കലിതുള്ളി ഇസ്രയേല്, ചോരയിൽ കുളിച്ച് ലെബനന്; എത്ര അകലെയാണ് സമാധാനം?
സംഘര്ഷഭരിതമായി തുടരുന്ന ലെബനന് അതിര്ത്തിയില് 21 ദിവസം വെടിനിര്ത്തല് നടപ്പാക്കണമെന്ന നിര്ദേശത്തോട് മുഖം തിരിച്ചുനില്ക്കുകയാണ് ഇസ്രയേല്. ചോരചിന്തുന്ന ലെബനന് താല്ക്കാലിക ആശ്വസം നല്കാന് അമേരിക്കയുടെ നേതൃത്വത്തിലാണ് യൂറോപ്യന് യൂണിയനും യു.കെയും അറബ് രാജ്യങ്ങളും ഉള്പ്പെടുന്ന 12 രാജ്യങ്ങളുടെ സഖ്യം ആഹ്വാനം ചെയ്തത്. അതിര്ത്തിയില് ഇസ്രയേലും ഹിസ്ബുള്ളയും നേര്ക്കുനേര് നിന്ന് പൊരുതുന്നതിനിടെയാണ് സമാധാനത്തിനുള്ള ശ്രമങ്ങള്ക്കായി സഖ്യകക്ഷികളുടെ ശ്രമം. എന്നാല്, സഖ്യരാഷ്ട്രങ്ങളുടെ ആഹ്വാനം ഇസ്രയേല് പൂര്ണമായും തള്ളിക്കളഞ്ഞു. യുദ്ധം തുടരുമെന്ന് ഇസ്രയേല് പ്രധാനമന്ത്രി ബെഞ്ചമിന് നെതന്യാഹു പ്രഖ്യാപിക്കുകയും ചെയ്തു. സെപ്തംബര് 27ന് ഐക്യരാഷ്ട്രസഭയുടെ പൊതുസഭയെ അഭിസംബോധന ചെയ്തുകൊണ്ടാണ് സംഘര്ഷവുമായി ബന്ധപ്പെട്ട ശക്തമായ നിലപാട് നെതന്യാഹു അറിയിച്ചത്. അതേദിവസം തന്നെയായിരുന്നു ഹിസ്ബുള്ളയുടെ തലവന് ഹസന് നസ്രള്ളയെ വധിച്ചതായി ഇസ്രയേല് പ്രഖ്യാപിച്ചത്. ലക്ഷ്യം കാണുന്നതുവരെ യുദ്ധം ശക്തമായി തുടരുമെന്ന ഇസ്രയേലിന്റെ പ്രഖ്യാപനം കൂടിയായിരുന്നു ഇത്. നസ്രള്ള വധം നടന്നിട്ട് ദിവസങ്ങളായിട്ടും ആക്രമണത്തിന് അൽപം പോലും കുറവില്ല. കൊണ്ടും കൊടുത്തും യുദ്ധം തുടരുമ്പോൾ പൊതുവേ ദുര്ബലമായ പശ്ചിമേഷ്യ കൂടുതല് തകര്ച്ചയിലേക്കെത്തുകയാണ്.
സമാധാനത്തിന് ആഹ്വാനം
Content Highlights: why is Israel attacking Lebanon future of middle east crisis