അൻപതിലധികം മോഷണകേസുകളിലെ പ്രതി 'ഡോളർ അനി'യും കൂട്ടാളിയും അറസ്റ്റിൽ; പിടിയിലായത് തേനിയിൽനിന്ന്

കോഴിക്കോട്: അൻപതിലധികം മോഷണക്കേസുകളിൽ പ്രതിയായ കുപ്രസിദ്ധ മോഷ്ടാവ് ഷിമോഗ കൊപ്പ സ്വദേശി ഡോളർ അനി എന്നറിയപ്പെടുന്ന അനിൽകുമാറിനെയും (38), ഇയാളുടെ കൂട്ടാളിയെയും പോലീസ് സാഹസികമായി പിടികൂടി.

കഴിഞ്ഞ മാസം 24-ന് കോഴിക്കോട് അഴകൊടി ക്ഷേത്രത്തിന് സമീപമുള്ള സൈബർ ഫോറൻസിക് വിദഗ്ധൻ വിനോദ് ഭട്ടത്തിരിപ്പാടിന്റെ വീട്ടിൽനിന്ന് 20 പവനോളം സ്വർണം കവർന്ന കേസിലാണ് പ്രതികൾ പിടിയിലായത്. വീട്ടുകാർ യാത്രപോയ സമയം നോക്കി വീടിന്റെ മുൻവാതിൽ പൊളിച്ചാണ് അനിൽ മോഷണം നടത്തിയത്. മോഷ്ടിച്ച സ്വർണം വിൽക്കാൻ സഹായിച്ച താമരശ്ശേരി അമ്പായത്തോട് സ്വദേശി ജെയിംസിനെയും (57) പോലീസ് അറസ്റ്റ് ചെയ്തിട്ടുണ്ട്.

മോഷണത്തിന് ശേഷം ഒളിവിൽ പോയ പ്രതിയെ കണ്ടെത്താൻ ജില്ലാ പോലീസ് മേധാവി മെറിൻ ജോസഫിന്റെ നിർദേശപ്രകാരം ഡിസിപി പദംസിങ്, ടൗൺ എസിപി പ്രമോദൻ കെ.വി., നടക്കാവ് സിഐ ഷൈൻ എന്നിവരുടെ നേതൃത്വത്തിൽ പ്രത്യേക സംഘം രൂപീകരിച്ച് അന്വേഷണം നടത്തി വരികയായിരുന്നു. സിസിടിവി ദൃശ്യങ്ങളും ശാസ്ത്രീയ തെളിവുകളും പരിശോധിച്ചതിൽനിന്നാണ് മോഷണം നടത്തിയത് അനിൽകുമാറാണെന്ന് പോലീസ് തിരിച്ചറിഞ്ഞത്. തുടർന്ന് കർണാടകയിലും തമിഴ്നാട്ടിലും പോലീസ് തിരച്ചിൽ നടത്തിയെങ്കിലും ഇയാൾ ഒളിവിൽ തുടരുകയായിരുന്നു.

പിന്നീട് കോൾ റെക്കോർഡുകളും മറ്റും കേന്ദ്രീകരിച്ച് നടത്തിയ അന്വേഷണത്തിൽ തമിഴ്നാട്ടിലെ കമ്പത്തുള്ള ഒരു കോളനിയിൽ ഇയാൾ താമസിക്കുന്നുണ്ടെന്ന് വിവരം ലഭിച്ചെങ്കിലും, മറ്റൊരു കേസുമായി ബന്ധപ്പെട്ട് തമിഴ്നാട് പോലീസ് അവിടെ എത്തിയതോടെ അനിൽ തേനിയിലേക്ക് കടന്നു. ഒടുവിൽ തേനി ടൗണിൽ വെച്ച് സാഹസികമായാണ് കേരള പോലീസ് ഇയാളെ കസ്റ്റഡിയിലെടുത്തത്.

അനിൽകുമാറിന്റെ അറസ്റ്റോടെ കോഴിക്കോട്ടെ കുറ്റിക്കാട്ടൂർ, മേത്തോട്ടുതാഴം, വയനാട്ടിലെ കൽപ്പറ്റ തുടങ്ങിയിടങ്ങളിലെ എട്ടോളം കവർച്ചാ കേസുകൾക്ക് തുമ്പുണ്ടായിട്ടുണ്ട്. അനിലിനെ ചോദ്യം ചെയ്തതിൽനിന്നാണ് സ്വർണം വിൽക്കാൻ സഹായിച്ച ജെയിംസിനെക്കുറിച്ച് വിവരം ലഭിച്ചത്. മുപ്പതിലധികം ഭവനഭേദന കേസുകളിൽ പ്രതിയായ ജെയിംസ് മുൻപും പലതവണ ജയിൽ ശിക്ഷ അനുഭവിച്ചിട്ടുള്ളയാളാണ്. കവർച്ച ചെയ്യപ്പെട്ട സ്വർണം കണ്ടെത്താനുള്ള ശ്രമങ്ങൾ പോലീസ് ഊർജിതമാക്കിയിട്ടുണ്ട്.

Content Highlights: Serial burglar Dollar Anil arrested in Theni by Kozhikode Police., Accomplice James arrested for helping sell stolen gold., Investigation linked to over 50 theft cases across Kerala., Scientific evidence and CCTV analysis led to the breakthrough., Recovery of stolen gold is currently underway.