AI എന്നാല്‍ അമേരിക്കൻ-ഇന്ത്യൻ സ്പിരിറ്റ്, പ്രവാസികള്‍ രാജ്യത്തിന്‍റെ ബ്രാന്‍ഡ് അംബാസഡര്‍മാര്‍ -മോദി
ന്യൂയോർക്ക്: അമേരിക്കയിലെ ഇന്ത്യൻ പ്രവാസികളെ അഭിസംബോധന ചെയ്ത് പ്രധാനമന്ത്രി നരേന്ദ്രമോദി. ഇന്ത്യയെ അമേരിക്കയുമായും അമേരിക്കയെ ഇന്ത്യയുമായും പ്രവാസികൾ ബന്ധിപ്പിച്ചു. ലോകത്തെ സംബന്ധിച്ചിടത്തോളം എ.ഐ. എന്നാല്‍ ആർട്ടിഫിഷ്യൽ ഇൻ്റലിജൻസാണ്. എന്നാൽ തനിക്കത് അമേരിക്കയുടേയും ഇന്ത്യയുടേയും ഒത്തൊരുമ കൂടിയാണ്. ഇതാണ് ലോകത്തിൻ്റെ പുതിയ എ.ഐ. ശക്തിയെന്നും അദ്ദേഹം പറഞ്ഞു.
"പ്രവാസികൾ ഇന്ത്യയുടെ ബ്രാൻഡ് അംബാസഡർമാരാണ്. അതുകൊണ്ടാണ് ഞാൻ നിങ്ങളെ 'രാഷ്ട്രദൂതര്‍ ' എന്ന് വിളിക്കുന്നത്. നിങ്ങൾ ഏഴ് കടലുകൾക്ക് അപ്പുറമാണെങ്കിലും രാജ്യവുമായി നിങ്ങളെ അകറ്റാൻ ഒരു സമുദ്രത്തിനും സാധിക്കുകയില്ല, എവിടേക്ക് പോയാലും നാം ഒരു കുടുംബമാണ്.
തുടർച്ചയായ മൂന്നാം തവണയും സർക്കാർ അധികാരത്തിൽ തിരിച്ചെത്തി. കഴിഞ്ഞ 60 വർഷത്തിനിടയിൽ ഇത്തരമൊന്ന് സംഭവിച്ചിട്ടില്ല. ഈ മൂന്നാം ടേമിൽ വലിയ ലക്ഷ്യങ്ങൾ നേടേണ്ടതുണ്ട്" പ്രധാനമന്ത്രി പറഞ്ഞു.
Content Highlights: PM Modi addressing Indian diaspora at Nassau Coliseum in New York