തുർക്കി, പാകിസ്താൻ, സൗദി അറേബ്യ സഖ്യം; ഈജിപ്തും ചേർന്നേക്കും, ‘ഇറാനെ ലക്ഷ്യംവെച്ചിട്ടില്ല’- തുർക്കി

അങ്കാറ: തുർക്കി, പാകിസ്താൻ, സൗദി അറേബ്യ എന്നീ രാജ്യങ്ങൾ ചേർന്ന് രൂപപ്പെടുത്തിയ പ്രതിരോധ സഖ്യത്തിൽ ഈജിപ്തും ചേർന്നേക്കുമെന്ന് തുർക്കി വിദേശകാര്യ മന്ത്രി ഹകൻ ഫിദാൻ. മൂന്ന് സ്ഥാപക അംഗങ്ങളിൽ മാത്രമായി സഖ്യം ഒതുങ്ങിനിൽക്കാൻ തുർക്കി ആഗ്രഹിക്കുന്നില്ലെന്നും ചില സാങ്കേതിക തടസ്സങ്ങൾ നീങ്ങുന്നതോടെ ഈജിപ്തും ഈ പ്രതിരോധ സഖ്യത്തിന്റെ ഭാഗമാകാൻ സാധ്യതയുണ്ടെന്നും അദ്ദേഹം സൂചിപ്പിച്ചു.

‘മക്ക സംയുക്ത പ്രതിരോധ കരാർ’ എന്ന് പേരിട്ടിരിക്കുന്ന ഈ ഉടമ്പടിയിൽ വെള്ളിയാഴ്ചയാണ് മൂന്ന് രാജ്യങ്ങളും ഒപ്പുവെച്ചത്. ഈ സഖ്യത്തിലെ ഏതെങ്കിലും ഒരു രാജ്യത്തിന് നേരെയുണ്ടാകുന്ന സായുധ ആക്രമണം സഖ്യത്തിലെ എല്ലാ രാജ്യങ്ങൾക്കും നേരെയുള്ള ആക്രമണമായി കണക്കാക്കപ്പെടുമെന്ന് ഹകൻ ഫിദാൻ വ്യക്തമാക്കി. നാറ്റോയുടെ ആർട്ടിക്കിൾ അഞ്ചിന് സമാനമായ പരസ്പര പ്രതിരോധ വ്യവസ്ഥയാണിതെന്നാണ് അദ്ദേഹം ചൂണ്ടിക്കാട്ടുന്നത്.

ഈ പുതിയ പ്രതിരോധ സഖ്യം ഇറാനെയോ മറ്റ് ഏതെങ്കിലും പ്രത്യേക രാജ്യത്തെയോ ലക്ഷ്യം വെച്ചുള്ളതല്ലെന്ന് ഫിദാൻ പറഞ്ഞു. അംഗരാജ്യങ്ങളുടെ സുരക്ഷ ഉറപ്പാക്കുന്നതിനുള്ള ഒരു പൊതുവായ പ്രതിബദ്ധതയാണിതെന്നും ഏതെങ്കിലും അംഗരാജ്യം ആക്രമിക്കപ്പെടാത്ത പക്ഷം മറ്റൊരു രാജ്യത്തെയും ഭീഷണിയായി കണക്കാക്കില്ലെന്നും അദ്ദേഹം കൂട്ടിച്ചേർത്തു. ഏതെങ്കിലും അംഗം ആക്രമിക്കപ്പെട്ടാൽ നൽകേണ്ട സഹായത്തിന്റെ രീതിയെക്കുറിച്ചും അളവിനെക്കുറിച്ചും രാജ്യങ്ങൾ തമ്മിൽ കൂടിയാലോചനകൾ നടത്തും. നിലവിലുള്ള മറ്റ് സുരക്ഷാ ക്രമീകരണങ്ങൾക്ക് പകരമല്ല ഈ സഖ്യമെന്നും തുർക്കി വ്യക്തമാക്കി.

രണ്ട് വർഷവും എട്ട് മാസവുമായി നടന്ന ചർച്ചകൾക്കൊടുവിലാണ് ഈ കരാർ യാഥാർത്ഥ്യമായത്. സഖ്യത്തിന്റെ പ്രവർത്തനങ്ങൾ ഏകോപിപ്പിക്കുന്നതിനായി സൗദി അറേബ്യ ആസ്ഥാനമായി ഒരു ജനറൽ സെക്രട്ടേറിയറ്റും നാറ്റോ മാതൃകയിലുള്ള ഒരു മന്ത്രിതല സമിതിയും രൂപീകരിക്കുമെന്നാണ് കരുതപ്പെടുന്നത്.

Content Highlights: Egypt could soon join the Mecca Joint Defence Agreement between Turkey, Pakistan and Saudi Arabia.