ഒന്പതാം ക്ലാസ് വിദ്യാര്ഥിയുടെ ആത്മഹത്യ; ബാലാവകാശ കമ്മീഷന് സ്വമേധയാ കേസെടുത്തു
പാലക്കാട്: ശ്രീകൃഷ്ണപുരം സെയ്ന്റ് ഡൊമിനിക്സ് ഇംഗ്ലീഷ് മീഡിയം സ്കൂളിലെ ഒന്പതാം ക്ലാസ് വിദ്യാര്ഥിനി ആശിര്നന്ദയുടെ മരണത്തില് ബാലാവകാശ കമ്മീഷന് കേസെടുത്തു. ജില്ലാ ശിശുസംരക്ഷണ സമിതി സ്കൂള് അധികൃതരില് നിന്ന് വിശദമായ റിപ്പോര്ട്ടും തേടിയിട്ടുണ്ട്.
തച്ചനാട്ടുകര ചോളോടുള്ള കുട്ടിയുടെ വീടും പഠിച്ച സ്കൂളും കമ്മീഷന് ചെയര്മാന് കെ.വി മനോജ്കുമാർ സന്ദര്ശിച്ചു. കുട്ടികള്ക്ക് അനുകൂലമായ സാഹചര്യം സ്കൂളില് വളര്ത്തിയെടുക്കണമെന്നും കമ്മീഷന് നിര്ദേശിച്ചു.
കുട്ടികള്ക്ക് ആഘാതമില്ലാത്ത രീതിയില് വേണം സ്കൂളിന്റെ തുടര്പ്രവര്ത്തനമെന്നും കമ്മീഷന് ആവശ്യപ്പെട്ടു. തിങ്കളാഴ്ച കുട്ടികള് സ്കൂളിലെത്തുമ്പോള് ആവശ്യമായ ക്ലാസും കൗണ്സലിങ്ങും നല്കണമെന്നും കമ്മീഷന് കൂട്ടിച്ചേര്ത്തു. സംഭവത്തില് പോലീസില് നിന്നുള്ള റിപ്പോര്ട്ടും ബാലാവകാശ കമ്മീഷന് തേടിയിട്ടുണ്ട്.
Content Highlights: ninth standard student suicide balavakasha commission took case