വെറും മൂന്ന് ദിവസം കൊണ്ട് സ്വരൂപിച്ചത് 16.5 കോടി; സുമനസ്സുകളുടെ പിന്തുണയിൽ മരിയയ്ക്ക് ജീൻ തെറപ്പി

കൊച്ചി: അപൂർവ ജനിതക രോഗമായ സ്‌പൈനൽ മസ്‌കുലർ അട്രോഫി (എസ്.എം.എ.) ടൈപ്പ് വൺ ബാധിച്ച മിയ മരിയയ്ക്ക് (ഏഴുമാസം) കൊച്ചി അമൃത ആശുപത്രിയിൽ ജീൻ തെറപ്പി ചികിത്സ പൂർത്തിയാക്കി. ചികിത്സയ്ക്ക് ആവശ്യമായ 16.5 കോടി രൂപ വെറും മൂന്ന് ദിവസംകൊണ്ട് പൊതുജനങ്ങളുടെ സഹായത്തോടെ സമാഹരിച്ചിരുന്നു.

രോഗം മൂർച്ഛിക്കാതിരിക്കാനാണ് ജീൻ തെറപ്പി നൽകിയത്. പീഡിയാട്രിക് ന്യൂറോളജി വിഭാഗം മേധാവി ഡോ. കെ.പി. വിനയൻ, അസിസ്റ്റന്റ് പ്രൊഫസർ ഡോ. രശ്മി രവീന്ദ്രൻ, പീഡിയാട്രിക് പൾമൊണറി വിഭാഗം മേധാവി ഡോ. സജിത്ത് കേശവൻ എന്നിവരടങ്ങുന്ന വിദഗ്ധ സംഘം നേതൃത്വം നൽകി.

മൂവാറ്റുപുഴ ആയവന സ്വദേശിനിയായ മിയയുടെ ചികിത്സയ്ക്കുവേണ്ട ഭീമമായ തുക കണ്ടെത്തുന്നതിനായി കുടുംബം സഹായം തേടിയതോടെയാണ് ആയിരക്കണക്കിന് ആളുകൾ സഹായഹസ്തവുമായി രംഗത്തെത്തിയത്.

നിലവിൽ മെഡിക്കൽ സംഘത്തിന്റെ സൂക്ഷ്മ നിരീക്ഷണത്തിലുള്ള മിയയ്ക്ക് തുടർചികിത്സയും പുനരധിവാസ പരിചരണവും തുടരും.

Content Highlights: Seven-month-old Mia Maria successfully received gene therapy for SMA Type 1 at Kochi Amrita Hospital., Rs 16.5 crore was raised in just three days through public donations., The treatment was led by an expert medical team including Dr. K.P. Vinayan and Dr. Rashmi Raveendran.