മഹാരാജാസിൽ ബിരുദദാനച്ചടങ്ങ് അലങ്കോലപ്പെട്ട സംഭവം; ചെയർപേഴ്‌സൺ ഉൾപ്പടെ 2 പേർക്ക് സസ്പെൻഷൻ
കൊച്ചി: മഹാരാജാസ് കോളേജിൽ ബിരുദദാനച്ചടങ്ങ് അലങ്കോലപ്പെട്ട സംഭവത്തിൽ രണ്ടുവിദ്യാർഥികളെ സസ്പെൻഡ് ചെയ്തു. യൂണിയൻ ചെയർപേഴ്‌സൺ വി. പ്രനീൽരാജ്, വൈസ് ചെയർപേഴ്‌സൺ നഫീസത്തുൽ മിസ്രിയ എന്നിവരെയാണ് അന്വേഷണവിധേയമായി 10 ദിവസത്തേക്ക് സസ്പെൻഡ് ചെയ്തത്. തിങ്കളാഴ്ച കോളേജിൽ ചേർന്ന കൗൺസിൽ യോഗത്തിലാണ് അച്ചടക്കലംഘനത്തിന് നടപടിയെടുത്തത്.
നടപടിയിൽ പ്രതിഷേധിച്ച് എസ്.എഫ്.ഐ. നേതൃത്വത്തിൽ കാമ്പസിൽ മാർച്ച് നടത്തി. പ്രതികാരനടപടികളെ വിദ്യാർഥികളെ അണിനിരത്തി പ്രതിരോധിക്കുമെന്ന് എസ്.എഫ്.ഐ. ഭാരവാഹികൾ പറഞ്ഞു. ചൊവ്വാഴ്ച കാമ്പസിൽ വിദ്യാർഥി റാലിയും കൂട്ടായ്മയും സംഘടിപ്പിക്കുമെന്നും ഭാരവാഹികൾ അറിയിച്ചു.
ബിരുദദാനച്ചടങ്ങ് എസ്.എഫ്.ഐയുടെ നേതൃത്വത്തിൽ ഒരു കൂട്ടം വിദ്യാർഥികൾ അലങ്കോലമാക്കിയതിൽ പ്രതിഷേധിച്ച് മഹാരാജാസിലെ സംയുക്ത അധ്യാപകസമതി കാമ്പസിൽ മൗനജാഥ നടത്തി.
സംസ്‌കൃത സർവകലാശാലയിൽ 12 വിദ്യാർഥികളെ തിരിച്ചെടുക്കും
കാലടി: ശ്രീശങ്കരാചാര്യ സംസ്‌കൃത സർവകലാശാലയിൽ സസ്പെൻഷനിലായ 16 വിദ്യാർഥികളിൽ 12 പേരെ ഉപാധികളോടെ തിരിച്ചെടുക്കാൻ സിൻഡിക്കേറ്റ് യോഗം തീരുമാനിച്ചു. 4 പേരുടെ സസ്പെൻഷൻ തുടരും. സസ്പെൻഷൻ കാലാവധി 60 ദിവസമായ സാഹചര്യത്തിലാണ് 12 പേരെ തിരിച്ചെടുക്കാൻ തീരുമാനിച്ചത്. ഇവർ മാപ്പപേക്ഷ നൽകണം. മാതാപിതാക്കളുമായി കാമ്പസിൽവന്ന് അക്രമസമരങ്ങളിൽ പങ്കെടുക്കില്ലെന്ന് എഴുതി നൽകണം.
സസ്പെൻഷൻ കാലാവധിയിൽ കാമ്പസിൽ പ്രവേശിക്കാൻ പാടില്ലെന്ന നിർദേശം ലംഘിച്ചതിനാണ് നാലുപേർക്കെതിരേ നടപടി തുടരുന്നത്. ശ്യാംജിത്ത്, ശ്രദ്ധ, കെ.വി. അഭിജിത്ത്, പി.എസ്. അർച്ചന എന്നിവരാണ് സസ്പെൻഷനിൽ തുടരുക. ഇവരുടെ സസ്പെൻഷൻ കാലാവധി രണ്ടുമാസത്തേക്ക് നീട്ടി. ശ്യാംജിത്ത് എസ്.എഫ്.ഐ. യൂണിറ്റ് സെക്രട്ടറിയും അർച്ചന യൂണിറ്റ് പ്രസിഡന്റുമാണ്. ഓൺലൈനായാണ് സിൻഡിക്കേറ്റ് യോഗം ചേർന്നത്.
ഓഗസ്റ്റ് 13-ന് ചേർന്ന സിൻഡിക്കേറ്റ് യോഗത്തിനിടെയുണ്ടായ അക്രമസംഭവങ്ങളേത്തുടർന്ന് സസ്പെൻഷനിലായ 16 വിദ്യാർഥികളും സംഭവത്തിൽ കുറ്റക്കാരാണെന്ന് കണ്ടെത്തിയിട്ടുണ്ടെന്ന് അച്ചടക്കസമിതി കൺവീനറും സിൻഡിക്കേറ്റ് അംഗവുമായ അഡ്വ. കെ.ബി. സാബു പറഞ്ഞു.
സസ്പെൻഷനിലായ വിദ്യാർഥികൾക്ക് പരീക്ഷയെഴുതേണ്ട സാഹചര്യം കോടതിയുടെ പരിഗണനയിലായതിനാൽ യോഗം ചർച്ചചെയ്തില്ല. സിൻഡിക്കേറ്റ് തീരുമാനങ്ങളിൽ വിയോജിപ്പ് രേഖപ്പെടുത്തി പ്രേംകുമാർ എം.എൽ.എ. ഓൺലൈൻ യോഗത്തിൽനിന്നും പുറത്തുപോയി.
Content Highlights: Maharajas College union chairperson and vice-chairperson suspended for 10 days over convocation disruption., SFI organized a protest march on campus against the suspension of their leaders., Sree Sankaracharya University decided to reinstate 12 out of 16 suspended students with conditions., Four students, including SFI unit leaders, remain under suspension for violating campus entry rules.