലെ ഉമ്മുൽ ഫഹീം നഗരത്തിൽ കഴിഞ്ഞ തവണ വെറും 38.3 ശതമാനം പോളിങ് രേഖപ്പെടുത്തിയെങ്കിൽ ഇത്തവണ അത് 75.7 ശതമാനമായി ഉയർന്നു. യേശുക്രിസ്തുവിന്റെ ജീവിതവുമായി ബന്ധപ്പെട്ട ചരിത്രപ്രസിദ്ധമായ നസ്രത്ത് നഗരത്തിൽ വോട്ടിങ് ശതമാനം 48.3-ൽനിന്ന് 72.2 ശതമാനമായി ഉയർന്നു.

ഈ ജനകീയ മുന്നേറ്റത്തിന്റെ ഫലമായി അറബ് ഇടതുപക്ഷ കൂട്ടായ്മയായ 'ജോയിന്റ് ലിസ്റ്റ്' 12 സീറ്റുകളും, ഇസ്ലാമിസ്റ്റ് പാർട്ടിയായ 'റാം' 7 സീറ്റുകളും നേടിയതോടെ ചരിത്രത്തിലാദ്യമായി 19 സീറ്റുകളുമായി അറബ്-കമ്യൂണിസ്റ്റ്-ജൂത ഇടതുപക്ഷ ചേരി നിർണായക ശക്തിയായി മാറി.

നെസറ്റിലെ സമവാക്യങ്ങളും ഇടതുപക്ഷത്തിന്റെ പുതിയ കരുത്തും

സയണിസ്റ്റ് ഇടതുപക്ഷ പാർട്ടിയായ 'ഡെമോക്രാറ്റ്‌സ്' ഈ തിരഞ്ഞെടുപ്പിൽ വളരെ ശക്തമായ നിലപാടാണ് സ്വീകരിച്ചിരിക്കുന്നത്. വോട്ടെണ്ണൽ കഴിഞ്ഞയുടൻ യെയർ ഗോലാൻ നെതന്യാഹുവിനെ ഉന്നംവെച്ച് പറഞ്ഞത്, 'നിങ്ങൾ ഞങ്ങളെ സയണിസം പഠിപ്പിക്കേണ്ട' എന്നാണ്. ഇസ്രയേലിലെ അറബ് പൗരന്മാരുമായി കൈകോർത്ത് ഒരു മാറ്റത്തിന്റെ സർക്കാർ രൂപവത്കരിക്കാനുള്ള ചരിത്രപരമായ അവസരമാണിതെന്ന് ഗോലാൻ പ്രഖ്യാപിച്ചു.

ഐസൻകോട്ടിന്റെയും നഫ്താലി ബെന്നറ്റിന്റെയും ആശയക്കുഴപ്പങ്ങൾ

പക്ഷേ, ഇസ്രയേൽ രാഷ്ട്രീയത്തിലെ പ്രധാന തടസ്സം കടുത്ത വംശീയ മുൻവിധികളാണ്. പ്രതിപക്ഷത്തിന് ഭൂരിപക്ഷമുണ്ടെങ്കിലും, പ്രതിപക്ഷ നേതാവും മുൻ സൈനിക മേധാവിയുമായ ഗാഡി ഐസൻകോട്ട്, മുൻ പ്രധാനമന്ത്രി നഫ്താലി ബെന്നറ്റ് എന്നിവർ തിരഞ്ഞെടുപ്പിന് മുൻപ് 'ഞങ്ങൾ അറബ് പാർട്ടികളുടെ പിന്തുണയോടെ ഭരിക്കില്ല' എന്ന് വോട്ടർമാർക്ക് വാഗ്ദാനംനൽകിയിരുന്നു. ഈ വാഗ്ദാനമാണ് ഇപ്പോൾ അവരെ കുഴപ്പത്തിലാക്കിയിരിക്കുന്നത്.

അറബ് പാർട്ടികളെ നേരിട്ട് മന്ത്രിസഭയിൽ ഉൾപ്പെടുത്താതെ, പുറത്തുനിന്നുള്ള പിന്തുണയോടെ ഒരു ന്യൂനപക്ഷ സർക്കാർ രൂപവത്കരിക്കുക എന്നതാണ് ഐസൻകോട്ടിന് മുന്നിലുള്ള ഒരു വഴി. 1993-ൽ യിഷാക് റാബിൻ ഇത്തരമൊരു പരീക്ഷണം നടത്തി വിജയിച്ചിട്ടുണ്ട്. ജോയിന്റ് ലിസ്റ്റ് തലവൻ ഇതിന് തയ്യാറാണെന്ന് അറിയിച്ചിട്ടുമുണ്ട്. എന്നാൽ അറബ് പാർട്ടികളുമായി സഖ്യമുണ്ടാക്കിയാൽ തങ്ങളുടെ ജൂത വോട്ടർമാർ അടുത്ത തവണ കൈവിടാൻ സാധ്യതയുണ്ടെന്ന് ബെന്നറ്റും ലിബർമാനും ഭയപ്പെടുന്നു.

ഈ ചരിത്രപരമായ അവസരം നഷ്ടപ്പെടുത്തിയാൽ രാജ്യം വീണ്ടും തിരഞ്ഞെടുപ്പിലേക്ക് പോകുമെന്നും, അത് രാഷ്ട്രീയ കുതന്ത്രങ്ങളിൽ അതിവിദഗ്ധനായ നെതന്യാഹുവിന് വീണ്ടും അധികാരത്തിൽ വരാൻ വഴിയൊരുക്കുമെന്നും ഇടതുപക്ഷം മുന്നറിയിപ്പ് നൽകി.

വലതുപക്ഷ സയണിസത്തിനെതിരെയുള്ള ഇടതുപക്ഷത്തിന്റെ പോരാട്ട പാരമ്പര്യം

തീവ്ര വലതുപക്ഷ സയണിസത്തിനെതിരേ സോഷ്യലിസത്തിന്റെയും ജൂത-അറബ് സാഹോദര്യത്തിന്റെയും വലിയൊരു പാരമ്പര്യം ഇസ്രയേലിലുണ്ട്. ഇസ്രയേൽ രൂപവത്കരണത്തിനുശേഷമുള്ള 30 വർഷം ഭരിച്ചത് ഡേവിഡ് ബെൻ-ഗൂരിയന്റെ നേതൃത്വത്തിലുള്ള സോഷ്യലിസ്റ്റ് ലേബർ പ്രസ്ഥാനങ്ങളായിരുന്നു. എന്നാൽ കാലക്രമേണ രാജ്യം വലതുപക്ഷ ദേശീയതയിലേക്ക് വഴിമാറി.

ഈ ചരിത്രത്തിലെ ഏറ്റവും ശ്രദ്ധേയമായ അധ്യായമാണ് ഇസ്രയേൽ കമ്യൂണിസ്റ്റ് പാർട്ടിയായ 'മകി' (Maki)-യുടെ കഥ. ജൂതനും അറബിയും ഒന്നിച്ച് ചുവപ്പുകൊടിയേന്തിയ പ്രസ്ഥാനമായിരുന്നു അത്. മോഷെ സ്‌നെ എന്ന കമ്യൂണിസ്റ്റ് നേതാവിന്റെ ജീവിതം ഇതിനുദാഹരണമാണ്. ആദ്യം സയണിസ്റ്റ് സൈനിക സംഘടനയായ ഹഗാനയുടെ തലവനായിരുന്ന സ്‌നെ, പിന്നീട് സോവിയറ്റ് യൂണിയന്റെയും സോഷ്യലിസത്തിന്റെയും ആശയങ്ങളിൽ ആകൃഷ്ടനായി കമ്യൂണിസ്റ്റ് പാർട്ടിയുടെ അമരത്തെത്തി. 1965-ൽ പാർട്ടി പിളർന്നപ്പോഴും, ഇസ്രയേലിന്റെ അധിനിവേശ നയങ്ങൾക്കെതിരേ അറബ് പൗരന്മാരുടെ അവകാശങ്ങൾക്കായി ജൂത കമ്യൂണിസ്റ്റുകൾ തെരുവിൽ പോരാടി. ഈ കമ്യൂണിസ്റ്റ് പാരമ്പര്യത്തിന്റെ ഇന്നത്തെ തുടർച്ചയാണ് ഹദാഷ് പാർട്ടിയും ജോയിന്റ് ലിസ്റ്റും.

യഥാർഥ കിങ് മേക്കർമാർ

അധികാരം നിലനിർത്താൻ ഏത് അടവും സ്വീകരിക്കാനുള്ള കഴിവിൽ നെതന്യാഹുവിനെ വെല്ലാൻ വേറെ ആളുണ്ടാവില്ല. പ്രതിപക്ഷത്തുള്ള പലരെയും കൂറുമാറ്റി കൂടെക്കൂട്ടാൻ അദ്ദേഹം ഇതിനകംതന്നെ ശ്രമം തുടങ്ങിയിട്ടുണ്ട്. റാം പാർട്ടിയുടെ ചില നേതാക്കളെപ്പോലും തങ്ങളുടെ പാളയത്തിലെത്തിക്കാൻ ലിക്കുഡ് പാർട്ടി ശ്രമിക്കുന്നുണ്ടെന്ന വാർത്തകൾ പുറത്തുവരുന്നു.

പക്ഷേ, ഇത്തവണ ഇടതുപക്ഷത്തിനും അറബ് പാർട്ടികൾക്കും ഒരു കാര്യത്തിൽ വ്യക്തതയുണ്ട്; അത് നെതന്യാഹുവിന്റെ വംശീയ ഭരണത്തിന് അന്ത്യംകുറിക്കുക എന്നതുമാത്രമാണ്. നെതന്യാഹുവിന് ഒറ്റയ്ക്ക് ഭൂരിപക്ഷം തികയ്ക്കാൻ കഴിയാത്ത ഈ സാഹചര്യത്തിൽ, ഇസ്രയേലിന്റെ ഭാവി നിശ്ചയിക്കുന്ന യഥാർഥ കിങ് മേക്കർമാരായി അറബ്-ജൂത ഇടതുപക്ഷം മാറിയിരിക്കുന്നു. ഈ ചരിത്രസന്ധിയിൽ പ്രതിപക്ഷത്തെ ജൂത നേതാക്കൾ തങ്ങളുടെ വംശീയ മുൻവിധികൾ മാറ്റിവെച്ച് ഇടതുപക്ഷത്തോടൊപ്പം നിൽക്കുമോ, അതോ രാജ്യം വീണ്ടുമൊരു തിരഞ്ഞെടുപ്പിലേക്ക് പോകുമോ എന്നാണ് ലോകം ഉറ്റുനോക്കുന്നത്.

Content Highlights: Left-wing leader Yair Golan is willing to ally with Arab parties to remove Benjamin Netanyahu's far-right government., Arab voter turnout significantly increased, resulting in Arab and left-wing parties securing 19 crucial seats., Netanyahu's governing coalition majority dropped from 65 to 55 seats., Right-wing opposition figures face dilemmas regarding whether to accept support from Arab parties.