ആയിരം തീവണ്ടികൾ പോകുന്നത് പോലെ ശബ്ദം,എണ്ണപ്പാട കറുത്ത പാമ്പുകളെപ്പോലെ ഇഴഞ്ഞു; ഭൂമി അലറിയ ഒൻപത് നാൾ

വെനസ്വേലയുടെ വടക്കു പടിഞ്ഞാറൻ ഭാഗത്തുള്ള ലോകത്തിലെ ഏറ്റവും വലിയ ജലാശയങ്ങളിലൊന്നായ സുന്ദരമായ 'മരക്കൈബോ തടാകം'.1917 ലെ ഒരു വരണ്ട വേനൽക്കാലം. ഇടതൂർന്ന വലിയ കണ്ടൽക്കൂട്ടങ്ങൾ അങ്ങിങ്ങ് വലിയ തുരുത്തുകൾ പോലെ തോന്നിച്ചു. പിങ്ക് പൂക്കളുള്ള 'അപ്പാമാത്തെ' മരങ്ങൾ കാറ്റത്ത് പൂക്കൾ പൊഴിച്ചു. തടാകത്തെ തഴുകി വരുന്ന കാറ്റ് തീരത്തെ കൃഷിസ്ഥലത്ത് മണ്ണ് കിളയ്ക്കുന്ന കർഷകർക്ക് കനത്ത വേനലിലും കുളിർമയുണ്ടാക്കി. അതുവരെ പരിചയമില്ലാത്ത ഒരു രൂക്ഷഗന്ധം അവിടെ കാറ്റിൽ അലയടിക്കുന്നുണ്ടായിരുന്നു. കർഷകർ അതിന്റെ ഉറവിടം തേടി തടാകത്തിന്റെ കിഴക്കു ഭാഗത്തേക്ക് നടന്നു. അവിടെ കറുത്ത കറ പോലെയുള്ള ഒരു ദ്രാവകം ഭൂമിക്കടിയിൽ നിന്നും മണ്ണിൽ കിനിഞ്ഞു വരുന്നുണ്ടായിരുന്നു. കുറച്ചു സമയം കൊണ്ട് അത് കുറേ ഭാഗത്തു വ്യാപിച്ചു. ആ പ്രദേശത്തെ മുക്കുവർ ഇത് ശേഖരിച്ചു. 'ചപ്പേപോട്ടെ' എന്ന് അവർ പേരിട്ട ഈ കറ അവർ അവരുടെ വള്ളത്തിനുണ്ടായിരുന്ന സുഷിരങ്ങളും കീറലുകളും അടയ്ക്കാൻ ഉപയോഗിച്ചു. മരക്കൈബോ തടാകത്തിന്റെ മറ്റിടങ്ങളിലും ഈ കറ കാണപ്പെട്ടതിനെ തുടർന്ന് ശാസ്ത്രജ്ഞന്മാർ ഈ പ്രതിഭാസത്തെ പറ്റി പഠിക്കാൻ തുടങ്ങി. ഈ കറ മറ്റൊന്നുമല്ല, നമ്മുടെ ഏറ്റവും പ്രധാനപ്പെട്ട ഇന്ധനമായ 'ക്രൂഡ് ഓയിൽ' ആണെന്ന് പിന്നീട് മനസ്സിലായി.

മരക്കൈബോ പ്രദേശത്ത് ക്രൂഡ് ഓയിൽ നിക്ഷേപങ്ങൾ കണ്ടെത്താൻ ' വെനസ്വേല ഓയിൽ കൺസെഷൻസ് (vOC)' എന്ന കമ്പനി 1917 ഓടെ തന്നെ ശ്രമങ്ങൾ തുടങ്ങി. അമേരിക്കയിൽ നിന്നും മറ്റു രാജ്യങ്ങളിൽ നിന്നുമുള്ള ജിയോളജിസ്റ്റുകളുടെ നേതൃത്വത്തിൽ ആയിരുന്നു മൈനിങ് നടത്തിയിരുന്നത്. ഗോപുരം പോലെ ഉയർന്ന സ്റ്റീൽ ടവറുകൾ തദ്ദേശീയരിൽ അത്ഭുതം വിടർത്തി. എന്താണ് സംഭവിക്കുന്നതെന്ന് അവർക്കു മനസ്സിലായില്ല. അവിടെ നിന്നും കുഴിച്ചെടുക്കുന്ന ഓയിൽ വളരെ കട്ടിയുള്ളതും  മെഴുക് പോലെയുള്ളതുമായിരുന്നു. സംസ്‌കരിക്കാനുള്ള ബുദ്ധിമുട്ടും വളരെ കുറഞ്ഞ വിപണന സാധ്യതയും മൂലം കമ്പനി ഒരു ഘട്ടത്തിൽ പ്രവർത്തനം നിർത്താൻ തന്നെ ആലോചിച്ചു. കൂടാതെ മലേറിയ പോലുള്ള രോഗങ്ങളും അവരെ ശല്യം ചെയ്തു. അങ്ങനെയിരിക്കേ ' ബൊറ്റോം' എന്ന വെനസ്വെലൻ ജിയോളജിസ്റ്റ് ഇതുവരെ കുഴിച്ചതിനേക്കാൾ ആഴത്തിൽ ബോറിംഗ് തുടരാൻ ആവശ്യപ്പെട്ടു. പുറമെയുള്ള കനം കൂടിയ പാളി കഴിഞ്ഞാൽ കൂടുതൽ നേർത്ത ഓയിൽ ലഭിക്കാൻ സാധ്യതയുണ്ടെന്ന് അദ്ദേഹം പറഞ്ഞു.

Content Highlights: Explore the captivating story of Lake Maracaibo, Venezuela`s oil discovery, its boom, and the subsequent economic and environmental devastation. A tale of fortune and ruin.