‘കശ്മീരികൾക്ക് തോക്ക് നൽകിയത് പാക് സൈന്യമാണ്, ഇപ്പോൾ അവർതന്നെ ഞങ്ങളെ തീവ്രവാദികളായി മുദ്രകുത്തുന്നു’

റാവലകോട്ട്: പാക് അധീന കശ്മീരിലെ (PoK) സർക്കാർ വിരുദ്ധ പ്രതിഷേധങ്ങൾ 24-ാം ദിവസത്തിലേക്ക് കടന്നിരിക്കുകയാണ്. പ്രതിഷേധത്തിന്റെ ഭാഗമായി ജോയിന്റ് അവാമി ആക്ഷൻ കമ്മിറ്റി (JAAC) നേതാവായ സർദാർ അമൻ ഖാൻ പാകിസ്താന്റെ ഭരണകൂടത്തിനെതിരെ കടുത്ത ആരോപണങ്ങളാണ് ഉന്നയിച്ചിരിക്കുന്നത്. പിഓകെയിലെ കശ്മീരികൾക്ക് ഇതുവരെയും ആയുധങ്ങൾ നൽകിയിരുന്നത് പാകിസ്താൻ സൈന്യം ആയിരുന്നുവെന്നും ഇപ്പോൾ അവർ തന്നെ തങ്ങളെ ഭീകരവാദികളായി മുദ്രകുത്തുകയാണെന്നും അദ്ദേഹം ആരോപിച്ചു.

റാവലകോട്ടിലെ ഈദ്ഗാഹ് മൈതാനത്ത് തടിച്ചുകൂടിയ 80,000-ത്തിലധികം വരുന്ന പ്രതിഷേധക്കാരെ അഭിസംബോധന ചെയ്തുകൊണ്ട് സംസാരിക്കുകയായിരുന്നു അമൻ ഖാൻ. 'പാകിസ്താൻ സൈന്യം തന്നെയാണ് കശ്മീരികൾക്ക് തോക്കുകൾ നൽകിയത്. ഇന്ന് ഞങ്ങളെ തീവ്രവാദികൾ എന്ന് വിളിക്കുന്നതും അവർ തന്നെയാണ്.' അദ്ദേഹം പറഞ്ഞു.

കഴിഞ്ഞ വർഷം ഫെബ്രുവരിയിൽ ജെയ്ഷെ മുഹമ്മദ് നടത്തിയ ഒരു പരിപാടിയെക്കുറിച്ചും ഖാൻ തന്റെ പ്രസംഗത്തിൽ പരാമർശിച്ചു. ആ പരിപാടിയിൽ പങ്കെടുത്തവർ എകെ-47 തോക്കുകളും വാളുകളും പോലുള്ള മാരകായുധങ്ങളുമായി നഗരത്തിലൂടെ മാർച്ച് ചെയ്തിരുന്നുവെന്നും, റാവലകോട്ടിലെ ഡെപ്യൂട്ടി കമ്മീഷണറാണ് ഈ റാലിക്ക് അനുമതി നൽകുകയും സുരക്ഷയൊരുക്കുകയും ചെയ്തതെന്നും അദ്ദേഹം ആരോപിച്ചു.

'റാവലക്കോട്ട് ഡെപ്യൂട്ടി കമ്മീഷണർ, തോക്കുകളും വാളുകളുമായി നിങ്ങൾ ഇവിടെ റാലികൾ സംഘടിപ്പിക്കാറുണ്ടായിരുന്നു. നിങ്ങൾക്ക് ഓർമ്മയുണ്ടോ? എന്നിട്ട് നിങ്ങൾ ഇന്ന് ഞങ്ങളെ തീവ്രവാദികൾ എന്ന് വിളിക്കുന്നു. ഇപ്പോൾ ഇവിടെ കൂടിയിരിക്കുന്ന ഈ ജനങ്ങളെല്ലാം (പ്രതിഷേധക്കാർ) ഈ മണ്ണിന്റെ അവകാശികളാണ്.' അദ്ദേഹം പറഞ്ഞു.

തങ്ങളുടെ 38 ആവശ്യങ്ങൾ അംഗീകരിച്ച് നടപ്പിലാക്കിയില്ലെങ്കിൽ, ഈ പ്രക്ഷോഭം പാകിസ്താൻ പൂർണമായും പാക് അധീന കശ്മീരിൽ നിന്ന് ഒഴിഞ്ഞുപോകണം എന്ന ആവശ്യത്തിലേക്ക് മാറുമെന്ന് അമൻ ഖാൻ പാക് സർക്കാരിന് മുന്നറിയിപ്പ് നൽകി. മേഖലയിലെ പാകിസ്താന്റെ നിയന്ത്രണത്തിനെതിരെ പ്രതിഷേധക്കാർ ശക്തമായ നിലപാടാണ് സ്വീകരിക്കുന്നത്.

ഈ പ്രദേശം ഇനി പാകിസ്താന്റെ നിയന്ത്രണത്തിലുള്ളതായി കരുതേണ്ടതില്ലെന്നും ഇന്ത്യയുമായി ശക്തമായ ബന്ധം സ്ഥാപിക്കുന്നതിനെക്കുറിച്ച് ആലോചിക്കുമെന്നും പ്രതിഷേധക്കാർ മുന്നറിയിപ്പ് നൽകി. പാക് അധീന കശ്മീർ പാകിസ്താന്റെ ഭാഗമല്ലെന്നും, കശ്മീരികളേക്കാൾ കൂടുതൽ പാകിസ്താന് ഈ പ്രദേശത്തെ ആവശ്യമുണ്ടെന്നും ഖാൻ അവകാശപ്പെട്ടു.

ഈ പ്രതിഷേധങ്ങൾ പാക് അധീന കശ്മീരിൽ മാത്രം ഒതുങ്ങുന്നില്ലെന്നും, വിവിധ വിദേശ രാജ്യങ്ങളിലെ പാകിസ്താൻ നയതന്ത്ര കാര്യാലയങ്ങൾക്ക് മുന്നിൽ കശ്മീരി അനുകൂലികൾ പ്രതിഷേധ പ്രകടനങ്ങൾ സംഘടിപ്പിച്ചിട്ടുണ്ടെന്നും റിപ്പോർട്ടുകൾ വ്യക്തമാക്കുന്നു.

Content Highlights: Sardar Aman Khan alleges Pakistan Army supplied weapons to Kashmiris. Protests in Rawalakot have reached their 24th day with 80,000 participants. Protesters threaten to seek engagement with India if demands are not met. JAAC movement demands Pakistan vacate the occupied region.