‘കരാർ പാലിച്ചില്ലെങ്കിൽ ഇറാനുമേൽ കനത്ത ബോംബാക്രമണം’; ഒപ്പിട്ടതിന് പിന്നാലെ വീണ്ടും ട്രംപിന്റെ ഭീഷണി

പാരീസ്: ഇറാനുമായുള്ള സമാധാനക്കാരാറിൽ ഒപ്പിട്ടതിന് പിന്നാലെ പുതിയ ഭീഷണിയുമായി പ്രസിഡന്റ് ട്രംപ്. കരാർ പാലിച്ചില്ലെങ്കിൽ ഇറാനുമേൽ ബോംബിടുമെന്ന് ട്രംപ് മുന്നറിയിപ്പ് നൽകി. ‘എനിക്ക് അവരെ വേണ്ട, കരാറിനെ അവർ ബഹുമാനിക്കണമെന്നാണ് ഞാൻ ആഗ്രഹിക്കുന്നത്’, എന്നും വാർത്താസമ്മേളനത്തിൽ ട്രംപ് പറഞ്ഞു.

അമേരിക്കയും ഇറാനും തമ്മിലുള്ള സമാധാനക്കരാർ ഇരുരാജ്യങ്ങളിലേയും പ്രസിഡന്റുമാർ ചേർന്ന് ഒപ്പുവെച്ചതിന് പിന്നാലെയാണ് ട്രംപിന്റെ പുതിയ ഭീഷണിയും പുറത്തുവന്നിരിക്കുന്നത്. കരാറിന്റെ വിശദാംശങ്ങൾ പുറത്തുവന്നിട്ടുണ്ട്. ഇതുപ്രകാരം അന്തിമധാരണയിലെത്താൻ ഇരൂകൂട്ടർക്കും 60 ദിവസം ലഭിക്കും. കരാർ ഒപ്പുവെച്ചതിന് ശേഷം ജി7 വേദിയിൽ വെച്ചാണ് ട്രംപ് വാർത്താസമ്മേളനം നടത്തിയത്.

കരാറിന്റെ നിബന്ധനകൾ പാലിക്കാൻ ടെഹ്‌റാൻ തയ്യാറാവുന്നില്ലെങ്കിൽ സൈനിക നടപടികൾ പുനരാരംഭിക്കാൻ അമേരിക്ക മടിക്കില്ല. കരാർ ലംഘിച്ചാൽ ഇറാനുമേൽ ബോംബിടും. ഇറാൻ ജനത മിടുക്കരാണെന്നും അടുത്ത 60 ദിവസത്തെ ചർച്ചകളിലൂടെ ശാശ്വതമായ പരിഹാരത്തിനും സമാധാനത്തിനും വഴിതെളിയുമെന്നും ട്രംപ് പറഞ്ഞു.

കരാർ ഒപ്പിടുന്നതിന് മുൻപും ട്രംപ് സമാനമായ ഭീഷണി മുഴക്കിയിരുന്നു. കരാർ പാലിച്ചില്ലെങ്കിൽ ഇറാനെ വെടിവെച്ച് തിരികെവരും, കരാറിൽ പ്രതികൂല സമീപനമാണ് ഇറാൻ സ്വീകരിക്കുന്നതെങ്കിൽ അവരുടെ തലയിൽ ബോംബുകൾ വർഷിക്കും. കാരണം, കഴിഞ്ഞ 47 വർഷമായി അവർ മോശമായി പെരുമാറുകയാണെന്നും ട്രംപ് പറഞ്ഞിരുന്നു.

ഇറാൻ നേതാക്കൾ ആരും ട്രംപിന്റെ പുതിയ പ്രസ്താവനകളോട് പ്രതികരിച്ചില്ല. പകരം, കരാറിന്റെ ചിത്രങ്ങൾ പുറത്തുവിട്ടാണ് അവർ കരാർ ഒപ്പിട്ടത് ആഘോഷിച്ചത്.

Content Highlights: President Trump issued a stern warning to Iran following the signing of a peace agreement., The agreement provides a 60-day window for both nations to reach a final consensus., Trump threatened military strikes if Tehran fails to adhere to the agreed terms., Iranian leadership has not yet responded, focusing instead on the historic nature of the signed deal.