നടവഴി അയൽവാസികൾ മതിൽ കെട്ടിയടച്ചു, ദുരിതം നീന്തിക്കയറുന്നു ബിജുവും കുടുംബവും

അയൽക്കാർ നടവഴി മതിൽക്കെട്ടി അടച്ചതോടെ ദുരിതത്തിലായിരിക്കുകയാണ് ഒരു കുടുംബം. എറണാകുളം ചേരാനല്ലൂർ തട്ടാശ്ശേരി ബിജുവിനും കുടുംബത്തിനും വീടിന് പുറത്തിറങ്ങണമെങ്കിൽ രണ്ട് മതിൽ ചാടിക്കടക്കണം. ജോലിക്ക് പോകാനാണെങ്കിലും വീട്ടിലേക്കുള്ള അവശ്യസാധനങ്ങൾ വാങ്ങാനാണെങ്കിലും ഈ മതിൽ ചാടാതെ പറ്റില്ല. അതിന് ആരോഗ്യം സമ്മതിക്കാത്തതിനാൽ ബിജുവിന്റെ ഭാര്യ ഗീത കഴിഞ്ഞ ഒന്നരമാസമായി വീടിന് പുറത്തിറങ്ങിയിട്ടില്ല. അവർക്ക് ജോലിയും നഷ്ടമായി.

വീടിന് ചുറ്റുമാണെങ്കിൽ കനത്ത വെള്ളക്കട്ടാണ്. പാമ്പുൾപ്പടെയുള്ള ജീവികളും ഈ കുടുംബത്തിന് ഭീഷണിയാണ്. 22 വർഷം മുമ്പാണ് ബിജുവും കുടുംബവും ഈ വീട് വാങ്ങി താമസം തുടങ്ങുന്നത്. കുടികിപ്പാവകാശത്തിലൂടെ വാങ്ങിയ വീടിന് നടപ്പാവകാശമുണ്ടെന്ന് പറഞ്ഞാണ് വീട് കൈമാറിയത്. അന്ന് നടക്കാനുള്ള വഴിയും ഉണ്ടായിരുന്നു. എന്നാൽ കാലക്രമേണ ചുറ്റും വീടുകൾ വരികയും ഈ പറമ്പ് ഉടമസ്ഥൻ മതിൽക്കെട്ടി അടക്കുകയും ചെയ്തതോടെ ഇവരുടെ ജീവിതം 'വഴിമുട്ടി'. പോലീസിനും ജില്ലാ കലക്ടർക്കും പുറമേ മുഖ്യമന്ത്രിയെ വരെ ഈ കുടുംബം ചെന്നു കണ്ട് പരാതി നൽകിയിട്ടും ഇന്നേ വരെ ഒരു പരിഹാരം കണ്ടെത്തിയിട്ടില്ല.

Content Highlights: A family in Cheranalloor, Ernakulam, has been left without proper access to their home after neighboring property owners allegedly blocked the only walkway with compound walls.