ഗാസ, യുക്രൈൻ വിഷയങ്ങളില് പരാജയമെങ്കിലും യുഎന് നിര്ണായകസ്ഥാപനം, സാധ്യതയുടെ പ്രതീകം- ശശി തരൂര്
കേപ്ടൗൺ: ആഗോളവിഷയങ്ങളിൽ ഐക്യരാഷ്ട്രസഭ (യുഎൻ)യുടെ സാന്നിധ്യവും പ്രവർത്തനവും അനിവാര്യമാണെന്ന് കോൺഗ്രസ് എംപി ശശി തരൂർ. ഗാസ, യുക്രൈൻ വിഷയങ്ങളിലെ പരാജയങ്ങൾക്കിടയിലും ഐക്യരാഷ്ട്രസഭ നിർണായകമായി തുടരുന്നുവെന്നും കൂട്ടായ പ്രവർത്തനം ആവശ്യമായ സങ്കീർണ്ണ വെല്ലുവിളികളെ രാഷ്ട്രങ്ങൾ അഭിമുഖീകരിക്കുമ്പോൾ കൂടുതൽ പ്രാതിനിധ്യമുള്ളതും ഫലപ്രദവുമായ ഒരു സ്ഥാപനമായി അത് മാറണമെന്നും ശശി തരൂർ പറഞ്ഞു. ഐക്യരാഷ്ട്രസഭയുടെ മുൻ അണ്ടർ സെക്രട്ടറി ജനറലാണ് തരൂർ. കേപ്ടൗണിൽ നടന്ന 15-ാമത് ഡെസ്മണ്ട് ടുട്ടു അന്താരാഷ്ട്ര സമാധാന പ്രഭാഷണത്തിൽ സംസാരിക്കുകയായിരുന്നു അദ്ദേഹം. ഐക്യരാഷ്ട്രസഭയിൽ നിന്ന് പിന്മാറുന്നത് ആഗോള സമൂഹത്തെ ഒന്നിപ്പിക്കുന്ന പൊതു തത്വങ്ങൾ ഉപേക്ഷിക്കുന്നതിന് തുല്യമായിരിക്കുമെന്ന് അഭിപ്രായപ്പെട്ടു.
"1978 മുതൽ 2007 വരെ മൂന്ന് പതിറ്റാണ്ടോളം യുഎന്നിൽ സേവനമനുഷ്ഠിച്ച ഒരാളെന്ന നിലയിൽ, ശീതയുദ്ധത്തിന്റെ പോർക്കളത്തിൽ നിന്ന് ശീതയുദ്ധാനന്തര ആഗോളസഹകരണത്തിന്റെ ഗവേഷണശാലയിലേക്കുള്ള അതിന്റെ പരിണാമത്തിന് ഞാൻ നേരിട്ട് സാക്ഷ്യം വഹിച്ചു," വിവിധ മാനുഷിക, സമാധാന സംരംഭങ്ങളിലെ തന്റെ പങ്കാളിത്തം അനുസ്മരിച്ചുകൊണ്ട് തരൂർ പറഞ്ഞു. വിശക്കുന്നവർക്ക് ഭക്ഷണം നൽകാനും കുടിയിറക്കപ്പെട്ടവർക്ക് അഭയം നൽകാനും ശബ്ദമില്ലാത്തവർക്ക് ശബ്ദം നൽകാനും അശ്രാന്തമായി പ്രവർത്തിക്കുന്നതിനിടയിൽ, സംഘടന റുവാണ്ടയിൽ പതറുന്നതും തിമോർ-ലെസ്റ്റെയിലും നമീബിയയിലും അവസരത്തിനൊത്ത് ഉയരുന്നതും താൻ കണ്ടിട്ടുണ്ടെന്ന് അദ്ദേഹം ഓർമ്മിച്ചു.
യുഎന്നിന്റെ പോരായ്മകളെക്കുറിച്ചുള്ള വിമർശനങ്ങൾ അതിന്റെ പ്രാധാന്യം കുറയ്ക്കുന്നില്ലെന്ന് അദ്ദേഹം അഭിപ്രായപ്പെട്ടു. "ഇന്ന്, ഗാസയിലെയും യുക്രൈനിലെയും പരാജയങ്ങളുടെ പേരിൽ ആളുകൾ അതിനെ അപലപിക്കുമ്പോൾ, യുഎൻ പൂർണ്ണമല്ലെന്നും ഒരിക്കലും അങ്ങനെ ഉദ്ദേശിച്ചിരുന്നില്ലെന്നും ഞാൻ സമ്മതിക്കുന്നു, എന്നിരുന്നാലും അത് ഒഴിച്ചുകൂടാനാവാത്തതായി തുടരുന്നു," അദ്ദേഹം പറഞ്ഞു. അഭയം തേടുന്ന കുടിയിറക്കപ്പെട്ട സമൂഹങ്ങൾക്കും സംഘർഷ മേഖലകളിൽ നിലയുറപ്പിച്ച സമാധാനപാലകർക്കും വെടിനിർത്തൽ ചർച്ച ചെയ്യുന്ന നയതന്ത്രജ്ഞർക്കും ഈ സ്ഥാപനം അർഥവത്തായി തുടരുന്നുവെന്ന് തരൂർ കൂട്ടിച്ചേർത്തു.
യുഎൻ പൂർണതയുടെയല്ല, സാധ്യതയുടെ ഒഴിച്ചുകൂടാനാവാത്ത പ്രതീകമാണ് എന്ന് അദ്ദേഹം വിശേഷിപ്പിച്ചു. മനുഷ്യരാശിയെ സ്വർഗത്തിലേക്ക് കൊണ്ടുപോകാനല്ല, മറിച്ച് നരകത്തിൽ നിന്ന് രക്ഷിക്കാനാണ് യുഎൻ ഉദ്ദേശിച്ചതെന്ന ഡാഗ് ഹാമർഷോൾഡിന്റെ വാക്കുകളും അദ്ദേഹം ഉദ്ധരിച്ചു. യുഎന്നിന്റെ 80-ാം വാർഷികം അടുത്തിരിക്കെ, പ്രസക്തമായി തുടരാൻ സംഘടന സ്വയം നവീകരിക്കണമെന്ന് അദ്ദേഹം പറഞ്ഞു. പരസ്പരം ബന്ധപ്പെട്ടിരിക്കുന്ന ഒരു ലോകത്ത്, എല്ലാവരും പരമാധികാരികളാകാതെ ഒരു രാഷ്ട്രവും യഥാർഥത്തിൽ പരമാധികാരിയാകില്ല എന്ന ധാരണയിലാണ് അതിന്റെ നിയമസാധുത നിലനിൽക്കുന്നതെന്നും അദ്ദേഹം പറഞ്ഞു. യുഎന്നിന്റെ ധാർമ്മികമായ പുനർവിഭാവനത്തിനുള്ള സമയമാണിതെന്നും അദ്ദേഹം കൂട്ടിച്ചേർത്തു.
സർവമത സൗഹാർദ്ദത്തിലേക്ക് വിഷയം മാറ്റിയ തരൂർ, സ്വാമി വിവേകാനന്ദന്റെ ആശയങ്ങളെ പരാമർശിച്ചു. "ഞാനൊരു ഹിന്ദുവാണ്, മഹാനായ പ്രഭാഷകൻ സ്വാമി വിവേകാനന്ദനിൽ നിന്ന് ഞാൻ പഠിക്കുന്നത്... ഹിന്ദുമതം സഹിഷ്ണുതയ്ക്കും സാർവത്രിക സ്വീകാര്യതയ്ക്കും വേണ്ടി നിലകൊള്ളുന്നു എന്നാണ്," അദ്ദേഹം പറഞ്ഞു. സഹിഷ്ണുതയെ രക്ഷാകർതൃ മനോഭാവമുള്ള ആശയം എന്നാണ് വിവേകാനന്ദൻ ദർശിച്ചതെന്നും അദ്ദേഹം ചൂണ്ടിക്കാട്ടി."ഞാൻ നിങ്ങളുടെ സത്യത്തെ ബഹുമാനിക്കാം, ദയവായി എന്റെ സത്യത്തെയും ബഹുമാനിക്കൂ എന്ന തത്വത്തിൽ അടങ്ങിയിരിക്കുന്ന സഹിഷ്ണുതയ്ക്ക് പകരം സ്വീകാര്യത എന്ന വിവേകാനന്ദന്റെ ആഹ്വാനവും തരൂർ ഓർമ്മിപ്പിച്ചു. ജനങ്ങളെ ഒരുമിപ്പിക്കുക എന്ന യഥാർഥ ഉദ്ദേശ്യമുണ്ടായിട്ടും മതപരമായ ചിന്തകൾ പലപ്പോഴും സ്വത്വ രാഷ്ട്രീയത്തിലേക്ക് ചുരുങ്ങുന്നുണ്ടെങ്കിലും, "സർവധർമ സംഭവ" എന്ന ആശയമാണ് സമാധാനപരമായ സഹവർത്തിത്വത്തിന്റെ കാതലെന്ന് അദ്ദേഹം പറഞ്ഞു.
Content Highlights: Shashi Tharoor emphasizes the UN`s vital role in global issues like Gaza & Ukraine, calling for reform and greater representation to tackle complex challenges effectively.