സിദ്ധാര്ഥന്റെ മരണം: നഷ്ടപരിഹാരമായ 7 ലക്ഷം രൂപ സര്ക്കാര് പത്തുദിവസത്തിനകം കെട്ടിവെക്കണം- ഹൈക്കോടതി
കൊച്ചി: കോളേജ് ഹോസ്റ്റലില് മരിച്ചനിലയില് കണ്ടെത്തിയ വയനാട് പൂക്കോട് വെറ്ററിനറി കോളേജ് വിദ്യാര്ഥി ജെ.എസ്. സിദ്ധാര്ഥന്റെ കുടുംബത്തിന് ദേശീയ മനുഷ്യാവകാശ കമ്മിഷന് നിര്ദേശിച്ച ഏഴുലക്ഷം നഷ്ടപരിഹാരത്തുക പത്തുദിവസത്തിനകം സര്ക്കാര് ഹൈക്കോടതിയില് കെട്ടിവെക്കണമെന്ന് ഉത്തരവ്.
നഷ്ടപരിഹാരം നല്കണമെന്ന മനുഷ്യാവകാശ കമ്മിഷന്റെ 2024 ഒക്ടോബര് ഒന്നിലെ ഉത്തരവ് ചോദ്യംചെയ്ത് സര്ക്കാര് നല്കിയ ഹര്ജിയിലാണ് ചീഫ് ജസ്റ്റിസ് നിതിന് ജാംദാര്, ജസ്റ്റിസ് ബസന്ത് ബാലാജി എന്നിവരടങ്ങുന്ന ഡിവിഷന് ബെഞ്ചിന്റെ നിര്ദേശം.
ഇക്കാര്യത്തില് ഒന്നും ചെയ്യാതിരുന്ന ഉന്നത ഉദ്യോഗസ്ഥനോട് നേരിട്ട് ഹാജരാകണമെന്ന് നിര്ദേശിച്ചപ്പോഴാണ് സര്ക്കാര് ഹര്ജി ഫയല്ചെയ്തതെന്ന് കോടതി കുറ്റപ്പെടുത്തി. ഇങ്ങനെയല്ല ഉത്തരവിനെ ചോദ്യംചെയ്യേണ്ടത്. അതിനാലാണ് പണം കോടതിയില് കെട്ടിവെക്കാന് നിര്ദേശിച്ചത്. കാലതാമസത്തിനുള്ള കാരണം വ്യക്തമാക്കി ഹര്ജി ഭേദഗതിചെയ്തുനല്കണം.പണം കെട്ടിവെച്ചശേഷം ഉദ്യോഗസ്ഥന് നേരിട്ട് ഹാജരാകണമെന്ന ആവശ്യത്തില് ഇളവുതേടി മനുഷ്യാവകാശ കമ്മിഷന് അപേക്ഷ നല്കാമെന്നും കോടതി വ്യക്തമാക്കി. സര്ക്കാര് 10 ദിവസം സമയം ആവശ്യപ്പെട്ടതിനെത്തുടര്ന്ന് ഹര്ജി ജൂലായ് 11-ന് പരിഗണിക്കാന് മാറ്റി. ആദ്യനിര്ദേശം പാലിക്കാത്തതിനെത്തുടര്ന്ന് എട്ടുശതമാനം പലിശസഹിതം തുക കൈമാറാന് ദേശീയ മനുഷ്യാവകാശ കമ്മിഷന് രണ്ടാമതും ഉത്തരവിട്ടിരുന്നു. രണ്ട് ഉത്തരവുകളും സര്ക്കാര് അവഗണിച്ചതോടെ, അടിയന്തരമായി പണം കൈമാറിയശേഷം ചീഫ് സെക്രട്ടറിയോട് നേരിട്ടു ഹാജരാകാന് കമ്മിഷന് നിര്ദേശിച്ചു. തുടര്ന്നാണ് സര്ക്കാര് ഹൈക്കോടതിയെ സമീപിച്ചത്.
ബിജെപി നേതാവ് സന്ദീപ് വചസ്പതിയുടെ പരാതിയിലാണ് നഷ്ടപരിഹാരം നല്കാന് മനുഷ്യാവകാശ കമ്മിഷന് ഉത്തരവിട്ടത്.
Content Highlights: Sidharthan Death: High Court directs the state govt to deposit ₹7 lakh compensation within 10 days