ട്രംപിന് ചെക്ക്! ഇന്ത്യയും ന്യൂസീലൻഡും തമ്മിൽ ഇനി തീരുവരഹിത വ്യാപാരം; കരാറിൽ നേട്ടമാർക്ക്?

ഇന്ത്യയും ന്യൂസീലൻഡും തമ്മിൽ തീരുവയില്ലാത്ത വ്യാപാരം സാധ്യമാക്കുന്ന സ്വതന്ത്ര വ്യാപാര കരാർ യാഥാർഥ്യത്തിലേക്ക്. ഇരുരാജ്യങ്ങൾക്കിടയിലുള്ള വ്യാപാരം, നിക്ഷേപം, സഹകരണം എന്നിവ മെച്ചപ്പെടുത്തുമെന്ന് പ്രതീക്ഷിക്കുന്ന കരാർ അടുത്ത വർഷത്തോടെ ഒപ്പുവെച്ചേക്കുമെന്നാണ് കരുതുന്നത്. മൂന്നുമാസത്തിനകം ഒപ്പുവെക്കുന്ന കരാർ ഏഴോ എട്ടോ മാസങ്ങൾക്കകം നടപ്പാകുമെന്നാണ് പ്രതീക്ഷിക്കുന്നത്. കരാർ പ്രകാരം, ഇന്ത്യയിൽ നിന്നുള്ള കയറ്റുമതിക്ക് ന്യൂസീലൻഡ് നൂറുശതമാനം തീരുവയിളവു നൽകും. അതേസമയം ന്യൂസീലൻഡിൽ നിന്ന് ഇറക്കുമതി ചെയ്യുന്ന 70 ശതമാനം ഉത്പന്നങ്ങളുടെയും താരിഫ് ഇന്ത്യയും ഒഴിവാക്കും.

2025 മാർച്ചിൽ ന്യൂസീലൻഡ് പ്രധാനമന്ത്രി ക്രിസ്റ്റഫർ ലക്സൺ ഇന്ത്യ സന്ദർശിച്ചപ്പോൾ ആരംഭിച്ച ചർച്ചകൾ ഒമ്പത് മാസത്തെ റെക്കോഡ് കാലയളവിനുള്ളിലാണ് പൂർത്തിയായത്. യുകെ, ഒമാൻ എന്നിവയ്ക്കു പിന്നാലെ ഈ വർഷത്തെ ഇന്ത്യയുടെ മൂന്നാമത്തെ വ്യാപാരകരാറാണിത്. പക്ഷേ, കരാറിനെതിരേ ന്യൂസീലൻഡിൽ നിന്ന് തന്നെ എതിർപ്പുയർന്നു കഴിഞ്ഞു. എന്താണ് ഇന്ത്യ-ന്യൂസീലൻഡ് സ്വതന്ത്രവ്യാപാര കരാർ? എങ്ങനെയാണ് ഇത് ഇരുരാജ്യങ്ങളെയും ബാധിക്കുക? എന്തുകൊണ്ടാണ് കരാറിനെതിരേ ന്യൂസീലൻഡിലെ ഒരു വിഭാഗം എതിർപ്പ് ഉയർത്തുന്നത്?