തോന്നിയപോലെ പറക്കുന്ന ഡ്രോണുകളെ വീഴ്ത്താൻ കേരള പോലീസിന്റെ ‘കഴുകൻകണ്ണുകൾ’

തിരുവനന്തപുരം: അനധികൃതമായി പറക്കുന്ന ഡ്രോണുകളെ വീഴ്ത്താൻ ‘കഴുകൻകണ്ണുകൾ’ ഒരുക്കി കേരള പോലീസ്‌. പോലീസിലെ ഡ്രോൺ ഫൊറൻസിക് വിഭാഗം വികസിപ്പിച്ച ‘ഈഗിൾ ഐ’ എന്ന അത്യന്താധുനിക സംവിധാനമാണ് അനുമതിയില്ലാതെ പറക്കുന്ന ഡ്രോണുകളെ താഴെയിറക്കാൻ തുടങ്ങിയത്.

വാഹനത്തിൽ സ്ഥാപിച്ച ആന്റി ഡ്രോൺ സംവിധാനം അഞ്ചുകിലോമീറ്റർ ചുറ്റളവിലുള്ള ഡ്രോണുകളെ കണ്ടെത്തുകയും പൂർണവിവരം ശേഖരിക്കുകയും ചെയ്യും. അനുമതിയില്ലാത്ത സ്ഥലങ്ങളിൽ പറക്കുന്ന ഡ്രോണുകളെ കണ്ടെത്തിയാൽ അവയുടെ നിയന്ത്രണമേറ്റെടുത്ത് ‌അവിടെനിന്നു മാറ്റും. ജിപിഎസ് ജാമർ മുഖേന അവയെ താഴെയിറക്കി പ്രവർത്തനരഹിതമാക്കും..

പിടിച്ചെടുക്കുന്ന ഡ്രോണുകളുടെയും ഉടമകളുടെയും വിവരം ഫൊറൻസിക് പരിശോധനയിലൂടെ ശേഖരിക്കും. നിയമവിരുദ്ധകാര്യങ്ങൾക്ക് ഉപയോഗിച്ചിട്ടുണ്ടെങ്കിൽ കേസെടുക്കും. ലേസർ സാങ്കേതികവിദ്യയിലൂടെ ഡ്രോണുകളെ ആകാശത്തുവെച്ചുതന്നെ നശിപ്പിക്കാനും ‘ഈഗിൾ ഐ’ക്ക് കഴിയും. ഉയർന്ന സുരക്ഷ വേണ്ട മേഖലയിലും വിഐപി സന്ദർശനഘട്ടങ്ങളിലുമാണ് ആന്റി ഡ്രോൺ വാഹനം പ്രധാനമായും പ്രയോജനപ്പെടുത്തുക.

Content Highlights: Kerala Police`s new `Eagle Eye` system detects and neutralizes unauthorized drones within 5km, ensuring airspace security. Learn about this advanced anti-drone technology.