‘ഭാര്യ മോശമായാണ് മാക്രോണിനെ പരിഗണിക്കുന്നത്’, ഫ്രാൻസ് സൈനികസഹായം നൽകാത്തതിൽ പരിഹാസവുമായി ട്രംപ്

വാഷിങ്ടൺ: ഇറാനെതിരായ യുദ്ധത്തിൽ യുഎസിനെ പിന്തുണയ്ക്കാൻ വിസമ്മതിച്ച‌തിൽ നാറ്റോ സഖ്യകക്ഷികളെ വിമർശിച്ചതിനൊപ്പം ഫ്രഞ്ച് പ്രസിഡന്റ് ഇമ്മാനുവൽ മാക്രോണിനെയും അദ്ദേഹത്തിന്റെ പത്നി ബ്രിജിറ്റ് മാക്രോണിനെയും പരിഹസിച്ച് യുഎസ് പ്രസിഡന്റ് ഡൊണാൾഡ് ട്രംപ്.

"ഞാൻ ഫ്രാൻസുമായി ബന്ധപ്പെട്ടു, മാക്രോണിന്റെ ഭാര്യ അദ്ദേഹത്തെ വളരെ മോശമായാണ് പരിഗണിക്കുന്നത്. താടിയിൽ തട്ടുകിട്ടിയത് സുഖപ്പെട്ട് വരുന്നതേയുള്ളൂ ," വൈറ്റ് ഹൗസ് യൂട്യൂബ് ചാനലിൽ ഒരു വീഡിയോയിൽ ട്രംപ് പറഞ്ഞു.

2025 മേയ് മാസത്തിൽ പുറത്തുവന്ന ഒരു വീഡിയോയിൽ ബ്രിജിറ്റ് മാക്രോൺ വിയറ്റ്നാം സന്ദർശനത്തിനിടെ ഫ്രഞ്ച് പ്രസിഡന്റിന്റെ മുഖത്ത് തട്ടുന്നതായി കാണാമായിരുന്നു. ഇത് ഒരു തെറ്റായ പ്രചാരണമാണെന്ന് ചൂണ്ടിക്കാട്ടി മാക്രോൺ പിന്നീട് ഇക്കാര്യം നിഷേധിക്കുകയും ചെയ്തു.

പശ്ചിമേഷ്യയിലെ സംഘർഷത്തിനിടെ ഫ്രാൻസിനോട് വ്യക്തിപരമായി സൈനികസഹായം ആവശ്യപ്പെട്ടെന്നും എന്നാൽ ഉടൻ പങ്കുചേരാൻ ഫ്രാൻസ് വിസമ്മതിച്ചെന്നും ട്രംപ് അവകാശപ്പെട്ടു."ഞങ്ങൾക്ക് അവരെ ആവശ്യമില്ലായിരുന്നു, പക്ഷേ ഞാൻ ചോദിച്ചു," യുഎസ് സൈന്യം ഇതിനകം യുദ്ധക്കളത്തിൽ വിജയം നേടുന്നുണ്ടെന്നും ട്രംപ് പറഞ്ഞു.

"ഞാൻ പറഞ്ഞു, 'ഇമ്മാനുവൽ, ഗൾഫിൽ ഞങ്ങൾക്ക് കുറച്ച് സഹായം ലഭിക്കാൻ ഞങ്ങൾ ആഗ്രഹിക്കുന്നു, കാരണം ഞങ്ങൾ മോശം ആളുകളെയും ബാലിസ്റ്റിക് മിസൈലുകളെയും നശിപ്പിക്കുന്നതിൽ റെക്കോഡുകൾ സൃഷ്ടിക്കുകയാണ്. നിങ്ങൾക്ക് കഴിയുമെങ്കിൽ, ദയവായി ഉടൻ കപ്പലുകൾ അയക്കാമോ?” ട്രംപ് പറഞ്ഞു.

പിന്നീട് ട്രംപ് മാക്രോണിന്റെ മറുപടി ഫ്രഞ്ച് ഉച്ചാരണത്തിൽ അനുകരിച്ചു: "'ഇല്ല ഇല്ല ഇല്ല, ഞങ്ങൾക്ക് അത് ചെയ്യാൻ കഴിയില്ല, ഡൊണാൾഡ്. യുദ്ധം ജയിച്ചതിന് ശേഷം ഞങ്ങൾക്ക് അത് ചെയ്യാൻ കഴിയും.'" "യുദ്ധം ജയിച്ചതിന് ശേഷം എനിക്ക് വേണ്ട, ഇമ്മാനുവൽ," ട്രംപ് പറഞ്ഞു.

പ്രധാന സംഘർഷങ്ങളിൽ നാറ്റോയുടെ വിശ്വസനീയതയെ ചോദ്യം ചെയ്യാൻ ട്രംപ് ഈ സംഭവം ഉപയോഗിച്ചു."അതുകൊണ്ട് ഞാൻ നാറ്റോയെക്കുറിച്ച് പഠിച്ചു. നമുക്ക് വലിയ അപകടം സംഭവിച്ചാൽ നാറ്റോ അവിടെ ഉണ്ടാകില്ല," ട്രംപ് പറഞ്ഞു.

ഇറാൻ യുദ്ധം അവസാനിച്ച ശേഷം നാറ്റോയുമായുള്ള ബന്ധം പുനഃപരിശോധിച്ചേക്കുമെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോയും സൂചിപ്പിച്ചു.

Content Highlights: Trump criticizes NATO allies for lack of support in the 2026 Iran conflict., Personal remarks made by Trump regarding French President Macron and his wife., Trump challenges the reliability of NATO during critical military engagements., US Secretary of State Marco Rubio hints at a potential NATO policy review post-conflict.