സ്വകാര്യ ബസ്സുകൾ കില്ലിങ് മെഷീനുകൾ ആവരുത്, ഡ്രൈവർമാർക്ക് സ്മാർട്ട് ഐഡി നിർബന്ധം; ഹൈക്കോടതി

കൊച്ചി: കൊച്ചിയിലെ സ്വകാര്യ ബസ് അപകടത്തിൽ കടുത്ത നടപടി വേണമെന്ന് ഹൈക്കോടതി. ഇക്കാര്യത്തിൽ പോലീസ് ഉരുക്കുമുഷ്ടി ഉപയോഗിക്കണം. ജനങ്ങളോട് വീഡിയോ എടുക്കാൻ പറയണം. കാക്കനാട് അപകടത്തിലെ ഡ്രൈവർ മയക്കുമരുന്ന് കേസിൽ പ്രതിയാണെന്നത് ഞെട്ടിക്കുന്ന സംഭവമാണെന്നും കോടതി നിരീക്ഷിച്ചു.

കഴിഞ്ഞ ദിവസമാണ് കാക്കനാട് ഇൻഫോപാർക്കിന് സമീപത്തെ കുളക്കാട്ടുമൂലയ്ക്ക് വെച്ച് സ്വകാര്യബസ് ഇടിച്ച് ഇൻഫോപാർക്ക് ജീവനക്കാരിയായ അക്ഷര മരിച്ചിരുന്നു. ഈ സംഭവത്തിലാണ് ശക്തമായ നടപടി വേണമെന്ന് ഹൈക്കോടതി വ്യക്തമാക്കിയിരിക്കുന്നത്. സ്വകാര്യ ബസുകൾ കില്ലിങ് മെഷീൻ ആകരുതെന്ന് കോടതി പറഞ്ഞു. സംഭവത്തിൽ കൊല്ലപ്പെട്ട അക്ഷരയുടെ കുടുംബത്തോട് മാപ്പ് ചോദിക്കുന്നതായി ഹൈക്കോടതി വ്യക്തമാക്കുകയും ചെയ്തു.

ഇത്തരം സംഭവങ്ങൾ ഞെട്ടിക്കുന്നതാണ്. അപകടം ഉണ്ടാക്കിയ ബസിന്റെ ഡ്രൈവർ മയക്കുമരുന്ന് കേസ് ഉൾപ്പെടെ എട്ടോളം കേസുകളിൽ പ്രതിയാണെന്നുള്ളത് ഞെട്ടിക്കുന്നതാണ്. സ്മാർട്ട് ഐ.ഡി ഉള്ളവർക്ക് മാത്രമേ ബസ് ഓടിക്കാൻ അനുവാദം നൽകാൻ പാടുള്ളൂവെന്നും കോടതി പറഞ്ഞു.

അതേസമയം ഇൻഫോപാർക്ക് ജീവനക്കാരി മരിച്ച അപകടത്തിൽപെട്ട ബസ് ഡ്രൈവർ സ്മാർട്ട് ഐഡിക്കായി അപേക്ഷിച്ചിരുന്നുവെന്നാണ് വിവരം. ഇയാൾക്കെതിരെയുള്ള കേസുകൾ മറച്ചുവെച്ചുകൊണ്ടാണ് ഇത്തരത്തിൽ അപേക്ഷ സമർപ്പിച്ചത് എന്നാണ് പോലീസ് പറയുന്നത്.

പൊതുജനങ്ങൾക്കും ഈ അപകടകരമായ യാത്രകളുടെ ദൃശ്യങ്ങൾ എടുത്ത് പോലീസ് സംവിധാനത്തിലേക്ക് നൽകാൻ വേണ്ടി ഒരു നമ്പർ അത് എല്ലാ സ്വകാര്യ ബസുകളിലും പ്രദർശിപ്പിക്കണം. അതിനനുസരിച്ചുള്ള ക്രമീകരണങ്ങൾ ബസുകളിൽ ഏർപ്പെടുത്തണമെന്നും കോടതി നിർദ്ദേശിച്ചിട്ടുണ്ട്. 

Content Highlights: High Court demands iron-fisted police action against reckless private bus drivers., Court expressed shock that the accused driver in the Kakkanad accident was involved in drug cases., Mandatory smart IDs required for all bus drivers to prevent criminals from operating vehicles., Public encouraged to record and report dangerous driving via a helpline displayed on buses.