നൂറിലധികം യുദ്ധവിമാനങ്ങളുമായി സഖ്യസേന, ഹൂതികൾക്ക് നേരെ വലിയ സൈനിക നീക്കം; 324 കേന്ദ്രങ്ങൾ ആക്രമിച്ചു

ദുബായ്: ഇറാന്റെ പിന്തുണയുള്ള ഹൂതികൾക്കെതിരെ യെമനും സൗദി അറേബ്യയും ചേർന്ന് അതിശക്തമായ ആക്രണം ആരംഭിച്ചു. നൂറിലധികം യുദ്ധനവിമാനങ്ങൾ ആക്രമണത്തിൽ പങ്കെടുത്തതായി സൗദി സഖ്യസേന അറിയിച്ചു. ഹൂതികളുടെ നിയന്ത്രണത്തിലുള്ള 324 കേന്ദ്രങ്ങൾ ആക്രമിച്ചു. ഹൂതികൾ പിടിച്ചെടുത്ത മേഖലകളിൽ തിരിച്ചുപിടിക്കുന്നതുവരെ ആക്രമണം തുടരുമെന്ന് സഖ്യസേന അറിയിച്ചു. സന പിടിച്ചെടുക്കാൻ യെമൻ സൈന്യത്തിന് പൂർണ പിന്തുണ നൽകുമെന്നും സഖ്യസേന വ്യക്തമാക്കി.

യമന്റെ വടക്ക്, പടിഞ്ഞാറ്, തെക്ക് മേഖലകളിൽനിന്ന് മൂന്ന് വഴികളിലൂടെയാണ് സഖ്യസേന ഹൂതികൾക്കെതിരെ ആക്രമണം ശക്തമാക്കിയത്. ഹൂതികളുടെ നിയന്ത്രണത്തിലുള്ള തലസ്ഥാനമായ സനയിൽ യമൻ സായുധസേന 'സ്ട്രാറ്റജിക് ഒഫൻസീവ്' ആരംഭിച്ചതായി പ്രഖ്യാപിച്ചു. നിലവിൽ സനയും കൂടുതൽ ജനസാന്ദ്രതയുള്ള വടക്കുപടിഞ്ഞാറൻ പ്രദേശങ്ങളും ഹൂതികളുടെ നിയന്ത്രണത്തിലാണ്.

കരസേനയ്ക്ക് വ്യോമസുരക്ഷയൊരുക്കാൻ നൂറോളം യുദ്ധവിമാനങ്ങൾ ഈ സൈനിക നീക്കത്തിൽ പങ്കെടുത്തതായി സൗദി സഖ്യസേന വ്യക്തമാക്കി. ഹൂതികളുടെ തന്ത്രപ്രധാനമായ 324 കേന്ദ്രങ്ങൾ ആക്രമിച്ചതായും ചെങ്കടലിലെ ബാബ് എൽ-മന്ദേബ് കടലിടുക്ക് മേഖലയിൽ സൈന്യത്തിന് വ്യോമപിന്തുണ നൽകുന്നുണ്ടെന്നും സഖ്യസേന അറിയിച്ചു.

Content Highlights: Saudi-led coalition launches over 100 airstrikes targeting 324 Houthi-controlled sites, aiming to reclaim territories in Yemen, including the capital Sanaa.