ഗവർണർ സ്ഥാനത്തിരുന്ന് ആർ.എസ്.എസുകാരനായി പ്രവർത്തിക്കാനാവില്ല- പിണറായി വിജയൻ

കണ്ണൂർ: കേരള പിഎസ്‌സി ചെയർമാൻ ഡോ. എം.ആർ. ബൈജുവിനെയും അംഗങ്ങളെയും പുറത്താക്കാൻ രാഷ്ട്രപതിക്ക് മുൻ ഗവർണർ രാജേന്ദ്ര ആർലേക്കർ ശുപാർശ നൽകിയ നടപടിക്കെതിരെ വിമർശനവുമായി പ്രതിപക്ഷ നേതാവ് പിണറായി വിജയൻ. സ്ഥാനമൊഴിയുന്നതിന് ഒരാഴ്ച മുമ്പാണ് ഗവർണർ രാജേന്ദ്ര ആർലേക്കർ അസാധാരണമായ നീക്കം നടത്തിയത്. ഗവർണർ പദവിയിലിരുന്നുകൊണ്ട് ആർ.എസ്.എസുകാരനായി പ്രവർത്തിക്കാൻ ആർലേക്കർക്ക് കഴിയില്ലെന്ന് പിണറായി വിജയൻ പറഞ്ഞു.

എഴുതപ്പെട്ട ഭരണഘടനയിൽ കൃത്യമായി വ്യവസ്ഥ ചെയ്തിട്ടുള്ള കാര്യങ്ങളാണ് ലംഘിക്കപ്പെട്ടിരിക്കുന്നത്. ഭരണഘടനാധിഷ്ഠിതമായി പ്രവർത്തിക്കാൻ ബാധ്യതയുള്ള സ്ഥാനത്തിരുന്നുകൊണ്ട് തീർത്തും ഭരണഘടനാ വിരുദ്ധവും ചട്ടവിരുദ്ധവുമായ നടപടികൾ സ്വീകരിക്കാൻ ഗവർണർക്ക് അധികാരമില്ലെന്ന് പിണറായി പറഞ്ഞു.

ഭരണഘടന അനുസരിച്ച് ഗവർണർ പദവി ഏതു തരത്തിലാണോ സൃഷ്ടിക്കപ്പെട്ടത്, അതേപോലെതന്നെ ഭരണഘടനയുടെ സൃഷ്ടിയാണ് പി.എസ്.സി. ഒരു ഭരണഘടനാ സ്ഥാപനമായ പി.എസ്.സിയിലെ അംഗങ്ങൾക്ക് ആറുവർഷത്തെ കാലാവധി ഭരണഘടന തന്നെ നിശ്ചയിച്ചിട്ടുള്ളതാണ്. ഏതെങ്കിലും അംഗത്തിനെതിരെ നടപടിയെടുക്കണമെങ്കിൽ രാഷ്ട്രപതിക്ക് പോലും വ്യക്തമായ ഭരണഘടനാ വ്യവസ്ഥകൾ പാലിക്കേണ്ടതുണ്ട്. അതിൽ ഏറ്റവും പ്രധാനപ്പെട്ടത്, വിഷയം സുപ്രീം കോടതിയുടെ അന്വേഷണത്തിന് വിധേയമാക്കുകയും അതിന്റെ അടിസ്ഥാനത്തിലുള്ള റിപ്പോർട്ട് ലഭ്യമാക്കുകയും ചെയ്യുക എന്നതാണ്.

കേരളത്തിലെ പി.എസ്.സിക്കോ അവിടുത്തെ ഏതെങ്കിലും അംഗങ്ങൾക്കെതിരെയോ അത്തരത്തിലുള്ള അന്വേഷണമോ റിപ്പോർട്ടോ നിലവിലില്ല. ഈ സാഹചര്യത്തിൽ ഗവർണർ ഇത്തരമൊരു നിലപാട് സ്വീകരിക്കുന്നത് ഭരണഘടനാ തത്ത്വങ്ങൾക്ക് വിരുദ്ധമാണെന്നും പിണറായി വിജയൻ കൂട്ടിച്ചേർത്തു.

Content Highlights: Chief Minister Pinarayi Vijayan stated that the Governor cannot act as an RSS agent while holding constitutional office., Criticized the unconstitutional actions taken regarding Kerala Public Service Commission (PSC) members., Highlighted constitutional provisions protecting PSC members from arbitrary action without Supreme Court inquiry., Condemned the UDF's stance against the Kerala PSC.