വിദ്യാർഥികളോട് ഇടഞ്ഞ് ട്രംപ്; മഹ്മൂദ് ഖലീലിനെ നാടുകടത്തുമോ യു.എസ്?

അവ്യക്തമായ ഒന്ന് ട്രംപ് ഭരണകൂടത്തിന് കീഴിൽ ശനിയാഴ്ച യു.എസ്സിൽ നടന്നു. ഇസ്രയേലിനെതിരായ കാമ്പസ് പ്രതിഷേധങ്ങൾക്ക് നേതൃത്വം നൽകിയ അമേരിക്കൻ ​ഗ്രീൻ കാർഡ് ഉടമയായ ഒരു ചെറുപ്പക്കാരനെ കസ്റ്റഡിയിലെടുത്ത് നാടുകടത്താനുള്ള ഒരുക്കത്തിലാണ് അധികൃതർ. അടിച്ചമർത്തപ്പെടുന്ന എതിർശബ്ദങ്ങൾ ഇന്ന് ലോകത്തെവിടേയും ഒരു സാധാരണ സംഭവമാണ്. എന്നാൽ, ഇവിടെ യു.എസ് ഒരുപടികൂടി കടന്ന് സ്ഥിരതാമസക്കാരനായ ഒരാളെ തന്നെ നാടുകടത്താൻ തീരുമാനിച്ചിരിക്കുകയാണ്. 

ഇതേ ഭീഷണി മുന്നിൽക്കണ്ട് ഒരുനാൾ പ്രതിഷേധങ്ങളിൽ നിന്ന് വിട്ടുനിന്ന ഈ യുവാവിനെ പക്ഷേ കാലം പലസ്തീൻ അനുകൂല പ്രതിഷേധങ്ങളുടെ യു.എസ്സിലെ മുഖമായി മാറ്റി. പറഞ്ഞുവരുന്നത് മഹ്മൂദ് ഖലീലിനെക്കുറിച്ചാണ്. കൊളംബിയൻ സർവകലാശാലയിൽ നിന്ന് ബിരുദാനന്തര ബിരുദം നേടിയ ഖലീൽ ഇപ്പോൾ ലൂസിയാനയിലെ ഒരു തടങ്കൽ കേന്ദ്രത്തിലാണ്. ആദ്യത്തെ വിക്കറ്റാണ് ഖലീലിന്റേത് എന്ന നിലപാടിലാണ് ട്രംപ്. വിദ്യാർഥി പ്രതിഷേധങ്ങളെ ഈവിധം കൈകാര്യം ചെയ്യുന്ന ഭരണകൂടത്തിനെതിരേ ഇതിനോടകം പ്രക്ഷോഭം ആരംഭിച്ചുകഴിഞ്ഞു. ഖലീലിനെ വിട്ടുകിട്ടണമെന്ന ആവശ്യവും ശക്തമാണ്. ഇസ്രയേൽ ഗാസ അമേരിക്കയ്ക്ക് കൈമാറുമെന്ന പ്രഖ്യാപനത്തോടെ വിഷയത്തിൽ യു.എസ് ആരുടെ പക്ഷത്താണെന്നത് വ്യക്തമാണ്. അവിടം സ്വർ​ഗമാക്കുമെന്നാണ് അവകാശവാദം.

Content Highlights: Mahmoud Khalil, a Green Card holder and Palestine activist, was detained in US