സാക്കിർ നായിക്കും ഹാഫിസ് സയീദും ഭൂപടഭീഷണിയും മോദിക്കെതിരായ 'വധശ്രമവും'; ബംഗ്ലാദേശിൽ സംഭവിക്കുന്നത്

പാകിസ്താനുമായുള്ള പടിഞ്ഞാറൻ അതിർത്തിയിൽ സർ ക്രീക്കിനരികിൽ ത്രിശൂൽ 2025 എന്നു പേരിട്ട വലിയ യുദ്ധാഭ്യാസത്തിനു തയ്യാറെടുക്കുകയാണ് ഇന്ത്യ. ഇരുപതിനായിരം സൈനികരെ അണിനിരത്തുന്ന ഈ പരിശീലനത്തിൽ കര, നാവിക, വ്യോമസേനാ വിഭാഗങ്ങൾ പങ്കെടുക്കുന്നുണ്ട്. ഓപ്പറേഷൻ സിന്ദൂറിന് ശേഷം ഇന്ത്യ നടത്തുന്ന ഈ വൻകിട സൈനികാഭ്യാസം മറ്റൊരു അപ്രതീക്ഷിത ആക്രമണത്തിന്റെ മുന്നോടിയാണോ എന്ന് സംശയിച്ച് (ഭയന്ന്!) പാകിസ്താൻ വലിയ ജാഗ്രതയിലാണ്. മേഖലയിൽ രണ്ടു ദിവസത്തേക്ക് നോട്ടാം (NOTAM, നോട്ടീസ് ടു എയർമെൻ) പ്രഖ്യാപിച്ചിട്ടുണ്ട്. തങ്ങളുടെ വലിയ വ്യോമമേഖലകളിൽ പാകിസ്താൻ നിരോധനമേർപ്പെടുത്തിയിരിക്കുകയാണ്.

ഇന്ത്യയിലെ ഗുജറാത്തിനും പാകിസ്താനിലെ സിന്ധ് പ്രവിശ്യയ്ക്കും ഇടയിലെ 96 കിലോമീറ്റർ ദൈർഘ്യമുള്ള ചതുപ്പുപ്രദേശമാണ് സർ ക്രീക്ക്. ഈ പ്രദേശത്തിന്റെ ഉടമസ്ഥാവകാശം സംബന്ധിച്ച് ഇരുരാജ്യങ്ങളും തമ്മിൽ ദീർഘകാലമായി തർക്കം നിലനിൽക്കുന്നു. മേഖലയിൽ പാകിസ്താൻ വലിയ തോതിൽ സൈനികസന്നാഹം ഒരുക്കുന്നുവെന്നും നിലമറന്ന് കളിച്ചാൽ പാകിസ്താന്റെ ചരിത്രവും ഭൂമിശാസ്ത്രവുമൊക്കെ മാറ്റിയെഴുതുമെന്നും ഇന്ത്യൻ പ്രതിരോധമന്ത്രി രാജ്‌നാഥ് സിംഗ് മുന്നറിയിപ്പു നൽകിയത് ഏതാനും ആഴ്ചകൾക്കു മുമ്പാണ്. അതിന്റെ പിന്നാലെ വരുന്ന ഈ സംയുക്ത സൈനികാഭ്യാസം പലതരത്തിലുള്ള അഭ്യൂഹങ്ങൾക്കും വഴിവെച്ചിട്ടുണ്ട്.