‘വ്യക്തിജീവിതത്തിൽ ഗുരുതരതെറ്റുകൾ പറ്റി’; എൻവിഡിയയിലേക്ക് തിരിച്ചുവരാൻ തയ്യാറെന്ന് ജെൻസൻ ഹുവാങ്

#ന്യൂസ് ഡെസ്ക്
Jensen Huang | Photo: Gettyimages
Jensen Huang | Photo: Gettyimages

ന്യൂയോർക്ക്: എൻവിഡിയയിലേക്ക് തിരിച്ചുവരാൻ താത്പര്യമുണ്ടെന്ന് വ്യക്തമാക്കി ചൈനീസ് ചാരവനിതയെന്ന് ആരോപിക്കപ്പെടുന്ന ആലീസ് ഹുവാങ്ങുമായുള്ള ബന്ധത്തിന്റെ പേരിൽ സി.ഇ.ഒ. സ്ഥാനമൊഴിഞ്ഞ ജെൻസൻ ഹുവാങ്. എൻവിഡിയയുടെ തലപ്പത്തേക്ക് തിരിച്ചെത്താൻ കഴിയുന്നത് വലിയ ബഹുമതിയായിരിക്കുമെന്ന് രാജിവെച്ച ശേഷമുള്ള തന്റെ ആദ്യ പരസ്യ പ്രസ്താവനയിലൂടെ അദ്ദേഹം അറിയിച്ചു.

എൻവിഡിയയിലെ ജീവനക്കാർ, നിക്ഷേപകർ, ബിസിനസ് പങ്കാളികൾ, ഉപഭോക്താക്കൾ എന്നിവരുൾപ്പെടെ വിവിധ മേഖലകളിൽനിന്ന് കമ്പനിയുടെ നേതൃത്വത്തിലേക്ക് തിരിച്ചെത്തണമെന്ന് ആവശ്യപ്പെട്ട് തനിക്ക് വലിയ തോതിൽ അഭ്യർത്ഥനകൾ ലഭിച്ചതായി ഹുവാങ് വെളിപ്പെടുത്തി.

33 വർഷത്തോളം കമ്പനിയെ നയിച്ച ഹുവാങ്, തന്റെ തിരിച്ചുവരവ് സംബന്ധിച്ച അന്തിമ തീരുമാനം കമ്പനിയുടെ ഡയറക്ടർ ബോർഡിന്റേതായിരിക്കുമെന്നും കൂട്ടിച്ചേർത്തു. തന്റെ നേതൃത്വം എൻവിഡിയക്കും പങ്കാളികൾക്കും ഗുണംചെയ്യുമെന്ന് ബോർഡ് കരുതുന്നുവെങ്കിൽ മടങ്ങിയെത്താൻ സന്നദ്ധനാണെന്നും 'എക്സ്' പ്ലാറ്റ്‌ഫോമിൽ പങ്കുവെച്ച പ്രസ്താവനയിൽ അദ്ദേഹം വ്യക്തമാക്കി.

വ്യക്തിജീവിതത്തിൽ സംഭവിച്ച ഗുരുതരമായ തെറ്റുകളിൽ ഹുവാങ് ഖേദം പ്രകടിപ്പിക്കുകയും ചെയ്തു. ‘എൻവിഡിയയിലെ എല്ലാവരിൽനിന്നും പ്രതീക്ഷിക്കുന്ന നിലവാരം കാത്തുസൂക്ഷിക്കാൻ എനിക്ക് സാധിച്ചില്ല, വ്യക്തിജീവിതത്തിൽ വലിയ തെറ്റുകൾ പറ്റി. ഡയറക്ടർ ബോർഡിന് ബുദ്ധിമുട്ടുകൾ ഉണ്ടാക്കിയതിൽ ഞാൻ ആത്മാർത്ഥമായി ഖേദിക്കുന്നു. എന്റെ തെറ്റുകളുടെ പൂർണ ഉത്തരവാദിത്വം ഞാൻ ഏറ്റെടുക്കുന്നു. ബോർഡിന്റെ സ്വതന്ത്ര അന്വേഷണത്തോട് സഹകരിക്കാൻ പൂർണമായും പ്രതിജ്ഞാബദ്ധനാണ്’, അദ്ദേഹം പ്രസ്താവനയിൽ വ്യക്തമാക്കി.

അമേരിക്കൻ പൗരത്വം തന്റെ ജീവിതത്തിലെ ഏറ്റവുംവലിയ സമ്മാനങ്ങളിലൊന്നും അഭിമാന നിമിഷങ്ങളിലൊന്നുമാണെന്ന് ഹുവാങ് പ്രസ്താവിച്ചു. 53 വർഷം മുൻപാണ് താൻ യു.എസിലെത്തിയതെന്നും ഇവിടെ കമ്പനി കെട്ടിപ്പടുക്കാൻ കഴിഞ്ഞത് ഒരു ഭാഗ്യമാണെന്നും അദ്ദേഹം പറഞ്ഞു. ‘എൻവിഡിയ എന്റെ ജീവിതകാലത്തെ അധ്വാനമാണ്. സഹപ്രവർത്തകർക്കൊപ്പം ഇന്ന് കാണുന്ന രീതിയിൽ കമ്പനിയെ വളർത്തിയെടുക്കാൻ കഴിഞ്ഞത് ഒരു ഭാഗ്യവും ബഹുമതിയുമാണ്. അമേരിക്കയിലല്ലാതെ മറ്റൊരു രാജ്യത്തും എൻവിഡിയ പോലുള്ള ഒരു കമ്പനി സാധ്യമാകുമായിരുന്നില്ല. ഞാൻ ഞങ്ങളുടെ രാജ്യത്തെയും എൻവിഡിയയെയും സ്നേഹിക്കുന്നു’, അദ്ദേഹം കൂട്ടിച്ചേർത്തു.

Content Highlights: Former Nvidia CEO Jensen Huang has expressed his willingness to return to lead the company following numerous requests from employees and stakeholders, while acknowledging and expressing deep regret over personal mistakes.