യുവാക്കളുടെ പ്രതിഷേധ കൊടുങ്കാറ്റിൽ മുട്ടുകുത്തി നേപ്പാൾ പ്രധാനമന്ത്രി; ദുബായിലേക്ക് കടക്കാനും നീക്കം
കാഠ്മണ്ഡു: ജെന്‍ സീ വിപ്ലവത്തിന് മുന്നില്‍ മുട്ടുകുത്തി നേപ്പാള്‍ സര്‍ക്കാര്‍. സാമൂഹികമാധ്യമങ്ങളുടെ നിരോധനത്തിനെതിരേ സംഘടിച്ച രാജ്യത്തെ യുവാക്കളുടെ പ്രതിഷേധത്തിന് മുന്നില്‍ ഒടുവില്‍ പ്രധാനമന്ത്രി കെ.പി. ശര്‍മ ഒലിക്കും രാജിവെയ്‌ക്കേണ്ടിവന്നു. യുവാക്കളുടെ പ്രക്ഷോഭം കലാപത്തിലേക്കും അക്രമത്തിലേക്കും നീങ്ങിയതിന് പിന്നാലെയാണ് പ്രതിഷേധക്കാരുടെ പ്രധാന ആവശ്യമായ പ്രധാനമന്ത്രിയുടെ രാജി സംഭവിച്ചിരിക്കുന്നത്.
പ്രധാനമന്ത്രി കെ.പി. ശര്‍മ ഒലിയെ പുറത്താക്കണമെന്നും സര്‍ക്കാര്‍ പിരിച്ചുവിടണമെന്നും ആവശ്യപ്പെട്ടാണ് ചൊവ്വാഴ്ച രാവിലെ മുതല്‍ യുവാക്കള്‍ വീണ്ടും തെരുവിലിറങ്ങിയത്. കഴിഞ്ഞദിവസങ്ങളില്‍ സാമൂഹികമാധ്യമങ്ങളുടെ നിരോധനത്തിനെതിരേയാണ് ജെന്‍ സീ വിപ്ലവം എന്ന പേരില്‍ യുവാക്കള്‍ നേപ്പാളില്‍ പ്രക്ഷോഭം ആരംഭിച്ചത്. 19 പേരാണ് പ്രതിഷേധത്തിനിടെ കൊല്ലപ്പെട്ടത്. ഇതിനുപിന്നാലെ സാമൂഹികമാധ്യമങ്ങളുടെ നിരോധനം സര്‍ക്കാര്‍ നീക്കിയെങ്കിലും പ്രതിഷേധം കെട്ടടങ്ങിയില്ല. കെ.പി. ശര്‍മ ഒലിയെ പ്രധാനമന്ത്രി സ്ഥാനത്തുനിന്ന് പുറത്താക്കണമെന്നും സര്‍ക്കാര്‍ പിരിച്ചുവിടണമെന്നും ആവശ്യപ്പെട്ട് യുവാക്കള്‍ പ്രക്ഷോഭം തുടരുകയായിരുന്നു.
'കെ.പി. ചോര്‍, ദേശ് ഛോഡ്' (കെ.പി. ശര്‍മ ഒലി കള്ളനാണ്, രാജ്യം വിടൂ) എന്ന മുദ്രാവാക്യം ഉയര്‍ത്തിയാണ് യുവാക്കള്‍ ചൊവ്വാഴ്ച തെരുവിലിറങ്ങിയത്. വിദ്യാര്‍ഥികളെ കൊല്ലരുതെന്നും രാജ്യത്തെ അഴിമതിക്ക് അവസാനം കുറിക്കണമെന്നും മുദ്രാവാക്യങ്ങളുയര്‍ന്നു. കഴിഞ്ഞദിവസത്തെ സമരങ്ങള്‍ക്കിടെ 19 പേര്‍ കൊല്ലപ്പെട്ടതോടെയാണ് യുവാക്കളുടെ പ്രക്ഷോഭത്തിന്റെ തീവ്രത കൂടിയത്.
ചൊവ്വാഴ്ച കാഠ്മണ്ഡുവിലും സംസ്ഥാനത്തെ വിവിധ മേഖലകളിലും യുവാക്കളുടെ പ്രക്ഷോഭം വന്‍ അക്രമങ്ങളിലേക്കാണ് നീങ്ങിയത്. പ്രതിഷേധക്കാര്‍ പ്രധാനമന്ത്രിയുടെയും പ്രസിഡന്റ് രാം ചന്ദ്ര പൗഡേലിന്റെയും സ്വകാര്യവസതികള്‍ അഗ്നിക്കിരയാക്കി. പ്രസിഡന്റിന്റെ വീട്ടിനുള്ളില്‍ കയറി കണ്ണില്‍ കണ്ടതെല്ലാം അടിച്ചുതകര്‍ത്തു. വിവിധ മന്ത്രിമാരുടെ വീടുകള്‍ക്കും തീയിട്ടു. ജെന്‍ സീ വിപ്ലവത്തെത്തുടര്‍ന്ന് കഴിഞ്ഞദിവസം രാജിവെച്ച ആഭ്യന്തര മന്ത്രി രമേഷ് ലേഖകിന്റെ വീടിന് നേരേയും ചൊവ്വാഴ്ച ആക്രമണമുണ്ടായി. രമേഷ് ലേഖകിന്റെ നായ്കാപിലെ വസതി പ്രതിഷേധക്കാര്‍ അഗ്നിക്കിരയാക്കി.
കിര്‍ത്തിപുരിലെ മുനിസിപ്പാലിറ്റി കെട്ടിടവും പ്രതിഷേധക്കാര്‍ തീവെച്ച് നശിപ്പിച്ചു. മുന്‍ ഉപപ്രധാനമന്ത്രി രഘുവീര്‍ മഹാസേതിന്റെ വീടിന് നേരേ കല്ലേറും ഉണ്ടായി. സിപിഎന്‍ മാവോയിസ്റ്റ് സെന്റര്‍ ചെയര്‍മാന്‍ പുഷ്പ കമാല്‍ ദഹലിന്റെ ലളിത്പുരിലെ വീടും നേപ്പാളി കോണ്‍ഗ്രസ് പ്രസിഡന്റും മുന്‍ പ്രധാനമന്ത്രിയുമായ ഷേര്‍ ബഹാദുര്‍ ദൗബയുടെ വീടും ചൊവ്വാഴ്ച തീവെച്ച് നശിപ്പിച്ചു. ഷേര്‍ ബഹാദൂറിന്റെ വീട്ടുവളപ്പിലുണ്ടായിരുന്ന വാഹനങ്ങളും അടിച്ചുതകര്‍ത്തു.
അതിനിടെ, ചൊവ്വാഴ്ച രാവിലെ മുതല്‍ നേപ്പാളിലെ കൂടുതല്‍ മന്ത്രിമാര്‍ രാജിവെച്ചിരുന്നു. കാര്‍ഷിക വകുപ്പ് മന്ത്രി രാംനാഥ് അധികാരി, യുവജനകാര്യ മന്ത്രി തേജുലാല്‍ ചൗധരി, ജലവിഭവ വകുപ്പ് മന്ത്രി പ്രദീപ് യാദവ് തുടങ്ങിയവരാണ് ചൊവ്വാഴ്ച രാവിലെ രാജിവെച്ചത്. ഇതിനുപിന്നാലെയാണ് പ്രധാനമന്ത്രി ഒലിയും രാജിവെച്ചൊഴിഞ്ഞത്. എന്തുവന്നാലും പ്രധാനമന്ത്രി രാജിവെയ്ക്കില്ലെന്നായിരുന്നു അദ്ദേഹവുമായി ബന്ധപ്പെട്ടവര്‍ ചൊവ്വാഴ്ച രാവിലെ പ്രതികരിച്ചിരുന്നത്. അതിനിടെ, പ്രധാനമന്ത്രി ദുബായിലേക്ക് പോവുകയാണെന്ന വിവരങ്ങളും പുറത്തുവന്നിരുന്നു. ഇതിനിടെയാണ് ചൊവ്വാഴ്ച ഉച്ചയോടെ ഒലി പ്രധാനമന്ത്രി സ്ഥാനത്തുനിന്നു രാജിവെച്ചത്.
പ്രധാനമന്ത്രിയും 25 മന്ത്രിമാരും അടങ്ങുന്നതാണ് നേപ്പാള്‍ സര്‍ക്കാരിന്റെ മന്ത്രിസഭ. നേപ്പാളി കോണ്‍ഗ്രസ് പാര്‍ട്ടിയും കമ്യൂണിസ്റ്റ് പാര്‍ട്ടി ഓഫ് നേപ്പാളും( യൂണിഫൈഡ് മാര്‍ക്‌സിസ്റ്റ്- ലെനിനിസ്റ്റ്) ചേര്‍ന്നുള്ള സഖ്യകക്ഷി സര്‍ക്കാരാണ് നേപ്പാളിലുള്ളത്.
ഫെയ്സ്ബുക്ക്, വാട്സാപ്പ്, ഇന്‍സ്റ്റഗ്രാം എന്നിവയുള്‍പ്പെടെ 26 സാമൂഹികമാധ്യമങ്ങള്‍ നിരോധിച്ച സര്‍ക്കാര്‍ ഉത്തരവിനെതിരേ യുവാക്കള്‍ ആരംഭിച്ച പ്രക്ഷോഭമാണ് നേപ്പാളില്‍ പിന്നീട് ആളിപ്പടര്‍ന്നത്. വെള്ളിയാഴ്ച ആരംഭിച്ച പ്രക്ഷോഭം തിങ്കളാഴ്ച സുരക്ഷാസേന അടിച്ചമര്‍ത്താന്‍ തുടങ്ങിയതോടെയുണ്ടായ അക്രമസംഭവങ്ങളില്‍ 19 പേര്‍ മരിച്ചു. 347 പേര്‍ക്ക് പരിക്കേറ്റു. ഇതേതുടര്‍ന്ന് അടിയന്തര മന്ത്രിസഭായോഗം വിളിച്ചുചേര്‍ത്ത സര്‍ക്കാര്‍ തിങ്കളാഴ്ച രാത്രി വൈകി നിരോധനം പിന്‍വലിച്ചു. സാമൂഹികമാധ്യമസൈറ്റുകള്‍ പുനരാരംഭിക്കുന്നതിനുള്ള നടപടികള്‍ തുടങ്ങാന്‍ ബന്ധപ്പെട്ട ഏജന്‍സികളോട് ഉത്തരവിട്ടതായി വാര്‍ത്താവിനിമയമന്ത്രാലയം അറിയിച്ചു.
സാമൂഹികമാധ്യമങ്ങള്‍ ലഭ്യമല്ലാതായതോടെയാണ് സ്‌കൂള്‍, കോളേജ് യൂണിഫോമുകള്‍ ധരിച്ച് പതിനായിരക്കണക്കിന് വിദ്യാര്‍ഥികള്‍ തെരുവിലിറങ്ങിയത്. തലസ്ഥാനമായ കാഠ്മണ്ഡുവില്‍ ആരംഭിച്ച പ്രക്ഷോഭം പൊഖറ, ബട്വാള്‍, ഭൈരഹവ, ഭരത്പുര്‍, ഇതാഹരി, ഡമകക് എന്നിവിടങ്ങളിലേക്ക് വ്യാപിച്ചിരുന്നു.
ഐടി മന്ത്രാലയത്തില്‍ രജിസ്റ്റര്‍ചെയ്യണമെന്ന നിര്‍ദേശം പാലിക്കാത്ത മാധ്യമങ്ങളെയാണ് സര്‍ക്കാര്‍ നിരോധിച്ചത്. നേപ്പാളില്‍ സ്ഥിരമായി പ്രശ്‌നപരിഹാര ഓഫീസറെയും കംപ്ലയന്‍സ് ഓഫീസറെയും നിയമിക്കണമെന്ന് കഴിഞ്ഞവര്‍ഷം സുപ്രീംകോടതി നിര്‍ദേശിച്ചിരുന്നു. ഓഗസ്റ്റ് 28 മുതല്‍ ഒരാഴ്ച ഇതിന് സമയം നല്‍കിയെങ്കിലും 26 സാമൂഹികമാധ്യമങ്ങള്‍ ചെയ്തില്ല. സര്‍ക്കാര്‍ നിര്‍ദേശം പാലിച്ച ടിക്ടോക്, വൈബര്‍, വിറ്റ്ക്, നിംബസ്, പോപോ ലൈവ് എന്നിവയ്ക്ക് നിരോധനമില്ല. ഇവയിലൂടെയാണ് ജെന്‍ സീക്കാര്‍ പ്രക്ഷോഭത്തിന് ആളെക്കൂട്ടുന്നത്. പ്രക്ഷോഭത്തിന്റെ പശ്ചാത്തലത്തില്‍ തലസ്ഥാനത്ത് സര്‍ക്കാര്‍ ഇന്റര്‍നെറ്റ് വിച്ഛേദിച്ചിരുന്നു.
Content Highlights: Nepal`s PM resigns following widespread Gen Z protests against social media ban